Sekar Sinom Pethikanipun saking Serat Candrarini
(Nyariyosaken kulawarga Trah Mandura Putra Prabu Basudewa,
Bratajaya cinandra, lumantar sinom gangsal pada)
ꦱꦼꦏꦂꦱꦶꦤꦺꦴꦩ꧀ꦥꦼꦛꦶꦏꦤꦶꦥꦸꦤ꧀ꦱꦏꦶꦁꦱꦼꦫꦠ꧀ꦕꦤ꧀ꦝꦿꦫꦶꦤꦶ
꧋(ꦚꦫꦶꦪꦺꦴꦱꦏꦺꦤ꧀ꦏꦸꦭꦮꦂꦒꦠꦿꦃꦩꦤ꧀ꦝꦸꦫꦥꦸꦠꦿꦥꦿꦧꦸꦧꦱꦸꦣꦺꦮ꧈
ꦧꦿꦠꦗꦪꦕꦶꦤꦤ꧀ꦝꦿ꧈ꦭꦸꦩꦤ꧀ꦠꦂꦱꦶꦤꦺꦴꦩ꧀ꦒꦁꦱꦭ꧀ꦥꦣ)
.jpg "Sekar Sinom Pethikanipun saking Serat Candrarini (Nyariyosaken kulawarga Trah Mandura Putra Prabu Basudewa, Bratajaya cinandra, lumantar sinom gangsal pada) ꦱꦼꦏꦂꦱꦶꦤꦺꦴꦩ꧀ꦥꦼꦛꦶꦏꦤꦶꦥꦸꦤ꧀ꦱꦏꦶꦁꦱꦼꦫꦠ꧀ꦕꦤ꧀ꦝꦿꦫꦶꦤꦶ ꧋(ꦚꦫꦶꦪꦺꦴꦱꦏꦺꦤ꧀ꦏꦸꦭꦮꦂꦒꦠꦿꦃꦩꦤ꧀ꦝꦸꦫꦥꦸꦠꦿꦥꦿꦧꦸꦧꦱꦸꦣꦺꦮ꧈ ꦧꦿꦠꦗꦪꦕꦶꦤꦤ꧀ꦝꦿ꧈ꦭꦸꦩꦤ꧀ꦠꦂꦱꦶꦤꦺꦴꦩ꧀ꦒꦁꦱꦭ꧀ꦥꦣ)") |
| Dewi wara sembadra ꦣꦺꦮꦶꦮꦫꦱꦼꦩ꧀ꦧꦣꦿ |
Den kadi duk jaman purwa / garwanta Sang Pandhusiwi / kang kocap layang wiwaha / lêlima ayu linuwih / tiga putraning aji / kang kalih atmajeng wiku / pantês dadya tuladha / estri kang kanggep ing krami / winursita dyah lima candraning warna//
꧋ꦣꦺꦤ꧀ꦏꦣꦶꦣꦸꦏ꧀ꦗꦩꦤ꧀ꦥꦸꦂꦮ/ꦒꦂꦮꦤ꧀ꦠꦱꦁꦥꦤ꧀ꦝꦸꦱꦶꦮꦶ/ꦏꦁꦏꦺꦴꦕꦥ꧀ꦭꦪꦁꦮꦶꦮꦲ/ꦊꦭꦶꦩꦄꦪꦸꦭꦶꦤꦸꦮꦶꦃ/ꦠꦶꦒꦥꦸꦠꦿꦤꦶꦁꦄꦗꦶ/ꦏꦁꦏꦭꦶꦃꦄꦠ꧀ꦩꦗꦺꦁꦮꦶꦏꦸ/ꦥꦤ꧀ꦠꦼꦱ꧀ꦝꦣꦾꦠꦸꦭꦣ/ꦄꦼꦱ꧀ꦠꦿꦶꦏꦁꦏꦁꦒꦺꦥ꧀ꦆꦁꦏꦿꦩꦶ/ꦮꦶꦤꦸꦂꦱꦶꦠꦣꦾꦃꦭꦶꦩꦕꦤ꧀ꦝꦿꦤꦶꦁꦮꦂꦤ//
Kang sepuh Wara Sembadra / saking Mandura nagari / atmaja Sri Basudewa / ing warna ngrêsêpkên ati / sumeh kang netra lindri / pasaja ing driya tangguh / sêmu kurang budaya / awijang dedeg rêspati / kuning wênês labate amung kêpama//
