BAYU PITU LAN SEDULUR SAK-UWATE ANOMAN
(Laire Anoman)
꧋ꦧꦪꦸꦥꦶꦠꦸꦭꦤ꧀ꦱꦼꦣꦸꦭꦸꦂꦱꦏ꧀ꦈꦮꦠꦺꦄꦤꦺꦴꦩꦤ꧀
(ꦭꦻꦫꦺꦄꦤꦺꦴꦩꦤ꧀)
Gembong Swelagiri, Romo ndoyopati, Senggana, Guru Putra, Mayangkara ya Anoman
꧋ꦒꦺꦩ꧀ꦧꦺꦴꦁꦱ꧀ꦮꦼꦭꦒꦶꦫꦶ꧈ꦫꦺꦴꦩꦺꦴꦤ꧀ꦝꦺꦴꦪꦺꦴꦥꦠꦶ꧈ꦱꦼꦁꦒꦤ꧈ꦒꦸꦫꦸꦥꦸꦠꦿ꧈ꦩꦪꦁꦏꦫꦪꦄꦤꦺꦴꦩꦤ꧀
.png "BAYU PITU LAN SEDULUR SAK-UWATE ANOMAN (Laire Anoman) ꧋ꦧꦪꦸꦥꦶꦠꦸꦭꦤ꧀ꦱꦼꦣꦸꦭꦸꦂꦱꦏ꧀ꦈꦮꦠꦺꦄꦤꦺꦴꦩꦤ꧀ (ꦭꦻꦫꦺꦄꦤꦺꦴꦩꦤ꧀) Gembong Swelagiri, Romo ndoyopati, Senggana, Guru Putra, Mayangkara ya Anoman ꧋ꦒꦺꦩ꧀ꦧꦺꦴꦁꦱ꧀ꦮꦼꦭꦒꦶꦫꦶ꧈ꦫꦺꦴꦩꦺꦴꦤ꧀ꦝꦺꦴꦪꦺꦴꦥꦠꦶ꧈ꦱꦼꦁꦒꦤ꧈ꦒꦸꦫꦸꦥꦸꦠꦿ꧈ꦩꦪꦁꦏꦫꦪꦄꦤꦺꦴꦩꦤ꧀")
Carita lan lampahan pedhalangan babagan laire Anoman ora mung tinêmu sawiji, senajan ana prabèdan lampahan uga paraga, nanging wosing padha :
- Anoman linairake dening Dewi Anjani.
- Anoman putrané Bathara Guru.
- Anoman digulawenthah dening Bathara Bayu.
Banjur kepriye carita babagan LAIRE ANOMAN
WAHYU BAYU PITU
Caritå kapurwakanan ing kadhaton Alengka.
Prabu Dasamuka kahadhep Raden Kumbakarna, Raden Gunawan Wibisana, lan Patih Prahastha.
Ingkang karêmbang Sang Prabu tinangisan Raden Indrajit kang nyuwun dipadosake kadang nunggal Rama.
Kajaba kuwi uga karembag wisik kang katampi lamun arep tumurun wahyu kakuwatan pitu cacahe, sinebut Wahyu Bayu Pitu.
Pramila rampung ing pasewakan, Prabu Dasamuka banjur mesat anggegana munggah ngantariksa arsa nggayuh tumurune wahyu.
Bathara Bayu ing Kahyangan Panglawung, kang uga winastanan Harga Maruta, kahadhep siswa pitu :
- Liman Setubanda,
- Macan Palguna,
- Någå Kanetra,
- Bulus Panengrat,
- Butå Seta Bimamuka (Bismuka),
- Garudha Kagapati,
- Gunung Maenaka.
Para siswa kang wus pinajang kautaman banjur kadhawuhan tumurun mangarcapada ngupadi panitisan.
Para siswa tumuli budhal.
Ing madyané dirgantara Wahyu Bayu Pitu kapranggul kaliyan Prabu Dasamuka kang banjur dibebujuk arêp kaboyong mênyang Alêngka.
Prabu Dasamuka : "Héh Bayu Pitu, yèn sirå kêpingin ngrasakaké swargå donyå mukti wibåwå, gagé manutå marang ingsun kaboyong mênyang Ngalêngka."
Nanging para siswané Bathara Bayu sami suwala lan dadi pancabakah. Wahyu Bayu Pitu kaseser, Prabu Dasamuka kasil mikut Bayu Bimamuka (Bismuka) banjur digawa bali mênyang Alengka didadèkaké sêdulur nunggal ramane Indrajid uga andêl-andêling praja Alengka kawisuda minangka pujangga kraton kanthi pêparab Bêgawan Pulastya.
Prabu Dasamuka kang kêpingin darbé putra-putra sêkti mandraguna banjur andhawuhi Bêgawan Pulastya amrih bisa kalêksanan. Dèning Sang Begawan para garwané Prabu Dasamuka kapurih nyêpêng pêksi kang banjur sinidikara dadi jabang bayi lan diwènehi têtêngêr : Trisirah, Trinetra, Trikaya, Trimurda, Triwaneh, Yaksadewa, Narantaka, lan Dewantaka.
Nengna kang cinarita gentya kawuwusa swasana ing tlaga Madirda.
Saturut dhawuh pituduhé ingkang rama, sang Resi Gotama saka pêrtapan Grastina ing pèrèngané Arga Sukèndra, Dèwi Anjani banjur nglampahi tapa nyanthuka (canthuka : kodhok) ing tlaga Madirda dikanthi karo emban Swareh.
Ana sing nyebutake yen Dewi Anjani tapa matirta, kuwi kurang trep. Matirta ateges sêsuci mawi Tirta.
Bathara Guru ingkang saweg nganglang jagad mahawan gegana nitih Lêmbu Andini, dupi mirsani Dèwi Anjani lan emban Swareh kungkum ing satêpiné tlaga tanpa busana, sanadyan apasuryan wanara nanging bangkit anuwuhakên napsu asmarané Sang Bathara, satêmah korud kamané (kêwêtu kamané) kang banjur disèlèhaké ing godhong sinom.
Dèning Bathara Guru godhong sinom mau kakintiraké ing warih lan kanyut mênyang Dèwi Anjani kang banjur didhahar sêparo, wondéné sêparoné kaparingaké marang êmban Swarèh.
Ora antarané suwé wanodyå kêkalih banjur anggarbini. Kagyat tanpa kinara raosing manah amarga rumangsa ora naté cakêt lan gêpok sènggol karo priya, pêpunthoné kêkaroné banjur muja astawa muji astuti nyuwun pitêdahing Gusti Ingkang Murbèng Dumadi.
Sawêtara wêktu lumaku, Dèwi Anjani lan êmban Swareh karawuhan Bathårå Bayu.
Sawusé paring katêrangan jati dhiriné lan wanodyå kêkalih ngaturaké pangabêkti, Bathara Bayu ngandaraké lêlampahan kang sinandhang dening Dèwi Anjani lan êmban Swareh.
"Titah ulun nini Anjani lan Swareh. Kawruhana lamun ponang jabang bayi ing kandhutan kita, kuwi minangka kanugrahan saking Bathara Guru, putra-putra kita ing mêngko bakal dadi satriya utama."
Bathara Bayu banjur nyidikara ponang jabang bayi, katitik ing sajêroné salira wanodya kêkalih kadya lésus pinusus kaprabawan daya kaluwihan kang pinaringaké dèning Bathara Bayu.
Nalikå wis titi-wanciné, Dèwi Anjani nglairaké bayi awujud wanara seta kang pinaringan têtêngêr Radèn Sênggana, ya sinêbut Anoman. Wodèné êmban Swarèh nglairaké bayi awujud wanårå cêmêng kang pinaringan têtêngêr Kapi Swedha.
Bathara Bayu tumêdhak mênyang tlågå Madirdå anganthi sawêtara widadari sapêrlu asung pambiyantu, banjur ngêdusi jabang bayi kêkaro mawi "Toya Gege", satêmah ènggal diwåså.
Dèwi Anjani, êmban Swarèh, dalah Kapi Swedha banjur bali mênyang pêrtapan Grastina.
Samantara, Anoman kang kêpingin sowan pêpanggihan kalihan ingkang rama, banjur digåwå munggah mênyang Kahyangan Jonggring Saloka dèning Bathara Bayu.
Ing kahyangan Jonggring Saloka, Bathara Guru kahadhêp Bathåråy Naradha, Bathara Indra, Bathara Wisnu, Bathara Brama, lan para dewa liyané.
Ingkang karêmbag, nalikå Bathårå Guru nganglang jagad nitih Lêmbu Andini, nyumêrêpi kadhaton Purwarengga ing guwa Windu, gadhahané Prabu Wisakarma. Kahanan kuwi agawé kurang rênå panggalihé Sang Hyang Guru.
Lagi ècå wawan sabda, katungka sowané Bathara Bayu nganthi Radèn Anoman kang wosé nyuwun diakoni minangka putra dèning Bathara Guru.
Bathara Naradha sakala gumujêng banjur mêmoyoki déné Bathara Guru kagungan putra awujud wanara.
Bathara Narada : "Prêgênjong, prêgênjong, pak pak pong pak pak pong, waru dhoyong ditêgor uwong, wanara seta sapa sing yasa !
Oo.. pranyata Adhi Guru darbé putra awujud wanara seta !
Ya ta Anoman, raharja têkamu ing Jonggring Salaka !
Adhi Guru pancèn ramamu, nggèr !
Hehehe..."
Rumangsa lingsêm banjur Bathara Guru nguncalaké ron ilå-ilå (godhong waru) kang sanalika dadi wanara awêrni nilå nyambêr ilèn tumèmplèk anèng gigiré Bathara Naradha lan nyuwun diakoni putrå.
