KUMPULAN SEKAR MACAPAT
WIJAYAKUSUMA
(Sekar macapat asmarandana tripada)
Sri kawuryan puspitadi
Aran Wijayakusuma
Arum angambar gandane
Sumebar ngèbeki kasa
Sumusup jroning grana
Nuwuh sengsem jroning kalbu
Mbebangkit rasa asmara
Puspita kang edipeni
Sekar pepundhen sri Kresna
Dadya aji piyandele
Wong lena bali yuwana
Roga bali waluya
Srana margining rahayu
Mangkana ujaring kandha
Tumrapwang puspitaneki
Srana sengseming wardaya
Krana endahing wujude
Minangka yasaning Suksma
Rerenggan janaloka
Mekare ing tengah dalu
Wahya wong kepati nendra
SEKAR MACAPAT ASMARADANA SANGU LELADI
1. Kasmaran purwaning tulis
Katur para kadang mitra
Ingkang sami nunggil raos
Sarta nunggil gegayuhan
Ngudi lestarinira
Hamarsudi budi luhur
Adat budaya wong Jawa
2. Sumangga sami leladi
Kang piguna mring Bebrayan
Kang tumuju Karahayon
Dana ngelmu kang piguna
Minterke kadang mitra
Hakarya sengseming kalbu
Nyedulur sesamanira
3. Weh panglipur ingkang kingkin
(susah /sedih)
Weh pepiling kang kalepyan (lali)
Ingkang kleru tumindake
Sabyantu kang kekirangan
Sung usadha kang lara
Ngajeni kang pernah sepuh
Hangrengkuh ingkang taruna
4. Prayogi pra kadang sami
Sumangga dadya wong Jawa
Jawa lahir trus batine
Tan nilar tata lan cara
Adat budaya Jawa
Seni kabudayan luhur
Den udi murih ngrembaka
5. Den agungna pangaksami
Sadaya lepat kawula
Anggen kula hanyalemong
Trapsilaning tata basa
Kang kirang nuju prana
Santhi Santhi Hamemayu
Rahayuning Nusa Bangsa
SEKAR MACAPAT ASMARADANA MAHARGYA RAWUHIPUN WULAN SUCI RAMADHAN
(Pangripta : Ki Djoko Suwarsono Ki Darmo Tanoyo)
1. Hanyebut Asma illahi
Kang wus paring kanugrahan
Bagas saras pra umate
Ugi paring kanugrahan
Rejeki lan Panjang Yuswa
Sumangga Hamuji Sukur
Mring Allah pangwasa Jagad
2. Sugeng Rawuh Wulan Suci
Wulan Agung umat Islam
Kebak Berkah lan Rahmade
Tumuruning Wahyu Allah
Sinerat jro Alqur'an
Lumantar Nabi panutup
Njeng Muhammad Rasulullah
3. Sagung umat Islam Sami
Wajib nindakken puasa
Rukun Islam ping tigane
Nora kena tininggala
Wajib kukum ibadah
Tindakna kanthi tuwajuh
Mrih lebur sakehing dosa
4. Kejawi puwasa wajib
Shalat gangsal wektu uga
Mangga sami den tindakke
Lawan ugi Maos Qur'an
Den werdeni tegesira
Kanthi Tulus trusing Kalbu
Mrih Katekan kang Sinedya
SEKAR MACAPAT ASMARADANA MAHARGYA WULAN SUCI RAMADHAN
SEKAR MACAPAT ASMARADANA
(Pangripta : Moch Alfaris Suroningrat)
1. Muji sukur mring Ilahi
Kang Wus paring kanugrahan
Para titah sedayane
Paring bagas kesarasan
Ginanjar panjang yuswa
Pinanggih ing wulan Agung
Ing sasi Suci RAMADHAN
2.Sumangga pra kadang sami
Siyaga hamepes rasa
Kanthi weninging pangraos
Hameper napsu lan Hawa
Nglenggana kalepatan
Sruning kalbu Hanenuwun
Mrih Allah paring ngapura
3. Bismillah kita miwiti
Nindakken Dhawuhing Allah
Ibadah pasa rukune
Islam ingkang kaping tiga
Kang wajib den tindakna
Ngluhurken Asma Hyang Agung
Shalat tarweh sesarengan
4 . Maos Qur'an den lampahi
Wahyu illahi Sanyata
Nuntun sadaya umate
Tumuju gesang kang mulya
Rahayu tebih panggoda
Kinabulan kang den suwun
Kasembadan kang sinedya