꧋ꦏꦁꦱꦼꦥꦸꦃꦮꦫꦱꦼꦩ꧀ꦧꦣꦿ/ꦱꦏꦶꦁꦩꦤ꧀ꦝꦸꦫꦤꦒꦫꦶ/ꦄꦠ꧀ꦩꦗꦱꦿꦶꦧꦱꦸꦣꦺꦮ/ꦆꦁꦮꦂꦤꦔꦿꦼꦱꦼꦥ꧀ꦏꦼꦤ꧀ꦄꦠꦶ/ꦱꦸꦩꦺꦃꦏꦁꦤꦼꦠꦿꦭꦶꦤ꧀ꦝꦿꦶ/ꦥꦱꦗꦆꦁꦣꦿꦶꦪꦠꦁꦒꦸꦃ/ꦱꦼꦩꦸꦏꦸꦫꦁꦧꦸꦣꦪ/ꦄꦮꦶꦗꦁꦣꦼꦣꦼꦒ꧀ꦉꦱ꧀ꦥꦠꦶ/ꦏꦸꦤꦶꦁꦮꦼꦤꦼꦱ꧀ꦭꦧꦠꦺꦄꦩꦸꦁꦏꦼꦥꦩ//
Tan pati ngadi busana / mangu kadung yen lumaris / jatmika arang ngandika / tan rêgu sêmune manis / ririh tanduking angling / lumuh ing wicara sêndhu / amot mêngku aksama / tuhune pribadi pinrih / sêtyeng priya datan lênggana sakarsa//
꧋ꦠꦤ꧀ꦥꦠꦶꦔꦣꦶꦧꦸꦱꦤ/ꦩꦔꦸꦏꦣꦸꦁꦪꦺꦤ꧀ꦭꦸꦩꦫꦶꦱ꧀/ꦗꦠ꧀ꦩꦶꦏꦄꦫꦁꦔꦤ꧀ꦝꦶꦏ/ꦠꦤ꧀ꦉꦒꦸꦱꦼꦩꦸꦤꦺꦩꦤꦶꦱ꧀/ꦫꦶꦫꦶꦃꦠꦤ꧀ꦝꦸꦏꦶꦁꦄꦁꦭꦶꦁ/ꦭꦸꦩꦸꦃꦆꦁꦮꦶꦕꦫꦱꦼꦤ꧀ꦝꦸ/ꦄꦩꦺꦴꦠ꧀ꦩꦼꦁꦏꦸꦄꦏ꧀ꦱꦩ/ꦠꦸꦲꦸꦤꦺꦥꦿꦶꦧꦣꦶꦥꦶꦤꦿꦶꦃ/ꦱꦼꦠꦾꦼꦁꦥꦿꦶꦪꦣꦠꦤ꧀ꦊꦁꦒꦤꦱꦏꦂꦱ//
Mring maru kadi sudara / rumêsêp tan walang ati / sanadyan kurang budaya / lêgawa anrus ing batin / winowong widadari / labêt kadang ira Wisnu / marma Sang Dananjaya / pamêngkune sêmu ering / maru nira anggêpe sami nyuwita//
꧋ꦩꦿꦶꦁꦩꦫꦸꦏꦣꦶꦱꦸꦣꦫ/ꦫꦸꦩꦼꦱꦼꦥ꧀ꦠꦤ꧀ꦮꦭꦁꦄꦠꦶ/ꦱꦤꦣꦾꦤ꧀ꦏꦸꦫꦁꦧꦸꦣꦪ/ꦊꦒꦮꦄꦤꦿꦸꦱ꧀ꦆꦁꦧꦠꦶꦤ꧀/ꦮꦶꦤꦺꦴꦮꦺꦴꦁꦮꦶꦣꦝꦫꦶ/ꦭꦧꦼꦠ꧀ꦏꦣꦁꦆꦫꦮꦶꦱ꧀ꦤꦸ/ꦩꦂꦩꦱꦁꦣꦤꦚ꧀ꦗꦪ/ꦥꦩꦼꦁꦏꦸꦤꦺꦱꦼꦩꦸꦄꦼꦫꦶꦁ/ꦩꦫꦸꦤꦶꦫꦄꦁꦒꦼꦥꦼꦱꦩꦶꦚꦸꦮꦶꦠ//
Myang raka Sri Baladewa / miwah Prabu Harimurti / kalangkung ing tresna nira / marang Dyah Banoncinawi / kadang estri satunggil / kapisah panggenanipun / mila tansah anduta / wau Sang narendra kalih / tanya warta mring Sang Rêtna Madubrangta//