Bathara Guru : "Kakang Naradha ! Kanyatanipun kakang Naradha uga darbé putra wanara.
Prayoga ènggal dipunakèni mawon !"
Amarga ora bisa nguwalaké wanara kuwi banjur Bathara Naradha kersa ngakoni putrå lan pinaringan nåmå Jaya Anila.
Bathara Guru banjur uga ngakoni lamun Sang Senggana utawa Radèn Anoman minangka putrané.
Sawênèh dewa kang ngadhêp ugå mèsêm anggêguyu kadadèyan kuwi, pramilå kanggo ngaling-alingi råså lingsêm lan njangkêpi jêjêging adil, Bathårå Guru banjur andhawuhi para dewa kinon padha muja Wanara.
Para dewa ngèstokakên dhawuh. Bathårå Indrå mujå kapi Sêmpati, Bathårå Brahma muja kapi Anggeni, Bathara Yamadipati mujå kapi Menda, kapi Baliwisata, lan kapi Anala, satêmah cacahé atusan.
Banjur sêkabèhé kapi pujan kadhawuhan suwitå dhatêng Narpati Sgriwa ing Guwa Kiskendha kanthi dipangarsani dèning Anoman lan kapi Anila.
Sapungké para wanara, Bathara Guru andhawuhi para dewa kinon mbanjut Prabu Wisakarma.
Prabu Wisakarma kahadhep atmajané sêsilih Dèwi Sayempraba dalah patih Sendhanggarba. Ingkang karêmbag Dèwi Sayempraba wus ginarwa sêlir dèning Prabu Dasamuka, pramila nedya ambangun kadhaton kang luwih èndah manèh.
Katungka praptané para dewa, sawusé sulaya rêmbug, Prabu Wisakarma kabanjut dèning Bathara Yamadipati.
Déné kadhaton Purwarengga sinêblak maruta gung dèning Bathara Bayu, satêmah kari Sanggar Pamujan kang tinengga dening Dewi Sayempraba kang ora kabuncang angin.
Sinigeg kang cinarita gentya kawuwusa wosing gati.
Carita ing dhuwur kuwi lamun anèng pagêlaran ringgit purwå katêlah ing pèrangan lakon "Lairé Anoman", utawa "Anoman Takon Bapa", sanadyan benten Ki Dhalang uga bisa beda sanggit.
Sêratan cerita kuwi tinemu ora jangkep, nanging kang andudut kawigaten ya iku anane siswa saka Bathara Bayu kang cacahé pitu lan arupa "wahyu".
Samantara ana uga kang mratèlakaké lamun siswane Bathara Bayu kuwi banjur manitis (manjanma) :
▪︎ Liman Setubanda.
▪︎ Macan Palguna,
▪︎ Naga Kanetra, manitis marang Arya Bima (Wrekudara).
▪︎ Bulus Panengrat.
▪︎ Butå Sètå Bimamuka (Bismukå), manitis marang Wil Jajahwreka.
▪︎ Garudha Kagapati, manitis marang Anoman.
▪︎ Gunung Maenaka (Bêgawan Maenaka).
Dadi "Wahyu Bayu Pitu" kuwi kênå sinêbut "ruh", "daya", BEDA KARO KADANG BAYU, kang wus mawujud paraga wutuh.
