TUMULUSING PANALANGSA KAWUJUDAKE RASA SEMBAH KRAMA
Galeyah-galeyah nitih gajah putih sarta amundhi jamus Kalimasada Prabu Puntadewa dupi ningali ingkang eyang Resi Mahatma Wara Bisma jumangkah ing payudan jumeneng senapati perang saksana mandhap saking titihan.
Lon-lonan Prabu Puntadewa anyaketi hangyane ingkang eyang mawi lampah sesedokan lengkeh-lengkeh angeka pada kaya kanjema pertala mukane, ngaturken sembah kaping pitu alukar kampuh kagem ngresiki canelanipun ingkang eyang saking lebuning paperangan, sarwi amunjuk atur :
Puntadewa : "Tuhu beja kemayangan manawi ingkang badhe nguntapaken pejahe Puntadewa sakadang, kanjeng eyang Resi Wara Bisma, amung lila dunya legawa ing pati , mugi Eyang paring puja sasanti Padhang ing alamipun lawas."
Sumedhot rasane ati kaya sinendhal mayang dupi ningali wayah ingkang banget ditresnani katingal tulus ing panalongso, Sang Resi nadyan gesang sampun rumaos wonten ing suwarga loka, makaten pangandikanipun :
Resi Bisma : "Dhuh putuku wong bagus, dudu kuwi sing takarepake, kabeh mengka pasrahna marang putu prabu ing Dwarawati kang pengawak Bathara Wisnu.
Putu..., rasa atine pun eyang antarane jagad gedhe yaiku alame triloka lan jagad cilik jagade eyang kang kebak pangrasane ati bab kawruh kalahiran kaya wus kagulung.
Yaiku kaya tetembungan jagad agung ginulung lan jagad cilik, iku tegese sasirnane gambar isen2 jagad tetelu kawengku ing alaming PANGERAN, dadi kang ginulung iku gambar utawa tabet. Pratelane kabeh mau gegambaran jiwa dudu pakartining cipta, cipta amung katut utawa kedayan wae. Mangkono pangrasane pun eyang wus kagulung.
Sembahmu marang pun eyang aran sembah Jiwa yaiku eling marang alaming jiwa dudu alaming cipta, ing mangka cipta arep melu nunggal enget ing alaming jiwa yaiku nalika Minger ana rasa lali sedhela.
Yaiku lali tumraping cipta kang kawengku engeting jiwa, mangkono kang tinembungake kaleme mawa limut tegese manjing ana alam kasunyatan
Cipta mau lali sedhela ewasemana sajroning lali mau meksa tansah eling marang gegayuhan yaiku Elinge. Elinge jiwa nalika lali sajroning eling mau tinembungake salebeting alam kanyut. Banjur luyut yaiku antarane melek karo turu uga diarani melek kasunyatan(batin).
Kabeh mau bakal kasanepakake perange pun Eyang lumawan Resi Seta (putih), Wrahatsangka (kuning-kulon), utara (ireng-elor), utari/Abimanyu (abang-kidul).
Wasana manawi wonten ukara ingkang boten mranani dhiri kula nyuwun agunging pangaksami.
Saking : Serat Kamiyana dening Ikwan Aji Nugraha-putu Jati