꧋ꦩꦾꦁꦫꦏꦱꦿꦶꦧꦭꦣꦺꦮ/ꦩꦶꦮꦃꦥꦿꦧꦸꦲꦫꦶꦩꦸꦂꦠꦶ/ꦏꦭꦁꦏꦸꦁꦆꦁꦠꦿꦼꦱ꧀ꦤꦤꦶꦫ/ꦩꦫꦁꦣꦾꦃꦧꦤꦺꦴꦚ꧀ꦕꦶꦤꦮꦶ/ꦏꦣꦁꦄꦼꦱ꧀ꦠꦿꦶꦱꦠꦸꦁꦒꦶꦭ꧀/ꦏꦥꦶꦱꦃꦥꦁꦒꦺꦤꦤꦶꦥꦸꦤ꧀/ꦩꦶꦭꦠꦤ꧀ꦱꦃꦄꦤ꧀ꦝꦸꦠ/ꦮꦻꦴꦱꦁꦤꦫꦺꦤ꧀ꦝꦿꦏꦭꦶꦃ/ꦠꦚꦮꦂꦠꦩꦿꦶꦁꦱꦁꦉꦠ꧀ꦤꦩꦣꦸꦧꦿꦁꦠ//
Wara Sembadra
ꦮꦫꦱꦼꦩ꧀ꦧꦣꦿ
Semribit lampahe Sang Hyang Maruta
Anelasak ririh ing taman madukara
Anerabas alus angusap pasuryan
Risang dyah ayu Dewi Wara Sembadra
Nyungging esem kaduga rena ing parasnya
Anjurung sedya mring karsa keng garwa
ꦱꦼꦩꦿꦶꦧꦶꦠ꧀ꦭꦩ꧀ꦥꦲꦺꦱꦁꦲꦾꦁꦩꦫꦸꦠ
ꦄꦤꦺꦭꦱꦏ꧀ꦫꦶꦫꦶꦃꦆꦁꦠꦩꦤ꧀ꦩꦣꦸꦏꦫ
ꦄꦤꦺꦫꦧꦱ꧀ꦄꦭꦸꦱ꧀ꦄꦔꦸꦱꦥ꧀ꦥꦱꦸꦂꦪꦤ꧀
ꦫꦶꦱꦁꦣꦾꦃꦄꦪꦸꦣꦺꦮꦶꦮꦫꦱꦼꦩ꧀ꦧꦣꦿ
ꦚꦸꦁꦒꦶꦁꦄꦼꦱꦼꦩ꧀ꦏꦣꦸꦒꦉꦤꦆꦁꦥꦫꦱ꧀ꦚ
ꦄꦚ꧀ꦗꦸꦫꦸꦁꦱꦼꦣꦾꦩꦿꦶꦁꦏꦂꦱꦏꦺꦁꦒꦂꦮ
Ohh sembadra ....
Jembar samodraning sih
Risang janaka apratela arsa palakrami
Mring tetunggul pancala radya kang nagri
Putri Gondowati asesilih Dewi Srikandi
Tuhu mustikane pawestri, aparing palilah mring salakine reki
ꦎꦃꦲ꧀ꦱꦼꦩ꧀ꦧꦣꦿ꧉꧉꧉꧉
ꦗꦼꦩ꧀ꦧꦂꦱꦩꦺꦴꦣꦿꦤꦶꦁꦱꦶꦃ
ꦫꦶꦱꦁꦗꦤꦏꦄꦥꦿꦠꦺꦭꦄꦂꦱꦥꦭꦏꦿꦩꦶ
ꦩꦿꦶꦁꦠꦼꦠꦸꦁꦒꦸꦭ꧀ꦥꦚ꧀ꦕꦭꦫꦣꦾꦏꦁꦤꦒꦿꦶ
ꦥꦸꦠꦿꦶꦒꦺꦴꦤ꧀ꦝꦺꦴꦮꦠꦶꦄꦱꦺꦱꦶꦭꦶꦃꦣꦺꦮꦶꦱꦿꦶꦏꦤ꧀ꦝꦶ
꧋ꦠꦸꦲꦸꦩꦸꦱ꧀ꦠꦶꦏꦤꦺꦥꦮꦺꦱ꧀ꦠꦿꦶ꧈ꦄꦥꦫꦶꦁꦥꦭꦶꦭꦃꦩꦿꦶꦁꦱꦭꦏꦶꦤꦺꦉꦏꦶ
Sembadra sembadra...
Pancen sembada ..
Ayumu lahir trusing batin
ꦱꦼꦩ꧀ꦧꦣꦿꦱꦺꦩ꧀ꦧꦣꦿ꧉꧉꧉
ꦥꦚ꧀ꦕꦺꦤ꧀ꦱꦼꦩ꧀ꦧꦣ꧉꧉
ꦄꦪꦸꦩꦸꦭꦲꦶꦂꦠꦿꦸꦱꦶꦁꦧꦠꦶꦤ꧀
Imajier Nuswantoro
ꦆꦩꦗꦶꦤꦺꦂꦤꦸꦱ꧀ꦮꦤ꧀ꦠꦺꦴꦫꦺꦴ