Kang sinebut KADANG BAYU, ya iku :
1. Bathara Bayu.
2. Sang Dewa Ruci.
3. Anoman (Bayu Kinara).
4. Wrekodara (Bayu Mangkurat).
5. Wil Jajahwrêkå (Bayu Anras).
6. Liman Setubanda (Bayu Kanetra).
7. Sarpa Nagakuwera.
8. Garudha Mahambira.
9. Begawan Maenaka (Bayu Langgeng).
10. Macan Palguna.
Lamun ginagas, musthine :
- Liman Setubanda, manitis marang : Liman Setubanda (Bayu Kanetra).
▪︎ Macan Palguna, manitis marang : Macan Palguna.
▪︎ Gunung Maenaka manitis marang : Bêgawan Maénåkå.
Généyå, Naga Kanetra kog ora manitis marang Sarpa Nagakuwera, kang padha jinis sarpa ?
Utawa manitis marang Liman Setubanda, kang anduwèni sêbutan "Bayu Kanétra" Semana uga Garudha Kagapati, kog ora manitis marang Garudha Mahambira ?
Wangsulané :
▪︎ Kang kaaranan wahyu (daya) kuwi bisa manggon anèng êndi waé.
▪︎ Caritå ngênani babagan kuwi ora tinêmu wutuh jangkêp, bisa waé amung sanggité pujangga utawa Ki Dhalang kanthi njupuk paraga ringgit kang wis ana luwih dhisik.
▪︎ Bulus Panengrat uga ora tinêmu wujud paraga ringgité ing ratmaya.
SANGGIT KI DHALANG.
- Ki Catur Benyek Kuncoro.
Sawuse Anoman lair lan dibekta Bathara Bayu nedya digulawenthah, Dèwi Anjani kasowanan para sêdulur nunggal sak-uwate Anoman, kang awujud raseksa lan nyuwun dipariringi tetenger.
- Ari-ari, dadi raseksa awerni seta, ingaranan Ditya Pulasiya.
- Tali puser, dadi raseksa awerni seta, ingaranan Ditya Kala Pracandha Seta.
▪︎ Bungkus, dadi raseksa awerni langking, ingaranan Ditya Ramandayapati.
▪︎ Banyu kawah, dadi rasêksa awêrni pitå, ingaranan Ditya Anoman.
▪︎ Gêtih, dadi rasêksa awêrni rêktå, ingaranan Dityå Prabancana.
dadi rasêksa lima.
Sawusnya rampung sowan marang ingkang biyung, para kadang nunggal sak-uwaté Anoman kapranggul Prabu Dasamuka. Sulayané rêmbug dadi pancakara lan Dityå Pulasiya kapikut dèning Prabu Dasamuka banjur digåwå mênyang praja Alengka didadèkaké juru taman ing Asoka.
▪️Ki Manteb Sudarsono.
Dèwi Anjani kang mratåpå ijèn ing tlagå Madirda sawisé nglairaké Anoman sèda konduran.
Anoman ditêmokaké lan diupårå dèning yaksa pandhita pêparab Bêgawan Maruta kang sêjatiné panjanmané Bathara Bayu. Banjur pinaringan têtêngêr Radèn Senggana.
