BECIK KETITIH ALA KETARA SINANDHANG SADENGAH JALMA
(Serat Sekar Jinarwi dening Sri Harto Jati)
Anggrahita prabu Sri Bhatara Kresna dupi menggalih gelaring prang Hastina pura Katon ngeman kawula alit kang minangka jejering prajurit, luwung ngorbanaken Senopatine prang.
Langkung-langkung ngengeti para Pendawa kagungan kersa males ukum dhateng para kurawa, samsaya Katon ngeglo lampahe barising Kurawa jejeg payunge ngrungkepi pranataneng perang boten mlenceng saking adeg-adeg ing kautaman.
Wiwit Sang Mahatma Bhisma amung sajuga bisa ngludesake prajurit hupalawiya Patang haksaini, semanten ugi resi Druna anggelar cakrabyuha narayani Dwarawati datan bisa diasorake lamun Dudu trah Dwarawati si Abimanyu, Nata Angga bisa muja raseksa mawi aji kalakupa semanten ugi Prabu salya kanthi aji condra Birawa, semanten ugi Patih Sangkuni anganthi rong puluh kurawa datan butuhake prajurit alit.
Gantya ingkang madeg suraning driya Prabu Duryudana perang tandhing lawan Werkudara datan mawi prajurit.
Gada ginada Raden Werkudara kesesering yuda soring adilaga, prayitna Sri Bathara Kersa paring Sasmita wewadi pengapesane Duryudana kapupuh gada pupune kereng tatkala rebah depani lemah. Sorah ambata rubuh para Pandawa lali manawa nerak pranatane perang karana mupuh pupu.
Makaten pangandikane Sri Bathara Kresna : "Pranatan perang sing gawe Resi Bhisma, gandheng wis ora ana sulihe taksalirani pribadi mangsa ana kang wani ngarani licik sabab ingsun titise Sang Hyang Suman kang gelar Bathara ya utusane jagad"
Purnane Bharatayuda Jaya Binangun ingkang minulyeng jagad Sri Prabu Bhatara Kresna kepareng murugi ingkang rayi Prabu Suyudana kang ngathang-ngatang wonten tengahing tegal Kurusetra. Wancine tengah ratri ewa semanten datan kepireng sambate, dupi ningali rawuhe ingkang raka Sri prabu Bathara Kresna, prabu Duryudana sumringah cahyane datan ketingal ulat pasemon runtik amung padhang datan ngemu sungkawa, makaten pangandikanipun :
Duryudana : "Wilujeng rawuhipun kaka prabu Sri Bathara Kresna, bebanthenge manungsa ing ngarcapada kang sembada mangreh pribadinipun."
Kresna : "Wilujeng yayi, mugi yayi tinemu ing karaharjan."
Duryudana : "Kaka Prabu ingkang Ber sarta limpad ing budi, tetep ing pangandika susila tuwin santosa penggalihipun, utawi sekalangkung sekti kesdu nuweni Duryudana kang pengawak candala budi nistha gelah-gelah ing jagad."
Kresna : "Aduh yayi pun kakang kamiwelasen kepingin ngusadani tatune si adhi, kaping pindhone pun kakang nyuwun piterang menggah punapa sababe duk ramene bharatayuda si Haswatama kasingitaken dening Resi Durna, selajengipun kakendhangaken wonten ing wana datan dikeparengaken tumut bharatayuda dening yayi Prabu?"
Suyudana : "Kaka Prabu boten sisah repot-repot ngusadani kang rayi, menggah katerangan kula makaten. Kauningana Haswatama punika bangsane Dewa putra Bathara Wrahaspati tuwin Bethari Wilutama, tuwuh ngunjuk amerta kalis saking bebaya sakit tuwin pati. Kasinungan Cundamanik gegamane bathara Guru anedahaken bilih Haswatama punika titisane Sang Hyang Lodramurti, boten ngantos setengah dinten Bharatayuda saged dirampungi dening Haswatama.
Kurawa punika jamaking manungsa ngluhuraken drajate Bangsa boten pengin kasisipan sabyantune Dewa, murni budi dayane Kurawa. Kaule Brahmana Bharatayuda papan kanggo nglunasi utang, beja tinagih ing donya sengsara yen tinaggih ing delahan. Pepundhen kurawa sampun nglunasi sesambetan tumuli wangsul ing tepet suci."
Kresna : "Yekti pratitis yayi, nanging atiku mandelong wiwit yayi prabu nyebut bebanthenge manungsa marang pun kakang, iya bener. Mungguh kang aran manungsa karepe ngarani titah kang asor sabab durung oleh sebutan Satriya utawa Brahmana. Bebantheng tegese pengarep pengandel-andel, bisa mangreh pribadine nandakake wong kang nandangake panggawe namung miturut karepe balaka, tegese ora nganggo linawanan utawa pinandhangake dening pikir kang resik amung nggugu akale kinarya rewang sing penting klakon dhisik urusan buri. Panggawe kang kaya iku kalebu lumrah dilakoni dening wong akeh, malah uga karepe mau diendhel-endhelake wong akeh ora minggatekake rasa rumangsane kang ngerti.
Duk ramene Bharatayuda tandang utawa sarana kang pada dadi gegamaning penggawe kacidran utawa kadurjanan mulane kasebut LIMPAD ING BUDI, tegese kang pinter sakehing rekadaya bab apa wae kang bisa dadi sarana nandukake kekarepan lumebu sajrone ati kang kalebu gelar Kamandaka (apus-apus lan maling).
Tembung TETEP ING PANGANDIKA tegese apa barang wicara kudu nglungguhi bebener perlu kanggo wong kang tinuju ing gelar mau nganti klakon duwe kapercayan, luwih mantep percayane diwuwuhi gelar BATHARA (utusane jagad).
Mungguh kasusilan tumraping kacidran iku gegaman kang luwih ampuh amarga bisa amilut marang lunturing sih tuwin tresna, sinangkan saka manise wicara kang bisa anuju prana. Bab kasantosan tegese pangumpete kacidran tuwin kadurjanan aja nganti kaprojol ing wicara.
Kasantosan mau kudu ambutekake katemenan sarana SUPATA, supaya bisa muwuhi kapracayane kang tinuju isa uga embel-embel sastra kang dianggep suci (Jitapsara). Iya abon-aboning gelar pangapus krama kaya kang kasebut mau, jalari kasembadan unggul ing Bharatayuda binasakake kang luwih sekti. Aduh yayi keronto-ronto rasane pun kakang besuke saurku apa ? Jer wong nandhur mesthi ngunduh (HUKUM KARMA)."
Duryudana : "Kaka Prabu, kula aturi emut ingkang damel lelampahan punika Kang Maha Kawasa sanes manungsa, sedaya sadrema nglakoni. Mangga kula dherekaken ngagunggungken panalangsa marang Kawasa."
