SUMINGKIR SAKA TINDAK NISTHA LUWIH AJI KATIMBANG BUNGAHE KABEJAN
Pungun-pungun anggenipun wudhar saking samadi Prabu Pratipa Dewa, byar padhang rasaning ati dumadagan karawuhan Kaki-kaki anganthi putri, kang sejatosipun sesinglone Bathara Guru tuwin Dewi Gangga tumunten sami amedhar sabda:
Kaki Siwa : " Dhuh sinuhun , menggah punapa darunane panjenengan tansah mesu budi kamangka sadaya sampun wonten, punapa badhe sesulih anggen kula madeg brahmana."
Pratipa : "Dhuh Sang Wiku, anggen kula amesu budi boten angemungna kagem kula pribadi, mugi tedhak turun kula darah Bharata sageda tetep anglenggahi sipat brahmana sanajan jiwa satriya tumut damel adheming bumi.
Diarani brahmana punika boten karana kepinterane lan pangudine sinau serat-serat sucine bathara, ananging amung katitik saka wewatekan brahmana, inggih punika tansah ngulati marang wewatekane dhewe.
Mila darajate brahmana punika werit sanget boten gampang sinebut meloke (sandhangan panganggon, wejang-wejangane lan sak panunggalane), saupama bocah ngarit duwe drajat brahmana sinten saget ngira ?
Wonten tetembungan sinten kang betah rumeksa marang watak lan kelakuan mesthi kalis saka karusakan.
Nadyan gegulang layang suci nanging tan bisa jaga watak kalakuane tetep ala diarani ora weruh ing sastra, sanes drajate brahmana nanging drajat sudra. Tiyang kang tansah sesaji Hagniotra inggih tansah mangreh pepinginan dipun wastani Brahmana Sejati."
Kaki Siwa : " Apa kukubane wong kang bener lakune? Kang temen mulya iku piye ? yen bisa mangsuli Batari Gangga takwenehake."
Pratipa : " Tiyang kang bener tindake punika bakal kasembadan kang sinedya, wong kang kasengsem kautaman adate angsal kamulyan.
Dene wong temen mulya punika Tiyang kang bisa ngratengi ana ing omahe dhewe ing peranganing dina kaping lima utawi kaping enem sanadjan sing diratengi punika boten sepira rasane lan boten sepira akehe, anggere sing diratengi punika sanes barang utangan.
Dene kang aneh temen iku patrape manungsa, amarga sampun sami sumurup yen saben dina wus anglur selur kehing wong kang sami mangkat marang kayangane Yamadipati, ewa dene patrape wong-wong kang sami keri teka boten rumangsa yen padha bakal mati.
Ingkang dipun wastani sejatine manungsa punika amargi saking lelabuhan becik badhe tumekan kaswargan tuwin kajuwara ing donya, sakdangune suwur punika tasih.
Ingkang diwastani sanjata sugih inggih punika sampun boten ambedakake bungah tuwin susah, cuwa ingkang sampun kapengker semanten ugi kekarepan ingkang boten kepanggih.
Saksana lon-lonan Bathari Gangga Anyaketi Prabu Pratipa Dewa lenggah wonten ing pepangkon pupu kang sisih tengen.
Pratipa : "Dhuh Sang Jagad Giri nata sampun kinodrat Nini Dewi Gangga dados anak kula awit kapangku mawi pupu tengen, ing tembenipun kajatukrama dening putra kula kulup Sentanu Murti."
Catetan :
Ratengi = ngenget (masak ulang makanan/ dipanasi)
Saking :
Serat Kamiyana dening Ikwan Aji Nugraha (putu Jati)