Tancêp Kayon :
Iti titining panyêrat tinêngêran Suryå Sêngkalan "Catur Panêmbah Hanyirna Sikara" ꧋ꦕꦠꦸꦂꦥꦤꦼꦩ꧀ꦧꦃꦲꦚꦶꦂꦤꦱꦶꦏꦫ꧉
Rahayu sagung dumadi.
Yoga Hart, Surabaya, Agust 2024.
 |
Aksara Jawanipun :
꧋ꦧꦪꦸꦥꦶꦠꦸꦭꦤ꧀ꦱꦼꦣꦸꦭꦸꦂꦱꦏ꧀ꦈꦮꦠꦺꦄꦤꦺꦴꦩꦤ꧀
(ꦭꦻꦫꦺꦄꦤꦺꦴꦩꦤ꧀)
꧋ꦥꦸꦠꦶꦃꦩꦼꦩ꧀ꦥ꧀ꦭꦏ꧀ꦏꦣꦺꦴꦱ꧀ꦏꦥꦸꦏ꧀ꦝꦶꦥꦸꦤ꧀ꦮꦸꦱꦺꦴꦤꦶ꧉
꧋ꦱꦶꦤ꧀ꦠꦺꦤ꧀ꦩꦼꦤꦶꦏꦺꦴꦆꦁꦏꦁꦩꦣꦺꦥꦺꦴꦏꦤ꧀ꦮꦺꦴꦤ꧀ꦠꦺꦤ꧀ꦱꦸꦏꦸꦤꦶꦁꦒꦸꦤꦸꦁꦏꦼꦤ꧀ꦝꦭꦶꦱꦣ꧉
꧋ꦧꦼꦒꦮꦤ꧀ꦄꦤꦺꦴꦩꦤ꧀ꦠꦤ꧀ꦱꦃꦠꦼꦧꦃꦠꦼꦧꦃꦗꦗ꧈ꦠꦩ꧀ꦥꦺꦭ꧀ꦠꦩ꧀ꦥꦺꦭ꧀ꦮꦼꦤ꧀ꦠꦶꦱ꧀꧈
꧋ꦤꦭꦶꦏꦱꦩꦤꦧꦼꦒꦮꦤ꧀ꦄꦤꦺꦴꦩꦤ꧀ꦔꦼꦤ꧀ꦝꦶꦏꦱꦗꦿꦺꦴꦤꦶꦁꦥꦼꦁꦒꦭꦶꦃ꧇
꧋ꦮꦃ꧉꧉꧉꧉꧉꧉ꦮꦼꦱ꧀ꦱꦮꦺꦠꦫꦠꦿꦶꦱꦱꦶꦏꦏꦶꦥꦿꦧꦸꦎꦫꦎꦤꦺꦴꦏꦧꦫꦺ꧈ꦄꦠꦶꦆꦏꦶꦠꦤ꧀ꦱꦃꦒꦸꦩꦿꦺꦚ꧀ꦗꦭ꧀ꦏꦪꦤꦶꦁꦒꦭ꧀ꦧꦪꦶꦱꦥꦶꦁꦒꦶꦫꦺꦗꦸꦫꦁ꧉
꧋ꦩꦸꦒꦶꦏꦶꦤꦭꦶꦱ꧀ꦤꦱꦏꦫꦸꦧꦺꦣ꧈ꦩꦁꦒꦶꦃꦪꦸꦮꦤꦤꦶꦱ꧀ꦏꦭ꧉
꧋ꦒꦺꦩ꧀ꦧꦺꦴꦁꦱ꧀ꦮꦼꦭꦒꦶꦫꦶ꧈ꦫꦺꦴꦩꦺꦴꦤ꧀ꦝꦺꦴꦪꦺꦴꦥꦠꦶ꧈ꦱꦼꦁꦒꦤ꧈ꦒꦸꦫꦸꦥꦸꦠꦿ꧈ꦩꦪꦁꦏꦫꦪꦄꦤꦺꦴꦩꦤ꧀
꧋ꦩꦸꦒꦶꦏꦶꦤꦭꦶꦱ꧀ꦤꦱꦏꦫꦸꦧꦺꦣ꧈ꦩꦁꦒꦶꦃꦪꦸꦮꦤꦤꦶꦱ꧀ꦏꦭ꧉
꧋ꦕꦫꦶꦠꦭꦤ꧀ꦭꦩ꧀ꦥꦲꦤ꧀ꦥꦼꦣꦭꦔꦤ꧀ꦧꦧꦒꦤ꧀ꦭꦻꦫꦺꦄꦤꦺꦴꦩꦤ꧀ꦎꦫꦩꦸꦁꦠꦶꦤꦼꦩꦸꦱꦮꦶꦗꦶ꧈ꦱꦼꦤꦗꦤ꧀ꦄꦤꦥꦿꦧꦺꦣꦤ꧀ꦭꦩ꧀ꦥꦲꦤ꧀ꦈꦒꦥꦫꦒ꧈ꦤꦔꦶꦁꦮꦺꦴꦱꦶꦁꦥꦣ꧇
꧋ꦄꦤꦺꦴꦩꦤ꧀ꦭꦶꦤꦻꦫꦏꦺꦣꦼꦤꦶꦁꦣꦺꦮꦶꦄꦚ꧀ꦗꦤꦶ꧉
ꦄꦤꦺꦴꦩꦤ꧀ꦥꦸꦠꦿꦤꦺꦧꦛꦫꦒꦸꦫꦸ꧉
꧋ꦄꦤꦺꦴꦩꦤ꧀ꦝꦶꦒꦸꦭꦮꦺꦤ꧀ꦛꦃꦣꦼꦤꦶꦁꦧꦛꦫꦧꦪꦸ꧉
ꦧꦚ꧀ꦗꦸꦂꦏꦼꦥꦿꦶꦪꦺꦕꦫꦶꦠꦧꦧꦒꦤ꧀ꦭꦻꦫꦺꦄꦤꦺꦴꦩꦤ꧀
ꦮꦲꦾꦸꦧꦪꦸꦥꦶꦠꦸ
꧋ꦕꦫꦶꦠ꧀åꦏꦥꦸꦂꦮꦏꦤꦤ꧀ꦆꦁꦏꦣꦠꦺꦴꦤ꧀ꦄꦭꦺꦁꦏ꧉
꧋ꦥꦿꦧꦸꦣꦱꦩꦸꦏꦏꦲꦣꦺꦥ꧀ꦫꦣꦺꦤ꧀ꦏꦸꦩ꧀ꦧꦏꦂꦤ꧈ꦫꦣꦺꦤ꧀ꦒꦸꦤꦮꦤ꧀ꦮꦶꦧꦶꦱꦤ꧈ꦭꦤ꧀ꦥꦠꦶꦃꦥꦿꦲꦱ꧀ꦛ꧉
꧋ꦆꦁꦏꦁꦏꦉꦩ꧀ꦧꦁꦱꦁꦥꦿꦧꦸꦠꦶꦤꦔꦶꦱꦤ꧀ꦫꦣꦺꦤ꧀ꦆꦤ꧀ꦝꦿꦗꦶꦠ꧀ꦏꦁꦚꦸꦮꦸꦤ꧀ꦝꦶꦥꦣꦺꦴꦱꦏꦺꦏꦣꦁꦤꦸꦁꦒꦭ꧀ꦫꦩ꧉
꧋ꦏꦗꦧꦏꦸꦮꦶꦈꦒꦏꦫꦺꦩ꧀ꦧꦒ꧀ꦮꦶꦱꦶꦏ꧀ꦏꦁꦏꦠꦩ꧀ꦥꦶꦭꦩꦸꦤ꧀ꦄꦫꦺꦥ꧀ꦠꦸꦩꦸꦫꦸꦤ꧀ꦮꦲꦾꦸꦏꦏꦸꦮꦠꦤ꧀ꦥꦶꦠꦸꦕꦕꦲꦺ꧈ꦱꦶꦤꦼꦧꦸꦠ꧀ꦮꦲꦾꦸꦧꦪꦸꦥꦶꦠꦸ꧉
꧋ꦥꦿꦩꦶꦭꦫꦩ꧀ꦥꦸꦁꦆꦁꦥꦱꦺꦮꦏꦤ꧀ꦥꦿꦧꦸꦣꦱꦩꦸꦏꦧꦚ꧀ꦗꦸꦂꦩꦼꦱꦠ꧀ꦄꦁꦒꦺꦒꦤꦩꦸꦁꦒꦃꦔꦤ꧀ꦠꦫꦶꦏ꧀ꦱꦄꦂꦱꦔ꧀ꦒꦪꦸꦃꦠꦸꦩꦸꦫꦸꦤꦺꦮꦲꦾꦸ꧉
꧋ꦧꦛꦫꦧꦪꦸꦆꦁꦏꦲꦾꦔꦤ꧀ꦥꦁꦭꦮꦸꦁ꧈ꦏꦁꦈꦒꦮꦶꦤꦱ꧀ꦠꦤꦤ꧀ꦲꦂꦒꦩꦫꦸꦠ꧈ꦏꦲꦣꦺꦥ꧀ꦱꦶꦱ꧀ꦮꦥꦶꦠꦸ꧇
ꦭꦶꦩꦤ꧀ꦱꦼꦠꦸꦧꦤ꧀ꦝ꧈
ꦩꦕꦤ꧀ꦥꦭ꧀ꦒꦸꦤ꧈
ꦤ꧀åꦒ꧀åꦏꦤꦺꦠꦿ꧈
ꦧꦸꦭꦸꦱ꧀ꦥꦤꦺꦔꦿꦠ꧀
ꦧꦸꦠ꧀åꦱꦼꦠꦧꦶꦩꦩꦸꦏ(ꦧꦶꦱ꧀ꦩꦸꦏ)꧈
ꦒꦫꦸꦣꦏꦒꦥꦠꦶ꧈
ꦒꦸꦤꦸꦁꦩꦌꦤꦏ꧉
꧋ꦥꦫꦱꦶꦱ꧀ꦮꦏꦁꦮꦸꦱ꧀ꦥꦶꦤꦗꦁꦏꦻꦴꦠꦩꦤ꧀ꦧꦚ꧀ꦗꦸꦂꦏꦣꦮꦸꦲꦤ꧀ꦠꦸꦩꦸꦫꦸꦤ꧀ꦩꦔꦂꦕꦥꦣꦔꦸꦥꦣꦶꦥꦤꦶꦠꦶꦱꦤ꧀꧈
ꦥꦫꦱꦶꦱ꧀ꦮꦠꦸꦩꦸꦭꦶꦧꦸꦣꦭ꧀꧈
꧋ꦆꦁꦩꦣꦾꦤꦺꦣꦶꦂꦒꦤ꧀ꦠꦫꦮꦲꦾꦸꦧꦪꦸꦥꦶꦠꦸꦏꦥꦿꦁꦒꦸꦭ꧀ꦏꦭꦶꦪꦤ꧀ꦥꦿꦧꦸꦣꦱꦩꦸꦏꦏꦁꦧꦚ꧀ꦗꦸꦂꦣꦶꦧꦺꦧꦸꦗꦸꦏ꧀ꦄꦉꦥ꧀ꦏꦧꦺꦴꦪꦺꦴꦁꦩꦼꦚꦁꦄꦊꦁꦏ꧉
꧋ꦥꦿꦧꦸꦣꦱꦩꦸꦏ꧇"ꦲꦺꦃꦧꦪꦸꦥꦶꦠꦸ꧈ꦪꦺꦤ꧀ꦱꦶꦂåꦏꦼꦥꦶꦔꦶꦤ꧀ꦔꦿꦱꦏꦏꦺꦱ꧀ꦮꦂꦒ꧀åꦣꦺꦴꦚ꧀åꦩꦸꦏ꧀ꦠꦶꦮꦶꦧ꧀åꦮ꧀å꧈ꦒꦒꦺꦩꦤꦸꦠ꧀åꦩꦫꦁꦆꦁꦱꦸꦤ꧀ꦏꦧꦺꦴꦪꦺꦴꦁꦩꦼꦚꦁꦔꦊꦁꦏ꧉"
꧋ꦤꦔꦶꦁꦥꦫꦱꦶꦱ꧀ꦮꦤꦺꦧꦛꦫꦧꦪꦸꦱꦩꦶꦱꦸꦮꦭꦭꦤ꧀ꦝꦣꦶꦥꦚ꧀ꦕꦧꦏꦃ꧉ꦮꦲꦾꦸꦧꦪꦸꦥꦶꦠꦸꦏꦱꦺꦱꦺꦂ꧈ꦥꦿꦧꦸꦣꦱꦩꦸꦏꦏꦱꦶꦭ꧀ꦩꦶꦏꦸꦠ꧀ꦧꦪꦸꦧꦶꦩꦩꦸꦏ(ꦧꦶꦱ꧀ꦩꦸꦏ)ꦧꦚ꧀ꦗꦸꦂꦣꦶꦒꦮꦧꦭꦶꦩꦼꦚꦁꦄꦭꦺꦁꦏꦣꦶꦣꦝꦺꦏꦏꦺꦱꦼꦣꦸꦭꦸꦂꦤꦸꦁꦒꦭ꧀ꦫꦩꦤꦺꦆꦤ꧀ꦝꦿꦗꦶꦣ꧀ꦈꦒꦄꦤ꧀ꦝꦼꦭ꧀ꦄꦤ꧀ꦝꦼꦭꦶꦁꦥꦿꦗꦄꦭꦺꦁꦏꦏꦮꦶꦱꦸꦣꦩꦶꦤꦁꦏꦥꦸꦗꦁꦒꦏꦿꦠꦺꦴꦤ꧀ꦏꦤ꧀ꦛꦶꦥꦼꦥꦫꦧ꧀ꦧꦼꦒꦮꦤ꧀ꦥꦸꦭꦱ꧀ꦠꦾ꧉
꧋ꦥꦿꦧꦸꦣꦱꦩꦸꦏꦏꦁꦏꦼꦥꦶꦔꦶꦤ꧀ꦝꦂꦧꦺꦥꦸꦠꦿꦥꦸꦠꦿꦱꦼꦏ꧀ꦠꦶꦩꦤ꧀ꦝꦿꦒꦸꦤꦧꦚ꧀ꦗꦸꦂꦄꦤ꧀ꦝꦮꦸꦲꦶꦧꦼꦒꦮꦤ꧀ꦥꦸꦭꦱ꧀ꦠꦾꦄꦩꦿꦶꦃꦧꦶꦱꦏꦊꦏ꧀ꦱꦤꦤ꧀꧈ꦣꦺꦤꦶꦁꦱꦁꦧꦼꦒꦮꦤ꧀ꦥꦫꦒꦂꦮꦤꦺꦥꦿꦧꦸꦣꦱꦩꦸꦏꦏꦥꦸꦫꦶꦃꦚꦼꦥꦼꦁꦥꦼꦏ꧀ꦱꦶꦏꦁꦧꦚ꧀ꦗꦸꦂꦱꦶꦤꦶꦣꦶꦏꦫꦣꦝꦶꦗꦧꦁꦧꦪꦶꦭꦤ꧀ꦝꦶꦮꦺꦤꦼꦲꦶꦠꦼꦠꦼꦔꦼꦂ꧇ꦠꦿꦶꦱꦶꦫꦃ꧈ꦠꦿꦶꦤꦺꦠꦿ꧈ꦠꦿꦶꦏꦪ꧈ꦠꦿꦶꦩꦸꦂꦣ꧈ꦠꦿꦶꦮꦤꦺꦃ꧈ꦪꦏ꧀ꦱꦣꦺꦮ꧈ꦤꦫꦤ꧀ꦠꦏ꧈ꦭꦤ꧀ꦝꦼꦮꦤ꧀ꦠꦏ꧉
꧋ꦤꦼꦁꦤꦏꦁꦕꦶꦤꦫꦶꦠꦒꦼꦤ꧀ꦠꦾꦏꦮꦸꦮꦸꦱꦱ꧀ꦮꦱꦤꦆꦁꦠ꧀ꦭꦒꦩꦣꦶꦂꦣ꧉
