DUH LAGI WIJINE WIJI SEJATINE CARITANE WUS RAMPUNG
(Serat Sekar Jinarwi dening Sri Harta Jati)
Prabu Pandu denira dahat sungkawaning galih , wit tan kapadaning karsa arsa jinunjung gumantya kepraboning kang rama, punapa malih angemuti tasih kagungang kadang wredha kakung. Sang Mahatma Bhisma hambobolehi dhateng ingkang pulunan Raden Pandu makaten pangandikanipun :
Bhisma : " Kulup aluwung mituhu marang sapakone kang rama, awit ngelingana kadangira kang sepuh mau darbe cacat salira yaiku tuna netra minangka ila-ilane ratu."
Pandu : " Duh, Wa Panemban .., anggen kula mupu sayembara wonten ing Mandura saged ngukup putri tetiga sedaya kula aturaken dhateng kakang Drestarasta kang kapundut namung kakang ratu .. Ing pangajap tembe wingkingipun putra kakang Drestarastra sageda jumeneng ratu. Jroning batin luwung anak kula sageda babad piyambak rumaos rasa eca sekeca kagungan nagara boten saking warisan."
Bhisma : " Iya, Aku melu nyekseni, aja lali nggonmu ngrebut Dewi Gendari iku direwangi gugur kakange Gendari aran Gendara, janjine kudu rabi jebul diendum kaya mas picis raja brana oleh2ane ngrampas. Elinga ukum wahana darana wanita aja dipadhake priasan donya, wanita lan priya drajate padha."
Pandu : " Kula tansah memundhi piwulang paduka wa panemban, sedaya lampah tindah sampun ginaris dening kawasa, saben2 wanci sampun tinetepaken badhe nandhang beja punapa cilaka, kawula sadrema nglampahi bebasan bengi ngimpi siang anemahi. Saged katembungaken duk wijine wiji sejatine caritane sampun purna, inggih kagem kang pinaringan ngerti sadurunge winarah."
Bhisma : " Nadyan lelakon kang uwis dilewati kebak panandhang nanging kudu teteg jumagÄ·ah datan tolah-toleh amung Gusti kang tinoleh, percaya dhiri tansah angucap jaya, mengko piye dadine pinasrahna marang Hyang Kang Murbeing pasthi."
Lagi eca denira agubem , kasaru pangamuking handaka wulung gya linepasan jemparing dening raden pandu babar dados Jaka Abilawa bocah dusun tumuli di dangu dening Raden Pandu :
Pandu : " Bocah desa apa sababe sira temahan wujud bantheng ireng?"
Jaka Abilawa : " Sewu-sewu kalepatan kula mugi ageng pangaksama ndika raden. Kula aran Jaka Abilawa saking dusun Ruji Pati, kula ngrumangsani anandhang lepat awit anyipta tindak kalenjehan dhateng semahe Ki Dhudawangkung pun Niken Satapen. Kadenangan dening Ki Dhudawangkung dipun elikaken mawi tetembungan ngarih2 , sarta ngucap Heh Jaka Abilawa isih tumaruna aja kaya celeng mbegonggok, sawangen banteng rosa birawa tan geleng ngrusak tanduran temahan nemu mulya. Satemah kula dados banteng."
Pandu : " Jaka Abilawa, Gandeng koe wus nalangsa marang kaluputanmu , karana jiwamu kaya banteng wani ing kewuh depani wutah darahmu, wiwit dina iki sira Sun sengkakake ngaluhur dadi manggalaning prajurit. Ora etung darahe sudra sampali waton duwe tekad banteng tetep wenang sinebut Satriya. "
Saking katebihan kaprungu swarane Ki Dudhawangkung tuwin warga dusun bengok2 nyebut asmane Jaka Abilawa kapurih wangsul badhe karuwat , dupi ketingal Jaka Abilawa caket Raden Pandu tuwin Resi Bhisma sedaya tumuli sami sumungkem, makaten unjuk aturipun.:
Dudhawangkung : " Aduh Raden, kula sakwarga dusun ngakoni kalepatan damel ukum pribadi ninggal ukum negari , boten ngelingi Kang Maha Kawasa sipat Maklum asih marang titahe. Anggen kula ketrucut nyupatani Jaka Abilawa dados utang panandhang gawe sengsarane selami-lami boten murwat kaliyan kalepatanipun.
Utang panandhang saure inggih panandhang, beja tinaggih ing donya sengsara manawi tinaggih ing delahan. Ati atos gawe supata rumangsa bombong kaya kinemong dewa runanggasa sekti mandraguna, sejatine atine isih kalepetaning rerenggan donya satemah kamuksane manggih pangranca amarga mentala ninggali sengsara sapadhane titahing Kawasa."
Pandu : " Ki Dudhawangkung katuran jumeneng dening paman Resi Bhisma.
Saderenge kula nyuwun pangapunten boten ateges guroni namung saenget kula Kang Maha Kawasa Karsane alus tan kena rinasa sedaya lelampahan kinarya lantarane warga manggih mulya, ing dinten samangke Jaka Abilawa sampun dados Manggalane prajurit , keparenga putra jengandika kula dadosaken manggalane prajurit, semanten ugi kula jumenengaken Brahmana."
Dudhawangkung : " Matur nuwun sanget raden, ngelingi ingkang saged ingkang kawasa mugi purun angresepi jagad. Saupami para Brahmana , satriya, waisiya, sudra sami tunggil padamelan karanten sajagad angaken saged sami ngegungaken dhiri boten purun ingkang purun kasoran.
Tegesipun Ingkang saged ingkang kawasa boten purun ngresepi jagad punika manungsa ingkang boten nindakaken budi pekerti. Kasanepakaken Satriya, Brahmana, Waisiya, Sudra nunggal padamelan dados cacamboran. Sing Brahmana sinambi dagang (Waisiya ) tartamtu kirang sampurna, Satriya ulah nangkoda( golek untunge dhiri pribadi/dagang) punika ambau kapine ambebayani.
Karanten tiyang sajagad sami angaken saged , sami angegungaken dhiri boten purun ingkang gelem kasoran namung dak kedugi wusanane boten mitayani. Punapa boten dipun penggalih rumiyin anggenipun badhe mulyakaken warga dusun."
Pandu : " Inggih Ki dudhawangkung, Paman Resi Bhisma sampun damel ketetepan semanten ugi kula , tetep percaya warga desa Rujipati anggonipun tumut memayu hayuning bawana."