BOTHOK BANTHENG KINUKUS GODHONG ASEM BINITHINGAN ALU BENGKONG
Lampahipun Prabu Kariti cumalorot saking swargaloka Kaindran kacandet dening Joko Cluntang makaten ingkang dados wuse pangandhika.
Joko Clunthang : " Ha...., He Ratune Hapsara saka swarga loka, apa uwis bosen anggonmu dadi lelananging jagad nglelanangi widadari2 ing Tinjomaya. Upama pancen ora bosen apa ora isin atase Hyang Atema lan Dewi Kawawati pilih mangan woh Budi (budi pekerti) ?. Iku mratanda ora jenak tumuli tumurun ana ing ngarcapadha."
Kariti : "Anggonku metu saka swarga loka Kaindran, ora liya buru buronku kang wani bosah baseke kaindran mawa cara balang kembang marang Aku sing lagi posah pasihan karo para hapsari, apa kowe dhelikake mara gage ulungna ?"
Joko clunthang : " Yen nutut takelingke, yen bangga taksembadani. Elinge mbahmu Resi Palasara diparingi triman Widadari kon ngrabi bae wegah nglakoni, ewadene canggahe direwangi mertapa dadi wong suci jebul entek2ane amung nguja nikmat pucuking ilat lan pucuking perji (planangan). Aran Janaki yaiku nganaki bareng manak ditinggal rabi, ora gelem ngopeni mangkono jagone dewa, arang temen kuthuk cilik2 kae gelem mlaku bareng karo bapake/jagone kepara karo babone. Apa iku lekase satriya utama tinuladha sasamine jalma ?"
Kariti badhar dados raden Arjuna tumuli sumungkem pepadhane Joko Clunthang, Joko Clunthang miwiti medhar pangawikan malih:
Joko Clunthang : " Anane Pangeran ayasa Boga lan Purusa marga ing kono Kang Maha Kawasa arsa anitahake Kawula sarana Asmara Gama. Dene kerkate senggama iku mengku rong perkara. Mituruti hawa nafsu jroning cipta amung rasa nikmate senggama, tan pisan-pisan anganggoni marang nurunake wiji anak aran pambaluntah tegese tanpa angon kalamangsa lan duga prayoga, elinga singa wae kawine setahun pisan lan manuk dara kae salawase ora ganthi pasangan. Bedamen karo jagone dewa ? Ora beda karo celeng boloten. Lekas kaya mangkono iku upama mati sukmane sakora-orane tan sampurna nitis ana iwak loh sing angel bali manjalma linahir manungsa.
Beda karo sing nganggo pepadhange angen-angen, sabab sanggama iku atas karsane Pangeran, kanggo lantaran tumedhake Hyang Sukma kang nurunake wujud yoga utawa titah (anak, kawula). Jroning sengama aja lirwa elinga marang kamurahane pangeran ngluhurake panguwasane. Jroning sanggama dikanteni pamuntunging cipta, jadmika ing solahbawa lan sirnane karep lereming pancadriya sumarah marang karsane pangeran, ing dhalem lantaran manuksma ning sukma. Adat lupiya anake dadi pinunjuling jalma. Yen anak kurang ajar angel didikane aja nyalahne anak, piye mula bukane anggone bibite ing suksma?"
Arjuna : "Adhuh sewu kalepatan kula geageng pangapura paduka kakang mas Jodipati, pun rayi nglenggana sakehing kalepatan , amung pasrah pejah gesang."
Joko Clunthang : "Ya yen wis eling ayo bali ana kasatriyan, ora susah nglengleng mendhem ngimpi ana ing kaendran, tak upamana nglengleng lan mendhem sabab ing Kaendran iku ora ana dina, ora ana awang ora ana wengi, gampange kaya wong ngimpi melek-melekan (nglamun-nglamong)."
Catetan :
(Serat Sekar Jinarwi dening Sri Harto Jati)
Kawruhipun Ki Ageng Paminihan tiyang dusun nurunake Ratu Jawi,
Tanpa mertapa saking mundi sabdane Jeng Sunan Kali bab Wiji Sejati.