꧋ꦱꦠꦸꦫꦸꦠ꧀ꦝꦮꦸꦃꦥꦶꦠꦸꦣꦸꦲꦺꦆꦁꦏꦁꦫꦩ꧈ꦱꦁꦉꦱꦶꦒꦺꦴꦠꦩꦱꦏꦥꦼꦂꦠꦥꦤ꧀ꦒꦿꦱ꧀ꦠꦶꦤꦆꦁꦥꦺꦫꦺꦔꦤꦺꦄꦂꦒꦱꦸꦏꦺꦤ꧀ꦝꦿ꧈ꦣꦺꦮꦶꦄꦚ꧀ꦗꦤꦶꦧꦚ꧀ꦗꦸꦂꦔ꧀ꦭꦩ꧀ꦥꦲꦶꦠꦥꦚꦤ꧀ꦛꦸꦏ(ꦕꦤ꧀ꦛꦸꦏ꧇ꦏꦺꦴꦣꦺꦴꦏ꧀)ꦆꦁꦠ꧀ꦭꦒꦩꦣꦶꦂꦣꦝꦶꦏꦤ꧀ꦛꦶꦏꦫꦺꦴꦄꦼꦩ꧀ꦧꦤ꧀ꦱ꧀ꦮꦫꦺꦃ꧉
꧋ꦄꦤꦱꦶꦁꦚꦼꦧꦸꦠꦏꦺꦪꦺꦤ꧀ꦝꦺꦮꦶꦄꦚ꧀ꦗꦤꦶꦠꦥꦩꦠꦶꦂꦠ꧈ꦏꦸꦮꦶꦏꦸꦫꦁꦠꦿꦼꦥ꧀꧈ꦩꦠꦶꦂꦠꦄꦠꦺꦒꦺꦱ꧀ꦱꦼꦱꦸꦕꦶꦩꦮꦶꦠꦶꦂꦠ꧉
꧋ꦧꦛꦫꦒꦸꦫꦸꦆꦁꦏꦁꦱꦮꦺꦒ꧀ꦔꦁꦭꦁꦗꦒꦣ꧀ꦩꦲꦮꦤ꧀ꦒꦼꦒꦤꦤꦶꦠꦶꦃꦊꦩ꧀ꦧꦸꦄꦤ꧀ꦝꦶꦤꦶ꧈ꦣꦸꦥꦶꦩꦶꦂꦱꦤꦶꦣꦺꦮꦶꦄꦚ꧀ꦗꦤꦶꦭꦤ꧀ꦄꦼꦩ꧀ꦧꦤ꧀ꦱ꧀ꦮꦫꦺꦃꦏꦸꦁꦏꦸꦩ꧀ꦆꦁꦱꦠꦼꦥꦶꦤꦺꦠ꧀ꦭꦒꦠꦤ꧀ꦥꦧꦸꦱꦤ꧈ꦱꦤꦣꦾꦤ꧀ꦄꦥꦱꦸꦂꦪꦤ꧀ꦮꦤꦫꦤꦔꦶꦁꦧꦁꦏꦶꦠ꧀ꦄꦤꦸꦮꦸꦲꦏꦼꦤ꧀ꦤꦥ꧀ꦱꦸꦄꦱ꧀ꦩꦫꦤꦺꦱꦁꦧꦛꦫ꧈ꦱꦠꦼꦩꦃꦏꦺꦴꦫꦸꦣ꧀ꦏꦩꦤꦺ(ꦏꦼꦮꦼꦠꦸꦏꦩꦤꦺ)ꦏꦁꦧꦚ꧀ꦗꦸꦂꦣꦶꦱꦺꦭꦺꦲꦏꦺꦆꦁꦒꦺꦴꦣꦺꦴꦁꦱꦶꦤꦺꦴꦩ꧀꧈
꧋ꦣꦺꦤꦶꦁꦧꦛꦫꦒꦸꦫꦸꦒꦺꦴꦣꦺꦴꦁꦱꦶꦤꦺꦴꦩ꧀ꦩꦻꦴꦏꦏꦶꦤ꧀ꦠꦶꦫꦏꦺꦆꦁꦮꦫꦶꦃꦭꦤ꧀ꦏꦚꦸꦠ꧀ꦩꦼꦚꦁꦣꦺꦮꦶꦄꦚ꧀ꦗꦤꦶꦏꦁꦧꦚ꧀ꦗꦸꦂꦣꦶꦣꦲꦂꦱꦼꦥꦫꦺꦴ꧈ꦮꦺꦴꦤ꧀ꦝꦺꦤꦺꦱꦼꦥꦫꦺꦴꦤꦺꦏꦥꦫꦶꦔꦏꦺꦩꦫꦁꦄꦼꦩ꧀ꦧꦤ꧀ꦱ꧀ꦮꦫꦺꦃ꧉
꧋ꦎꦫꦄꦤ꧀ꦠꦫꦤꦺꦱꦸꦮꦺꦮꦤꦺꦴꦣ꧀ꦪ꧀åꦏꦼꦏꦭꦶꦃꦧꦚ꧀ꦗꦸꦂꦄꦁꦒꦂꦧꦶꦤꦶ꧉ꦏꦒꦾꦠ꧀ꦠꦤ꧀ꦥꦏꦶꦤꦫꦫꦎꦱꦶꦁꦩꦤꦃꦄꦩꦂꦒꦫꦸꦩꦁꦱꦎꦫꦤꦠꦺꦕꦏꦼꦠ꧀ꦭꦤ꧀ꦒꦼꦥꦺꦴꦏ꧀ꦱꦺꦁꦒꦺꦴꦭ꧀ꦏꦫꦺꦴꦥꦿꦶꦪ꧈ꦥꦼꦥꦸꦤ꧀ꦛꦺꦴꦤꦺꦏꦼꦏꦫꦺꦴꦤꦺꦧꦚ꧀ꦗꦸꦂꦩꦸꦗꦄꦱ꧀ꦠꦮꦩꦸꦗꦶꦄꦱ꧀ꦠꦸꦠꦶꦚꦸꦮꦸꦤ꧀ꦥꦶꦠꦼꦣꦲꦶꦁꦒꦸꦱ꧀ꦠꦶꦆꦁꦏꦁꦩꦸꦂꦧꦺꦁꦣꦸꦩꦣꦶ꧉
꧋ꦱꦮꦼꦠꦫꦮꦼꦏ꧀ꦠꦸꦭꦸꦩꦏꦸ꧈ꦣꦺꦮꦶꦄꦚ꧀ꦗꦤꦶꦭꦤ꧀ꦄꦼꦩ꧀ꦧꦤ꧀ꦱ꧀ꦮꦫꦺꦃꦏꦫꦮꦸꦲꦤ꧀ꦧꦛ꧀åꦫ꧀åꦧꦪꦸ꧉
꧋ꦱꦮꦸꦱꦺꦥꦫꦶꦁꦏꦠꦼꦫꦔꦤ꧀ꦗꦠꦶꦣꦶꦫꦶꦤꦺꦭꦤ꧀ꦮꦤꦺꦴꦣ꧀ꦪ꧀åꦏꦼꦏꦭꦶꦃꦔꦠꦸꦫꦏꦺꦥꦔꦧꦼꦏ꧀ꦠꦶ꧈ꦧꦛꦫꦧꦪꦸꦔꦤ꧀ꦝꦫꦏꦺꦊꦭꦩ꧀ꦥꦲꦤ꧀ꦏꦁꦱꦶꦤꦤ꧀ꦝꦁꦣꦼꦤꦶꦁꦣꦺꦮꦶꦄꦚ꧀ꦗꦤꦶꦭꦤ꧀ꦄꦼꦩ꧀ꦧꦤ꧀ꦱ꧀ꦮꦫꦺꦃ꧉
꧋"ꦠꦶꦠꦃꦈꦭꦸꦤ꧀ꦤꦶꦤꦶꦄꦚ꧀ꦗꦤꦶꦭꦤ꧀ꦱ꧀ꦮꦫꦺꦃ꧉ꦏꦮꦿꦸꦲꦤꦭꦩꦸꦤ꧀ꦥꦺꦴꦤꦁꦗꦧꦁꦧꦪꦶꦆꦁꦏꦤ꧀ꦝꦸꦠꦤ꧀ꦏꦶꦠ꧈ꦏꦸꦮꦶꦩꦶꦤꦁꦏꦏꦤꦸꦒꦿꦲꦤ꧀ꦱꦏꦶꦁꦧꦛꦫꦒꦸꦫꦸ꧈ꦥꦸꦠꦿꦥꦸꦠꦿꦏꦶꦠꦆꦁꦩꦼꦁꦏꦺꦴꦧꦏꦭ꧀ꦝꦣꦶꦱꦠꦿꦶꦪꦈꦠꦩ꧉"
꧋ꦧꦛꦫꦧꦪꦸꦧꦚ꧀ꦗꦸꦂꦚꦶꦣꦶꦏꦫꦥꦺꦴꦤꦁꦗꦧꦁꦧꦪꦶ꧈ꦏꦠꦶꦠꦶꦏ꧀ꦆꦁꦱꦗꦼꦫꦺꦴꦤꦺꦱꦭꦶꦫꦮꦤꦺꦴꦣꦾꦏꦼꦏꦭꦶꦃꦏꦣꦾꦭꦺꦱꦸꦱ꧀ꦥꦶꦤꦸꦱꦸꦱ꧀ꦏꦥꦿꦧꦮꦤ꧀ꦝꦪꦏꦭꦸꦮꦶꦲꦤ꧀ꦏꦁꦥꦶꦤꦫꦶꦔꦏꦺꦣꦺꦤꦶꦁꦧꦛꦫꦧꦪꦸ꧉
꧋ꦤꦭꦶꦏ꧀åꦮꦶꦱ꧀ꦠꦶꦠꦶꦮꦚ꧀ꦕꦶꦤꦺ꧈ꦣꦺꦮꦶꦄꦚ꧀ꦗꦤꦶꦔ꧀ꦭꦻꦫꦏꦺꦧꦪꦶꦄꦮꦸꦗꦸꦣ꧀ꦮꦤꦫꦱꦼꦠꦏꦁꦥꦶꦤꦫꦶꦔꦤ꧀ꦠꦼꦠꦼꦔꦼꦂꦫꦣꦺꦤ꧀ꦱꦼꦁꦒꦤ꧈ꦪꦱꦶꦤꦼꦧꦸꦠ꧀ꦄꦤꦺꦴꦩꦤ꧀꧈ꦮꦺꦴꦣꦺꦤꦺꦄꦼꦩ꧀ꦧꦤ꧀ꦱ꧀ꦮꦫꦺꦃꦔ꧀ꦭꦻꦫꦏꦺꦧꦪꦶꦄꦮꦸꦗꦸꦣ꧀ꦮꦤ꧀åꦫ꧀åꦕꦼꦩꦼꦁꦏꦁꦥꦶꦤꦫꦶꦔꦤ꧀ꦠꦼꦠꦼꦔꦼꦂꦏꦥꦶꦱ꧀ꦮꦼꦣ꧉
꧋ꦧꦛꦫꦧꦪꦸꦠꦸꦩꦼꦣꦏ꧀ꦩꦼꦚꦁꦠ꧀ꦭ꧀åꦒ꧀åꦩꦣꦶꦂꦣ꧀åꦄꦔꦤ꧀ꦛꦶꦱꦮꦼꦠꦫꦮꦶꦣꦝꦫꦶꦱꦥꦼꦂꦭꦸꦄꦱꦸꦁꦥꦩ꧀ꦧꦶꦪꦤ꧀ꦠꦸ꧈ꦧꦚ꧀ꦗꦸꦂꦔꦼꦣꦸꦱꦶꦗꦧꦁꦧꦪꦶꦏꦼꦏꦫꦺꦴꦩꦮꦶ"ꦠꦺꦴꦪꦒꦺꦒꦺ"꧈ꦱꦠꦼꦩꦃꦌꦁꦒꦭ꧀ꦝꦶꦮ꧀åꦱ꧀å꧉
꧋ꦣꦺꦮꦶꦄꦚ꧀ꦗꦤꦶ꧈ꦄꦼꦩ꧀ꦧꦤ꧀ꦱ꧀ꦮꦫꦺꦃ꧈ꦣꦭꦃꦏꦥꦶꦱ꧀ꦮꦼꦣꦧꦚ꧀ꦗꦸꦂꦧꦭꦶꦩꦼꦚꦁꦥꦼꦂꦠꦥꦤ꧀ꦒꦿꦱ꧀ꦠꦶꦤ꧉
꧋ꦱꦩꦤ꧀ꦠꦫ꧈ꦄꦤꦺꦴꦩꦤ꧀ꦏꦁꦏꦼꦥꦶꦔꦶꦤ꧀ꦱꦺꦴꦮꦤ꧀ꦥꦼꦥꦁꦒꦶꦲꦤ꧀ꦏꦭꦶꦲꦤ꧀ꦆꦁꦏꦁꦫꦩ꧈ꦧꦚ꧀ꦗꦸꦂꦣꦶꦒ꧀åꦮ꧀åꦩꦸꦁꦒꦃꦩꦼꦚꦁꦏꦲꦾꦔꦤ꧀ꦗꦺꦴꦁꦒꦿꦶꦁꦱꦭꦺꦴꦏꦣꦺꦤꦶꦁꦧꦛꦫꦧꦪꦸ꧉
꧋ꦆꦁꦏꦲꦾꦔꦤ꧀ꦗꦺꦴꦁꦒꦿꦶꦁꦱꦭꦺꦴꦏ꧈ꦧꦛꦫꦒꦸꦫꦸꦏꦲꦣꦼꦥ꧀ꦧꦛ꧀åꦫ꧀åꦪ꧀ꦤꦫꦣ꧈ꦧꦛꦫꦆꦤ꧀ꦝꦿ꧈ꦧꦛꦫꦮꦶꦱ꧀ꦤꦸ꧈ꦧꦛꦫꦧꦿꦩ꧈ꦭꦤ꧀ꦥꦫꦣꦺꦮꦭꦶꦪꦤꦺ꧉
꧋ꦆꦁꦏꦁꦏꦉꦩ꧀ꦧꦒ꧀ꦤꦭꦶꦏ꧀åꦧꦛ꧀åꦫ꧀åꦒꦸꦫꦸꦔꦁꦭꦁꦗꦒꦣ꧀ꦤꦶꦠꦶꦃꦊꦩ꧀ꦧꦸꦄꦤ꧀ꦝꦶꦤꦶ꧈ꦚꦸꦩꦼꦉꦥꦶꦏꦣꦠꦺꦴꦤ꧀ꦥꦸꦂꦮꦫꦺꦁꦒꦆꦁꦒꦸꦮꦮꦶꦤ꧀ꦝꦸ꧈ꦒꦣꦲꦤꦺꦥꦿꦧꦸꦮꦶꦱꦏꦂꦩ꧉ꦏꦲꦤꦤ꧀ꦏꦸꦮꦶꦄꦒꦮꦺꦏꦸꦫꦁꦉꦤ꧀åꦥꦁꦒꦭꦶꦲꦺꦱꦁꦲꦾꦁꦒꦸꦫꦸ꧉
꧋ꦭꦒꦶꦌꦕ꧀åꦮꦮꦤ꧀ꦱꦧ꧀ꦝ꧈ꦏꦠꦸꦁꦏꦱꦺꦴꦮꦤꦺꦧꦛꦫꦧꦪꦸꦔꦤ꧀ꦛꦶꦫꦣꦺꦤ꧀ꦄꦤꦺꦴꦩꦤ꧀ꦏꦁꦮꦺꦴꦱꦺꦚꦸꦮꦸꦤ꧀ꦝꦶꦄꦏꦺꦴꦤꦶꦩꦶꦤꦁꦏꦥꦸꦠꦿꦣꦺꦤꦶꦁꦧꦛꦫꦒꦸꦫꦸ꧉
꧋ꦧꦛꦫꦤꦫꦣꦱꦏꦭꦒꦸꦩꦸꦗꦼꦁꦧꦚ꧀ꦗꦸꦂꦩꦼꦩꦺꦴꦪꦺꦴꦏꦶꦣꦺꦤꦺꦧꦛꦫꦒꦸꦫꦸꦏꦒꦸꦔꦤ꧀ꦥꦸꦠꦿꦄꦮꦸꦗꦸꦣ꧀ꦮꦤꦫ꧉
꧋ꦧꦛꦫꦤꦫꦣ꧇"ꦥꦿꦼꦒꦼꦚ꧀ꦗꦺꦴꦁ꧈ꦥꦿꦼꦒꦼꦚ꧀ꦗꦺꦴꦁ꧈ꦥꦏ꧀ꦥꦏ꧀ꦥꦺꦴꦁꦥꦏ꧀ꦥꦏ꧀ꦥꦺꦴꦁ꧈ꦮꦫꦸꦣꦺꦴꦪꦺꦴꦁꦣꦶꦠꦼꦒꦺꦴꦂꦈꦮꦺꦴꦁ꧈ꦮꦤꦫꦱꦼꦠꦱꦥꦱꦶꦁꦪꦱ!
