LAMPAH ILMU KASUNYATAN BEGAWAN PALASARA
(Serat Sekar jinarwi dening Sri Harto Jati)
Amarga saking dinukan dening ingkang rama (Begawan Sakri) Raden Palasara kesah ambeta rasa kogel jroning ati karana kasendu tilar amesu raga amung suka parisuka nuruti hardaning nala. Wahuta Raden Palasara amangun teki matahun tahun saged dipun jugaraken dening peksi emprit.
Mungguh pikajengipun: Tiyang ingkang ngupadi ilmu kasunyatan, boten badhe sumerep kasunyatan. Kasunyatan punika dhateng piyambak, boten kenging dipun padosi. Yen mekaten punapa lajeng , wis dak ora goleki ilmu kasunyatan , ben weruh kasunyatan. Tekad makaten punika inggih ateges madosi kasunyatan, sebab wonten kadjeng, ben weruh kasunyatan.
Tiyang boten mangertosi kasunyatan punika amargi kapepetan pamikiripun. Pikiran punika tangine pangeling eling jalaran kagugah dening kawontenan enggale margi kepanduk ing punapa punapa. Pangeling eling punika tutumpukaning panabeting sedaya pengalaman ingkang sampun kapengker. Dados sanyatane pangeling eling punika barang pejah. Amargi kantun tilasing kawontenan ingkang sampun kalampahan. Ateges sampun boten wonten. Samangsa tiyang kapanduking punapa punapa, elingipun tangi , inggih tanginipun eling wau ingkang kawastanan MIKIR. Ateges tangine pangeling eling punika oyode ebahing pikir. Pangalaman ingkang sampun dipun mangertosi, boten ngebahaken pikir ateges boten nabeti manah. Dene ingkang nabeti manah punika ingkang dereng dipun mangertosi. Temah tangi pangeling elingipun , temah pikir lajeng makarti kapijeng pijeng, nuwuhaken reribed temah dados bebandan saklebeting kunjara wesi. Punika gegambaranipun Raden Palasara badar anggenipun tapa ngupadosi babon emprit ingkang nyusuh wonten saknginggiling sirahipun. Gelise kandha resi palasara salah gawe dateng Dewi Durgandini wonten saktengahing prahu.
Mila mekaten awit boten sumerep dateng kajatening barang enggal ingkang dipun alami , inggih margi dipun resahi dening elingipun utawi pikiripun. Dene tiyang ingkang saged sumerep kasunyatan wiwinih MARDIKA manahipun.bebas boten katabetan punapa punapa. Tanpa gegayuhan tanpa idam idaman. Kothong blong winantu kapanujon pikiripun sidem permanem. Punika lambang Prabu Sentanu Dewa mireng pambiwara wonten sayembara pilih ing negri wirata kapilih dening Dewi Durgandini. Prasaja beta putra patutan kaliyan Batari Gangga idepe galih keparenga sang putri purung ngemong. Dewi durgandini purun dateng hastina menawi Dewa Brata sampun ageng. Sentanu amung narimah (Sentanu lambang srengenge tansah paring pangesangan kalebet gesanging raos).
Saweneh gadah kadjeng ladjeng nedya ngendhelaken pamikiripun ingkang sarana kinajengaken sarana ngeningaken cipta, punika kirang panalitinipun, kesupen bilih kadjeng ngendelaken pamikiripun punika inggih pakartining PIKIR, kendelipun pikir ingkang sarana kinajengaken punika boten kendel sawantahipun, nama kendel peksan, KEBRANGAS. Pepindane kadi matenge pisang suluhan. Sanadjan wujude mateng temenan nanging boten eca katedha. Makaten ugi kendeling pikir ingkang sarana kasedya (kapurba) katingale saking jawi kendel, nanging labetipun taksih umob, ing mriku boten angsal kasunyatan kajawi namung angsal gugubahaning ciptanipun piyambak.
Dipun lambangaken Dewi Durgandini dereng nyapih bayi wedalipun nyusoni damel cara sayembara pilih murih saged garwa Resi Palasara elok sanged menawi sampun gadah bojo geneya damel sayembara pilih? adile sing Kuasa kliru sing dipilih Sentanu Murti . Palasara ora trima nantang perang punika ateges taksih kringga (mentah) dipun teda boten eca lambangipun Dewi Durgandini dipun boyong wonten Astina dereng kersa sabab iline banyu susu taksih deres upami kadenangan emba kuciwane negara Wirata jejemberi asma, gawe wirange ratu sewu negara ingkang tumut samyembara.
Inggih wonten ing ngriku punika tiyang perlunipun mawas dhiri pribadi. Ngulataken samobak mosiking pikiran. Sinawang dipun ulataken kemawon. Boten dipun leresaken, boten dipun eloni, namung disawang thok tanpa panglimbang, menawi penyawangipun nyektosan, winantu amarengi kothong blong kados kasebut ing nginggil. Kasunyatan badhe andatengi, dhatengipun kasunyatan boten betahaken ucap ucapan(tiyang boten saged ngucap). Sabab rasa sampun sirna amung EMBUH, inggih makaten punika ingkang dipun basakaken leburing papan lan tulis (KODHOK NGEMULI LENGE).
Wusana menawi wonten galap gangsuling ukara kula nyuwun agunging pangaksami (ringgit gambar miring kang dianggit)
SALAM BUDAYA RAHAYU RAHAYU RAHAYU
Catetan :
Petikan saking Almenak
