TAN ANA SANJATA SAKTI SAKLUMAHING BUMI KAJABA AMUNG JATI DHIRI
Sorak ambatha rubuh prajurit Hastina Pura gawe tintrime pabaratan. Sang pujangga perang Resi Drona tan bisa den kalahi kapara gawe gugure senopati-senopatine Pandawa kalebu Prabu Drupada.
Prabu Kresna damel kartisampeka kanthi apus krama, sesorak bilih Haswatama mati, wauta Sang Druna dados bingung ambilulungan kekes otot bebayune nuli tatanya marang Pandawa :
Drona : " Werkudara, sing mbok pateni mau sapa ngger?"
Werkudara : " Tama mati, kowe percaya karepmu, ora ya karemu."
Resi Drona lumampah murugi dhateng murid ingkang kinasih inggih Raden Arjuna tumuli tatanya:
Drona : " Ngger Arjuna , sing mati sapa?"
Arjuna : " Nyuwun pangapunten bapa, ingkang pejah bambang Haswatama."
Sanalika kreta Jaladara rodane ambles bumi (boten saged mabur malih kajawi lampah daratan), awit titise Wisnu wus ora cocok lahir lan bathine. Trengginas nata Dwarawati nyandhet lampahe Prabu puntadewa tumuli paring dawuh :
Kresna : " Yayi Samiaji, sepisan punika kula suwun puruna goroh dhumateng Resi Druna, matura menawi Bambang Haswatama Pejah. Goroh nanging nguripi."
Puntadewa : " Boten wonten critane wong goroh punika menang, kula tetep prasaja boten goroh. Keparenga ngenget-enget bilih gesange manungsa punika bebasan sagebyare tathit upami dipun bandhingake benjang ing jaman kelangengan tanpa wonten watesipun. Tumrape Puntadewa dosa sepisan dosa selawase sabab wanci boten saged mundur diambali malih.
Tatarane kasunyatan kaka prabu mangeran marang Budi (akal), akal ginawe rewang, ingkang sudi mastani akale salah enggon. Sir budi (akal) dhereng ngancik cipta tuwin rasa, milanipun purun gorohi bathinipun piyambak agung wilalate katitik Kreta Jaladara sampun boten saged mahawan ing dirgantara.
Sejatosipun bapa Druna paring piwulang kang pungkasan, saking anggenipun purun jumeneng senopati perang matak Aji Panglemunan sukma datan saged kasumurupan dening jalma, dadosaken prajurit Hupalawiya kantun sahaksa.
Punika piwulang sandi pamoring kawula saking Heping Hyang Maha Suci. Sucine piningit digawe wadi, nadyan datan kawistara nanging saged karaos.
Milanipun kasucenipun Pangeran makaten tumuli boten kenging dipun wedharaken kalawan gampil-gampilan, liripun saben tiyang dipun jarwani kanti tanpa digagari srana tuwin lampah-lampahipun kagem nyumurupi. Dados ngelmu ingkang dipun wulangaken punika, nadyan ta kagem sinten kemawon kenging nanging kedah wicaksana, kedah ngagem tatarane pamulangan..
Mila makaten, awit manawi kawedharaken dhateng sinten kemawon, wahananipun saged damel mirise ati tuwin ingkang kados makaten punika sayektinipun mbebayani tuwin mracihnani manawi dereng gambuh temenan marang ghoibing Pengeran. Dados kedhah ngemuti sakehing wewaler ingkang dados sengkerane ngelmu murih mboten nalisir. "
Resi Drona lumampah nyaketi Prabu Puntadewa, jroning bathin ngudara rasa nyeyuwun marang panguwasane Pangeran muga-muga siswane isih ana sing resik lahir lan batine. Ora melik anggendhong lali marang pepaes donya kang amung sakgebyaring kilat, nuli paring pangandhika :
Drona : " hu lole-lole....., kulup Puntadewa, sing gugur sapa ngger, apa adhimu si Suwatama ?."
Puntadewa : " Bapa, ingkang pejah sanes Bambang Suwatama, ananging Gajah Hestitama titihane prabu Prameya saking nagari Malawa."
cumeplong rasa ati kaya siniram banyu wayu sewindu, Sang pujangganing perang Resi Druna sejatosipun sampun nyumurupi bilih Haswatama boten saged pejah sabab putra Bathara Wrahaspati tuwin Dewi Wilutama. Rumaos marem atine awit boten ical piwulange, tumuli upetan wonten gegumuk satata manunggal marang Hyang Sukma. Kang dangu maspadakaken saking wingking Senopati Agung Pandawa (Drustajumena) kebat kilat anyidra gesange Resi Drona kanthi anigas pancing Janggane Resi Drona, mustaka kinarya tendhang-tendhangan.
Wasana manawi wonten ukara ingkang boten mranani dhiri kula nyuwun agunging pangaksami.
Catetan :
Bab filosofi Resi Drona wonten Serat Sekar Jinarwi dening Sri Harto Jati
Puntadewa inggih Guna talikrama pinter ginakaken basa supados boten goroh manawi nyingitaken (nylametaken) bab ingkang winadi, semanten ugi ing padinan.
Drona lambang nafsu pethak plawanganipun irung,
Arjuna ugi Kresna lambang netra saged kapusan.
Werkudara ing lakon punika lambang talingan (sang amarah) gampil kapusan.
Ewadene puntadewa lambang pangambu awrat sanget saged kapusan milanipun ingon-ingon sona (sona/segawon punika pangambunipun boten gampil dipun apusi.
Duk lagya wijine wiji sejatosipun caritane sampun rampung, terangipun sakderengipun puntadewa dipun cipta sejatosipun kodrate (lelampahanipun sampun kaserat) sampun wonten. Milanipun boten wantun goroh sabab saucapanipun tartamtu saged nemahi dados kasunyatan
Kang lampah goroh ing tembe wingkingipun sak boten-boten asor drajate (dados drajat sudra) upami nalendra boten badhe ageng negaranipun saged ugi lebur kados negara Dwarawati. Eman sanget menawi ngantos dumugi jaman kamuksan tuna boten sampurna.
Saking : Serat Kamiyana dening Ikwan Aji Nugraha Jati Mulur Sukoharjo.