꧋ꦎꦎ꧉꧉ꦥꦿꦚꦠꦄꦣꦶꦒꦸꦫꦸꦣꦂꦧꦺꦥꦸꦠꦿꦄꦮꦸꦗꦸꦣ꧀ꦮꦤꦫꦱꦼꦠ!
꧋ꦪꦠꦄꦤꦺꦴꦩꦤ꧀ꦫꦲꦂꦗꦠꦼꦏꦩꦸꦆꦁꦗꦺꦴꦁꦒꦿꦶꦁꦱꦭꦏ!
ꦄꦣꦶꦒꦸꦫꦸꦥꦚ꧀ꦕꦺꦤ꧀ꦫꦩꦩꦸ꧈ꦔ꧀ꦒꦺꦂ!
ꦲꦺꦲꦺꦲꦺ꧉꧉꧉"
꧋ꦫꦸꦩꦁꦱꦭꦶꦁꦱꦼꦩ꧀ꦧꦚ꧀ꦗꦸꦂꦧꦛꦫꦒꦸꦫꦸꦔꦸꦚ꧀ꦕꦭꦏꦺꦫꦺꦴꦤ꧀ꦆꦭ꧀åꦆꦭ꧀å(ꦒꦺꦴꦣꦺꦴꦁꦮꦫꦸ)ꦏꦁꦱꦤꦭꦶꦏꦣꦝꦶꦮꦤꦫꦄꦮꦼꦂꦤꦶꦤꦶꦭ꧀åꦚꦩ꧀ꦧꦼꦂꦆꦭꦺꦤ꧀ꦠꦸꦩꦺꦩ꧀ꦥ꧀ꦭꦺꦏ꧀ꦄꦤꦺꦁꦒꦶꦒꦶꦫꦺꦧꦛꦫꦤꦫꦣꦭꦤ꧀ꦚꦸꦮꦸꦤ꧀ꦝꦶꦄꦏꦺꦴꦤꦶꦥꦸꦠ꧀ꦫ꧀å꧉
꧋ꦧꦛꦫꦒꦸꦫꦸ꧇"ꦏꦏꦁꦤꦫꦣ!ꦏꦚꦠꦤꦶꦥꦸꦤ꧀ꦏꦏꦁꦤꦫꦣꦈꦒꦣꦂꦧꦺꦥꦸꦠꦿꦮꦤꦫ꧉
ꦥꦿꦪꦺꦴꦒꦌꦁꦒꦭ꧀ꦝꦶꦥꦸꦤꦏꦺꦤꦶꦩꦮꦺꦴꦤ꧀!"
꧋ꦄꦩꦂꦒꦎꦫꦧꦶꦱꦔꦸꦮꦭꦏꦺꦮꦤꦫꦏꦸꦮꦶꦧꦚ꧀ꦗꦸꦂꦧꦛꦫꦤꦫꦣꦏꦼꦂꦱꦔꦏꦺꦴꦤꦶꦥꦸꦠ꧀ꦫ꧀åꦭꦤ꧀ꦥꦶꦤꦫꦶꦔꦤ꧀ꦤ꧀åꦩ꧀åꦗꦪꦄꦤꦶꦭ꧉
꧋ꦧꦛꦫꦒꦸꦫꦸꦧꦚ꧀ꦗꦸꦂꦈꦒꦔꦏꦺꦴꦤꦶꦭꦩꦸꦤ꧀ꦱꦁꦱꦼꦁꦒꦤꦈꦠꦮꦫꦣꦺꦤ꧀ꦄꦤꦺꦴꦩꦤ꧀ꦩꦶꦤꦁꦏꦥꦸꦠꦿꦤꦺ꧉
꧋ꦱꦮꦼꦤꦺꦃꦣꦺꦮꦏꦁꦔꦣꦼꦥ꧀ꦈꦒ꧀åꦩꦺꦱꦼꦩ꧀ꦄꦁꦒꦼꦒꦸꦪꦸꦏꦣꦝꦺꦪꦤ꧀ꦏꦸꦮꦶ꧈ꦥꦿꦩꦶꦭ꧀åꦏꦁꦒꦺꦴꦔꦭꦶꦁꦄꦭꦶꦔꦶꦫ꧀åꦱ꧀åꦭꦶꦁꦱꦼꦩ꧀ꦭꦤ꧀ꦚ꧀ꦗꦁꦏꦼꦥꦶꦗꦼꦗꦼꦒꦶꦁꦄꦣꦶꦭ꧀ꦧꦛ꧀åꦫ꧀åꦒꦸꦫꦸꦧꦚ꧀ꦗꦸꦂꦄꦤ꧀ꦝꦮꦸꦲꦶꦥꦫꦣꦺꦮꦏꦶꦤꦺꦴꦤ꧀ꦥꦣꦩꦸꦗꦮꦤꦫ꧉
꧋ꦥꦫꦣꦺꦮꦔꦺꦱ꧀ꦠꦺꦴꦏꦏꦼꦤ꧀ꦝꦮꦸꦃ꧉ꦧꦛ꧀åꦫ꧀åꦆꦤ꧀ꦝ꧀ꦫ꧀åꦩꦸꦗ꧀åꦏꦥꦶꦱꦼꦩ꧀ꦥꦠꦶ꧈ꦧꦛ꧀åꦫ꧀åꦧꦿꦃꦩꦩꦸꦗꦏꦥꦶꦄꦁꦒꦺꦤꦶ꧈ꦧꦛꦫꦪꦩꦣꦶꦥꦠꦶꦩꦸꦗ꧀åꦏꦥꦶꦩꦼꦤ꧀ꦝ꧈ꦏꦥꦶꦧꦭꦶꦮꦶꦱꦠ꧈ꦭꦤ꧀ꦏꦥꦶꦄꦤꦭ꧈ꦱꦠꦼꦩꦃꦕꦕꦲꦺꦄꦠꦸꦱꦤ꧀꧈
꧋ꦧꦚ꧀ꦗꦸꦂꦱꦼꦏꦧꦺꦲꦺꦏꦥꦶꦥꦸꦗꦤ꧀ꦏꦣꦮꦸꦲꦤ꧀ꦱꦸꦮꦶꦠ꧀åꦣꦠꦼꦁꦤꦂꦥꦠꦶꦱ꧀ꦒꦿꦶꦮꦆꦁꦒꦸꦮꦏꦶꦱ꧀ꦏꦺꦤ꧀ꦝꦏꦤ꧀ꦛꦶꦣꦶꦥꦔꦂꦱꦤꦶꦣꦺꦤꦶꦁꦄꦤꦺꦴꦩꦤ꧀ꦭꦤ꧀ꦏꦥꦶꦄꦤꦶꦭ꧉
꧋ꦱꦥꦸꦁꦏꦺꦥꦫꦮꦤꦫ꧈ꦧꦛꦫꦒꦸꦫꦸꦄꦤ꧀ꦝꦮꦸꦲꦶꦥꦫꦣꦺꦮꦏꦶꦤꦺꦴꦤ꧀ꦩ꧀ꦧꦚ꧀ꦗꦸꦠ꧀ꦥꦿꦧꦸꦮꦶꦱꦏꦂꦩ꧉
꧋ꦥꦿꦧꦸꦮꦶꦱꦏꦂꦩꦏꦲꦣꦺꦥ꧀ꦄꦠ꧀ꦩꦗꦤꦺꦱꦼꦱꦶꦭꦶꦃꦣꦺꦮꦶꦱꦪꦺꦩ꧀ꦥꦿꦧꦣꦭꦃꦥꦠꦶꦃꦱꦼꦤ꧀ꦝꦁꦒꦂꦧ꧉ꦆꦁꦏꦁꦏꦉꦩ꧀ꦧꦒ꧀ꦝꦺꦮꦶꦱꦪꦺꦩ꧀ꦥꦿꦧꦮꦸꦱ꧀ꦒꦶꦤꦂꦮꦱꦼꦭꦶꦂꦣꦺꦤꦶꦁꦥꦿꦧꦸꦣꦱꦩꦸꦏ꧈ꦥꦿꦩꦶꦭꦤꦼꦣꦾꦄꦩ꧀ꦧꦔꦸꦤ꧀ꦏꦣꦠꦺꦴꦤ꧀ꦏꦁꦭꦸꦮꦶꦃꦌꦤ꧀ꦝꦃꦩꦤꦺꦃ꧉
꧋ꦏꦠꦸꦁꦏꦥꦿꦥ꧀ꦠꦤꦺꦥꦫꦣꦺꦮ꧈ꦱꦮꦸꦱꦺꦱꦸꦭꦪꦉꦩ꧀ꦧꦸꦒ꧀ꦥꦿꦧꦸꦮꦶꦱꦏꦂꦩꦏꦧꦚ꧀ꦗꦸꦠ꧀ꦝꦺꦤꦶꦁꦧꦛꦫꦪꦩꦣꦶꦥꦠꦶ꧉
꧋ꦣꦺꦤꦺꦏꦣꦠꦺꦴꦤ꧀ꦥꦸꦂꦮꦫꦺꦁꦒꦱꦶꦤꦼꦧ꧀ꦭꦏ꧀ꦩꦫꦸꦠꦒꦸꦁꦣꦺꦤꦶꦁꦧꦛꦫꦧꦪꦸ꧈ꦱꦠꦼꦩꦃꦏꦫꦶꦱꦁꦒꦂꦥꦩꦸꦗꦤ꧀ꦏꦁꦠꦶꦤꦺꦁꦒꦣꦼꦤꦶꦁꦣꦺꦮꦶꦱꦪꦺꦩ꧀ꦥꦿꦧꦏꦁꦎꦫꦏꦧꦸꦚ꧀ꦕꦁꦄꦔꦶꦤ꧀꧈