5 . Wusana sugeng ngayahi
Pasa wajib rukun Islam
Tulus lahir lan Batine
Manut parentahing Allah
Lantaran njeng Muhammad
Yoiku Nabi Panutup
Rasul kekasihing Allah
SEKAR MACAPAT SINOM MAHARGYA ARIYADI IDUL FITRI
Puji Sukur mring Hyang Suksma
Kang Maha Murah lan Asih
Dumateng sagung pra titah
Hangganjar paring rejeki
Bagas waras Basuki
Ingayoman ing Hyang Agung
Kabul panuwun kita
Nindakken dhawuh Illahi
Ibadah puasa ing wulan RAMADHAN
Purna jejibahan kita
Netepi darmaning Wajib
Rukun islam kaping tiga
Tanpa rubeda sawiji
Dumawah Nugraha Gusti
Kagem pra titah Sawegung
Dinten Agung wus prapta
ARIYADI IDUL FITRI
Linebura sakeh Dosaning Pra Umat
Pramila sagung pra kadang
Kita sami mawas diri
Sami samad sinamadan
Ywa rebut unggul pribadi
Rebut balung tanpa isi
Elinga yen sami sepuh
Marsudi kautaman
Kanthi rukun mring sesami
Asah Asih netepi Darmaning Gesang
Ngapura lan ingapura
Yeku pakarti utami
Mangga hamulat salira
Ywa ngrasa bener pribadi
Kita titahing Gusti
Tan kendat lali lan luput
Mumpung dinten prayoga
Haminta sih pangaksami
Dumateng pra sagung para sanak kadang
Rahayu sagung pra kadang
Rahayu sagung dumadi
Rahayu satindak lampah
Marsudi tentreming ati
Santi santi Hastuti
kinabulan ing panggayuh
Sagung lepat kawula
Paringana pangaksami
Mugya kita tebih Saking Sambekala
(Karacik dining : Ki Darmo Tanoyo)
SEKAR DHANDHANGGULA WUJUD
Wujud jåbå wujud kita iki,
Wujudé jêro wujuding kåcå,
Ananging dudu pangilèn,
Pangilon jroning kalbu,
Kang awujud kita pribadi,
Cumithak jroning ciptå,
Lêrêming pandulu,
Luwih Gedhe berkahira,
Lamun janmå kang wus jumbuh badan batin,
Sayekti binathara.
Saking : Sekar-sekat gondhil punika tilaranipun sang Dwija Rama Yukanan Purnomo (antawisipun warsa 1986)
SINAU MERDENI SEKAR MACAPAT DURMA PITUTUR
Prayogane kaki nini piyarsakna
Dhawuhing prawinasis
Den pada narima
Peparinge Hyang Suksma
Sing wigati nywun rejeki
Mili lir tirta
Sanadyan amung cilik
Kang wigati trus lumintu ajeg ana
Aywa tansah mangesthi
Gumrojog lir toya
Banjir Sa ambrah ambrah
Yen Sira tan bisa nglangi
Klelep ing toya
Satemah angemasi
kaki nini den bisa sira narima
Peparinge Hyang Widhi
Kanthi sukeng nala
Iku sasat Nugraha
Sanadyan amung setitik
Katampi klawan
Lila legaweng ati
Terjemahan Sekar Durma dalam Bahasa Indonesia :
Sebaiknya Wahai anak anakku baik yang laki laki dan yang wanita
dengarkan tutur kataku ini
kata para orang sesepuh jaman dahulu
Terimalah dengan rasa syukur
atas pemberian Hyang Maha kuasa
bahwa yang terpenting rejeki itu mengalir bagaikan air
walaupun kecil
Yang lebih penting setiap hari selalu ada
janganlah menghayal mendapat buuaanyak bagaikan jatuh dari langit Banjir karena hujan
jika kamu tidak bisa berenang (mengemudikan) kamu akan tenggelam dalam perbuatan nistha Sehingga kamu hidup dlm kesengsaraan
putra putriku terimalah semua pemberian dari Gusti yang maha welas dan asih
dengan cara sabar menerima pemberian dari Gusti Yang Maha Agung Walaupun hanya sedikit insya Allah
Hyang maha kuwasa akan memberi anugrah kepada kamu rejeki yang berlipat lipat