꧋ꦱꦶꦤꦶꦒꦺꦒ꧀ꦏꦁꦕꦶꦤꦫꦶꦠꦒꦼꦤ꧀ꦠꦾꦏꦮꦸꦮꦸꦱꦮꦺꦴꦱꦶꦁꦒꦠꦶ꧉
꧋ꦕꦫꦶꦠꦆꦁꦣꦸꦮꦸꦂꦏꦸꦮꦶꦭꦩꦸꦤ꧀ꦄꦤꦺꦁꦥꦒꦼꦭꦫꦤ꧀ꦫꦶꦁꦒꦶꦠ꧀ꦥꦸꦂꦮ꧀åꦏꦠꦼꦭꦃꦆꦁꦥꦺꦫꦔꦤ꧀ꦭꦏꦺꦴꦤ꧀"ꦭꦻꦫꦺꦄꦤꦺꦴꦩꦤ꧀"꧈ꦈꦠꦮ"ꦄꦤꦺꦴꦩꦤ꧀ꦠꦏꦺꦴꦤ꧀ꦧꦥ"꧈ꦱꦤꦣꦾꦤ꧀ꦧꦼꦤ꧀ꦠꦼꦤ꧀ꦏꦶꦣꦭꦁꦈꦒꦧꦶꦱꦧꦺꦣꦱꦁꦒꦶꦠ꧀꧈
꧋ꦱꦼꦫꦠꦤ꧀ꦕꦼꦫꦶꦠꦏꦸꦮꦶꦠꦶꦤꦼꦩꦸꦎꦫꦗꦁꦏꦺꦥ꧀ꦤꦔꦶꦁꦏꦁꦄꦤ꧀ꦝꦸꦣꦸꦠ꧀ꦏꦮꦶꦒꦠꦺꦤ꧀ꦪꦆꦏꦸꦄꦤꦤꦺꦱꦶꦱ꧀ꦮꦱꦏꦧꦛꦫꦧꦪꦸꦏꦁꦕꦕꦲꦺꦥꦶꦠꦸꦭꦤ꧀ꦄꦫꦸꦥ"ꦮꦲꦾꦸ"꧉
꧋ꦱꦩꦤ꧀ꦠꦫꦄꦤꦈꦒꦏꦁꦩꦿꦠꦺꦭꦏꦏꦺꦭꦩꦸꦤ꧀ꦱꦶꦱ꧀ꦮꦤꦺꦧꦛꦫꦧꦪꦸꦏꦸꦮꦶꦧꦚ꧀ꦗꦸꦂꦩꦤꦶꦠꦶꦱ꧀(ꦩꦚ꧀ꦗꦤ꧀ꦩ)꧇
▪︎ꦭꦶꦩꦤ꧀ꦱꦼꦠꦸꦧꦤ꧀ꦝ꧉
▪︎ꦩꦕꦤ꧀ꦥꦭ꧀ꦒꦸꦤ꧈
꧋▪︎ꦤꦒꦏꦤꦺꦠꦿ꧈ꦩꦤꦶꦠꦶꦱ꧀ꦩꦫꦁꦄꦂꦪꦧꦶꦩ(ꦮꦿꦺꦏꦸꦣꦫ)꧉
▪︎ꦧꦸꦭꦸꦱ꧀ꦥꦤꦺꦔꦿꦠ꧀꧈
꧋▪︎ꦧꦸꦠ꧀åꦱꦺꦠ꧀åꦧꦶꦩꦩꦸꦏ(ꦧꦶꦱ꧀ꦩꦸꦏ꧀å)꧈ꦩꦤꦶꦠꦶꦱ꧀ꦩꦫꦁꦮꦶꦭ꧀ꦗꦗꦃꦮꦿꦺꦏ꧉
꧋▪︎ꦒꦫꦸꦣꦏꦒꦥꦠꦶ꧈ꦩꦤꦶꦠꦶꦱ꧀ꦩꦫꦁꦄꦤꦺꦴꦩꦤ꧀꧈
▪︎ꦒꦸꦤꦸꦁꦩꦌꦤꦏ(ꦧꦼꦒꦮꦤ꧀ꦩꦌꦤꦏ)꧉
꧋ꦣꦝꦶ"ꦮꦲꦾꦸꦧꦪꦸꦥꦶꦠꦸ"ꦏꦸꦮꦶꦏꦼꦤ꧀åꦱꦶꦤꦼꦧꦸꦠ꧀"ꦫꦸꦃ"꧈"ꦣꦪ"꧈ꦧꦺꦣꦏꦫꦺꦴꦏꦣꦁꦧꦪꦸ꧈ꦏꦁꦮꦸꦱ꧀ꦩꦮꦸꦗꦸꦣ꧀ꦥꦫꦒꦮꦸꦠꦸꦃ꧉
ꦏꦁꦱꦶꦤꦼꦧꦸꦠ꧀ꦏꦣꦁꦧꦪꦸ꧈ꦪꦆꦏꦸ꧇
꧇꧑꧇꧉ꦧꦛꦫꦧꦪꦸ꧉
꧇꧒꧇꧉ꦱꦁꦣꦺꦮꦫꦸꦕꦶ꧉
꧇꧓꧇꧉ꦄꦤꦺꦴꦩꦤ꧀(ꦧꦪꦸꦏꦶꦤꦫ)꧉
꧇꧔꧇꧉ꦮꦿꦼꦏꦺꦴꦣꦫ(ꦧꦪꦸꦩꦁꦏꦸꦫꦠ꧀)꧉
꧇꧕꧇꧉ꦮꦶꦭ꧀ꦗꦗꦃꦮꦿꦼꦏ꧀å(ꦧꦪꦸꦄꦤꦿꦱ꧀)꧉
꧇꧖꧇꧉ꦭꦶꦩꦤ꧀ꦱꦼꦠꦸꦧꦤ꧀ꦝ(ꦧꦪꦸꦏꦤꦺꦠꦿ)꧉
꧇꧗꧇꧉ꦱꦂꦥꦤꦒꦏꦸꦮꦺꦫ꧉
꧇꧘꧇꧉ꦒꦫꦸꦣꦩꦲꦩ꧀ꦧꦶꦫ꧉
꧇꧙꧇꧉ꦧꦼꦒꦮꦤ꧀ꦩꦌꦤꦏ(ꦧꦪꦸꦭꦁꦒꦺꦁ)꧉
꧇꧑꧐꧇꧉ꦩꦕꦤ꧀ꦥꦭ꧀ꦒꦸꦤ꧉
ꦭꦩꦸꦤ꧀ꦒꦶꦤꦒꦱ꧀ꦩꦸꦱ꧀ꦛꦶꦤꦺ꧇
꧋ꦭꦶꦩꦤ꧀ꦱꦼꦠꦸꦧꦤ꧀ꦝ꧈ꦩꦤꦶꦠꦶꦱ꧀ꦩꦫꦁ꧇ꦭꦶꦩꦤ꧀ꦱꦼꦠꦸꦧꦤ꧀ꦝ(ꦧꦪꦸꦏꦤꦺꦠꦿ)꧉
꧋▪︎ꦩꦕꦤ꧀ꦥꦭ꧀ꦒꦸꦤ꧈ꦩꦤꦶꦠꦶꦱ꧀ꦩꦫꦁ꧇ꦩꦕꦤ꧀ꦥꦭ꧀ꦒꦸꦤ꧉
꧋▪︎ꦒꦸꦤꦸꦁꦩꦌꦤꦏꦩꦤꦶꦠꦶꦱ꧀ꦩꦫꦁ꧇ꦧꦼꦒꦮꦤ꧀ꦩꦌꦤ꧀åꦏ꧀å꧉
꧋ꦒꦺꦤꦺꦪ꧀å꧈ꦤꦒꦏꦤꦺꦠꦿꦏꦺꦴꦒ꧀ꦎꦫꦩꦤꦶꦠꦶꦱ꧀ꦩꦫꦁꦱꦂꦥꦤꦒꦏꦸꦮꦺꦫ꧈ꦏꦁꦥꦣꦗꦶꦤꦶꦱ꧀ꦱꦂꦥ?
꧋ꦈꦠꦮꦩꦤꦶꦠꦶꦱ꧀ꦩꦫꦁꦭꦶꦩꦤ꧀ꦱꦼꦠꦸꦧꦤ꧀ꦝ꧈ꦏꦁꦄꦤ꧀ꦝꦸꦮꦺꦤꦶꦱꦼꦧꦸꦠꦤ꧀"ꦧꦪꦸꦏꦤꦺꦠꦿ"ꦱꦼꦩꦤꦈꦒꦒꦫꦸꦣꦏꦒꦥꦠꦶ꧈ꦏꦺꦴꦒ꧀ꦎꦫꦩꦤꦶꦠꦶꦱ꧀ꦩꦫꦁꦒꦫꦸꦣꦩꦲꦩ꧀ꦧꦶꦫ?