SINAU MERDENI SEKAR MACAPAT MASKUMAMBANG
Aneng donya Janma lahir mawa tangis
Kang iku prayoga
Nglakoni penggawe becik
Mati mati yen ngguyua
Mesthekake barang durung klakon kuwi
Ran ndisiki kersa
Sapa weruh tembe mburi
Amanoni Sambe kala
Aja nampik lamun ana wong anempil
Njejaluk swatara
Sapa weruh tembe mburi
Giliranmu sing mbutuhna
Becik sira ywa nembung njejaluk kaki (nini )
sabarang kang sira
Maune emoh menehi
Timbangane kawelehan
Samubarang kang sira dhewe ngemohi
Aywa paripaksa
Akon wong liya ngarepi
Dibisa tepa Salira
Arti tembang Maskumambang dalam bahasa Indonesia
Manusia lahir di dunia disertai dengan tangis (menangis)
maka dari itu marilah berbuat kebaikan
Jika kelak kita meninggal dunia , mati dalam keadakan tersenyum
Memastikan sesuatu yang belum terjadi
itu namanya mendahului kehendak Hyang Maha Kuasa
ingatlah dibelakang hari siapa tau kamu mendapat bencana
Jangan menolak jika ada seseorang yang meminta tolong dan meminta sekedarnya
siapa tau di belakang hari ganti kamu yang meminta dan membutuhkan pertolongan
Lebih baik kamu tidak meminta ya anakku (kaki /nini)
yang tadinya kamu tidak mau memberi
daripada kamu mendapat malu
Segala sesuatu yang tadinya kamu tidak mau ( kau hendaki )
janganlah kamu memaksa orang lain menuruti kemauanmu (kehendakmu)
Setidak tidaknya kamu harus tau diri
SEKAR MACAPAT SINOM
Gegambaran PANGGIHIPUN
ULAH NGELMI KALIYAN ULAH KAPRAJAN
Pangripta : Ki Nayantaka Darmo Suwito
1.Yen Kawula Sampun Wignya
Terampil Ngupaya Kasil
Mbedhag Buruh Candak Kulak
Tan Kewran Patraping Kardi
Saking Sugih Pangerti
Nora Kodeng Datan Kidhung
Gampange Ngupaya Boga
Numusi Dateng Negari
Pamupune Pajeg Uga Dadi Gampang
2.Nging Patrape Para Janma
Kang Nyingkur Pangulah Batin
Patrape Ngalap Kadonyan
Adakan Lacut Ngliwati
Marang Tataning Adil
Mung Waton Ugere Purun
Tan Ngetang Bener Lan Lepat
Janji Karep Den Lakoni
Gampang Wae Nerak Adil Hukum Kodrad
3.Malah Yen Ngoyak Derajat
Datan Wirang Ngalap Kasil.
Marang Rowang Mitranira
Kinarya Banten Piranti
Mung Dirine Pribadi
Kang Inunggung Cakep Cukup.
Mumpuni Mring Prakaryan.
Pamrih Supaya Antuk Sih
Saking Lurah Nuli Den Inggahken Pangkat
4.Nadyan Kang Wis Luhur Mulya
Ngregem Pusaraning Nagri
Yen Sengseme Mring Kadonyan
Tilar Katentreman Batin
Saya Ambe Bayani
Dateng Katentreman ipun
Praja Tetangganira
Kudu Arsa Den Kakahi
Dinadekken Tegal Sawah Tetelukan
5.Hardane Saya Andodra
Jagat Arsa Den Emperi
Kinarya Jajahanira
Aywa Ana Kang Madani
Sing Awani Malangi
Kudu Ginecak Prang Pupuh
Saya Jinarah Rayah
Bandhane Dipun Kukupi
Tanpa Welas Pepati Kang Tanpa Dosa
6.Kaduk Ing Tyas Ambelasar
Yen Kacuwan Muring Muring
Wus Koncatan Rasa Mulya
Kang Ngayemi Sanubari
Malah Agung Mijeni
Ruhanare Jagad Agung
Nanging Lakuning Janma
Kang Sengsem Ulah Lelungid
Lamun Sugih Malah Agung Dananira
7.Mring Janma Kang Kawlas Arsa
Wit Punika Nama Wajib
Tumrap Ulah Kabatinan
Jer Dununging Rasa Adi
Tan Kawengku Ing Lahir
Nging Dumunung Lenging Kalbu
Tan Butuh Sineksenan
Marang Sesamining Janmi
Nging Wus Luluh Lan Gelenging Laksitarya