ꦮꦁꦱꦸꦭꦤꦺ꧇
꧋▪︎ꦏꦁꦏꦄꦫꦤꦤ꧀ꦮꦲꦾꦸ(ꦣꦪ)ꦏꦸꦮꦶꦧꦶꦱꦩꦁꦒꦺꦴꦤ꧀ꦄꦤꦺꦁꦄꦼꦤ꧀ꦝꦶꦮꦌ꧉
꧋▪︎ꦕꦫꦶꦠ꧀åꦔꦼꦤꦤꦶꦧꦧꦒꦤ꧀ꦏꦸꦮꦶꦎꦫꦠꦶꦤꦼꦩꦸꦮꦸꦠꦸꦃꦗꦁꦏꦼꦥ꧀ꦧꦶꦱꦮꦌꦄꦩꦸꦁꦱꦁꦒꦶꦠꦺꦥꦸꦗꦁꦒꦈꦠꦮꦏꦶꦣꦭꦁꦏꦤ꧀ꦛꦶꦚ꧀ꦗꦸꦥꦸꦏ꧀ꦥꦫꦒꦫꦶꦁꦒꦶꦠ꧀ꦏꦁꦮꦶꦱ꧀ꦄꦤꦭꦸꦮꦶꦃꦣꦶꦱꦶꦏ꧀꧈
꧋▪︎ꦧꦸꦭꦸꦱ꧀ꦥꦤꦺꦔꦿꦠ꧀ꦈꦒꦎꦫꦠꦶꦤꦼꦩꦸꦮꦸꦗꦸꦣ꧀ꦥꦫꦒꦫꦶꦁꦒꦶꦠꦺꦆꦁꦫꦠ꧀ꦩꦪ꧉
ꦱꦁꦒꦶꦠ꧀ꦏꦶꦣꦭꦁ꧉
ꦏꦶꦕꦠꦸꦂꦧꦺꦚꦺꦏ꧀ꦏꦸꦚ꧀ꦕꦺꦴꦫꦺꦴ꧉
꧋ꦱꦮꦸꦱꦺꦄꦤꦺꦴꦩꦤ꧀ꦭꦻꦂꦭꦤ꧀ꦝꦶꦧꦺꦏ꧀ꦠꦧꦛꦫꦧꦪꦸꦤꦼꦣꦾꦣꦶꦒꦸꦭꦮꦺꦤ꧀ꦛꦃ꧈ꦣꦺꦮꦶꦄꦚ꧀ꦗꦤꦶꦏꦱꦺꦴꦮꦤꦤ꧀ꦥꦫꦱꦼꦣꦸꦭꦸꦂꦤꦸꦁꦒꦭ꧀ꦱꦏ꧀ꦈꦮꦠꦺꦄꦤꦺꦴꦩꦤ꧀ꦏꦁꦄꦮꦸꦗꦸꦣ꧀ꦫꦱꦺꦏ꧀ꦱꦭꦤ꧀ꦚꦸꦮꦸꦤ꧀ꦝꦶꦥꦫꦶꦫꦶꦔꦶꦠꦼꦠꦼꦔꦼꦂ꧉
꧋ꦄꦫꦶꦄꦫꦶ꧈ꦣꦝꦶꦫꦱꦺꦏ꧀ꦱꦄꦮꦺꦂꦤꦶꦱꦼꦠ꧈ꦆꦔꦫꦤꦤ꧀ꦝꦶꦠꦾꦥꦸꦭꦱꦶꦪ꧉
꧋ꦠꦭꦶꦥꦸꦱꦼꦂ꧈ꦣꦝꦶꦫꦱꦺꦏ꧀ꦱꦄꦮꦺꦂꦤꦶꦱꦼꦠ꧈ꦆꦔꦫꦤꦤ꧀ꦝꦶꦠꦾꦏꦭꦥꦿꦕꦤ꧀ꦝꦱꦼꦠ꧉
꧋▪︎ꦧꦸꦁꦏꦸꦱ꧀ꦣꦝꦶꦫꦱꦺꦏ꧀ꦱꦄꦮꦺꦂꦤꦶꦭꦁꦏꦶꦁ꧈ꦆꦔꦫꦤꦤ꧀ꦝꦶꦠꦾꦫꦩꦤ꧀ꦝꦪꦥꦠꦶ꧉
꧋▪︎ꦧꦚꦸꦏꦮꦃ꧈ꦣꦝꦶꦫꦱꦼꦏ꧀ꦱꦄꦮꦼꦂꦤꦶꦥꦶꦠ꧀å꧈ꦆꦔꦫꦤꦤ꧀ꦝꦶꦠꦾꦄꦤꦺꦴꦩꦤ꧀꧈
꧋▪︎ꦒꦼꦠꦶꦃ꧈ꦣꦝꦶꦫꦱꦼꦏ꧀ꦱꦄꦮꦼꦂꦤꦶꦉꦏ꧀ꦠ꧀å꧈ꦆꦔꦫꦤꦤ꧀ꦝꦶꦠ꧀ꦪ꧀åꦥꦿꦧꦚ꧀ꦕꦤ꧉
ꦣꦝꦶꦫꦱꦼꦏ꧀ꦱꦭꦶꦩ꧉
꧋ꦱꦮꦸꦱ꧀ꦚꦫꦩ꧀ꦥꦸꦁꦱꦺꦴꦮꦤ꧀ꦩꦫꦁꦆꦁꦏꦁꦧꦶꦪꦸꦁ꧈ꦥꦫꦏꦣꦁꦤꦸꦁꦒꦭ꧀ꦱꦏ꧀ꦈꦮꦠꦺꦄꦤꦺꦴꦩꦤ꧀ꦏꦥꦿꦁꦒꦸꦭ꧀ꦥꦿꦧꦸꦣꦱꦩꦸꦏ꧉ꦱꦸꦭꦪꦤꦺꦉꦩ꧀ꦧꦸꦒ꧀ꦝꦣꦶꦥꦚ꧀ꦕꦏꦫꦭꦤ꧀ꦝꦶꦠ꧀ꦪ꧀åꦥꦸꦭꦱꦶꦪꦏꦥꦶꦏꦸꦠ꧀ꦝꦺꦤꦶꦁꦥꦿꦧꦸꦣꦱꦩꦸꦏꦧꦚ꧀ꦗꦸꦂꦣꦶꦒ꧀åꦮ꧀åꦩꦼꦚꦁꦥꦿꦗꦄꦭꦺꦁꦏꦣꦶꦣꦝꦺꦏꦏꦺꦗꦸꦫꦸꦠꦩꦤ꧀ꦆꦁꦄꦱꦺꦴꦏ꧉
▪️ꦏꦶꦩꦤ꧀ꦠꦺꦧ꧀ꦱꦸꦣꦂꦱꦺꦴꦤꦺꦴ꧉
꧋ꦣꦺꦮꦶꦄꦚ꧀ꦗꦤꦶꦏꦁꦩꦿꦠ꧀åꦥ꧀åꦆꦗꦺꦤ꧀ꦆꦁꦠ꧀ꦭꦒ꧀åꦩꦣꦶꦂꦣꦱꦮꦶꦱꦺꦔ꧀ꦭꦻꦫꦏꦺꦄꦤꦺꦴꦩꦤ꧀ꦱꦺꦣꦏꦺꦴꦤ꧀ꦝꦸꦫꦤ꧀꧈
꧋ꦄꦤꦺꦴꦩꦤ꧀ꦝꦶꦠꦼꦩꦺꦴꦏꦏꦺꦭꦤ꧀ꦝꦶꦪꦸꦥ꧀åꦫ꧀åꦣꦺꦤꦶꦁꦪꦏ꧀ꦱꦥꦤ꧀ꦝꦶꦠꦥꦼꦥꦫꦧ꧀ꦧꦼꦒꦮꦤ꧀ꦩꦫꦸꦠꦏꦁꦱꦼꦗꦠꦶꦤꦺꦥꦚ꧀ꦗꦤ꧀ꦩꦤꦺꦧꦛꦫꦧꦪꦸ꧉ꦧꦚ꧀ꦗꦸꦂꦥꦶꦤꦫꦶꦔꦤ꧀ꦠꦼꦠꦼꦔꦼꦂꦫꦣꦺꦤ꧀ꦱꦼꦁꦒꦤ꧉
ꦠꦚ꧀ꦕꦼꦥ꧀ꦏꦪꦺꦴꦤ꧀꧇
꧋ꦆꦠꦶꦠꦶꦠꦶꦤꦶꦁꦥꦚꦼꦫꦠ꧀ꦠꦶꦤꦼꦔꦼꦫꦤ꧀ꦱꦸꦂꦪ꧀åꦱꦼꦁꦏꦭꦤ꧀"ꦕꦠꦸꦂꦥꦤꦼꦩ꧀ꦧꦃꦲꦚꦶꦂꦤꦱꦶꦏꦫ"꧋ꦕꦠꦸꦂꦥꦤꦼꦩ꧀ꦧꦃꦲꦚꦶꦂꦤꦱꦶꦏꦫ꧉
ꦫꦲꦪꦸꦱꦒꦸꦁꦣꦸꦩꦣꦶ꧉
꧋ꦪꦺꦴꦒꦲꦂꦠ꧀ꦯꦸꦫꦨꦪ꧈ꦄꦒꦸꦱ꧀ꦠ꧀꧇꧒꧐꧒꧔꧇꧉
Imajier Nuswantoro
ꦆꦩꦗꦶꦪꦺꦂꦤꦸꦱ꧀ꦮꦤ꧀ꦠꦺꦴꦫꦺꦴ
