TIRTA MAHENING KINALISAKE SALIRING DEDOSAN
Campuking perang ageng antarane wadya bala Negara Amerta lumawan Negara Jumapala dipun ajangi dening Prabu Sri denta wonten alun-alun Jati pura, senapati andel-andel Amarta Raden werkudara, gatotkaca, Antareja, Arjuna sedaya sami kepikut kacemplungaken cupu sakti dening Begawan Sintawaka (Begawan kutut putih). Ingkang dadosaken eraming penggalihe Sang Begawan dupi nyumurupi nom-noman kang kuasa brojol saking cupu kepara saged ngabaraken daya linuwihe cupu dados jalaran wilujenge satriya-satriya Amerta. Makaten pangandikane Sang Wiku.
Begawan : "Aku gumun setahun njinggleng serendheng sejatine ora ngimpi, takgegisik seranduning badanku isih krasa sikilku wae isih ngambah lemah, apa panyawangku sing kurang pramana lha kok ana manungsa bisa bedah cupu Hujalata . Heh sapa nak aranmu sakdurunge takrangket kanggo pangewan- ewane ratu gustiku.?"
Antasena : " Tepungke mbah, Aku Antasena. Apa wus bosen nggonmu mendhita salin slaga pengin mbedah kota boyong putri, ora idep isin tolehen anak putumu. Yen gelem dirembug sarana aris wurungna anggonmu pengin gebuk negara Amerta.
Apa kowe isih duwe sipat Butarepan, iku tegese rebut lungguh ana ing ngarep emoh disingkur jenengmu disebut-sebut wong, disanjung sanjung oleh-olehane dipunjung sega iwak pecel pitik? Watak kaya mangkono banjur menggok dadi kawatir disingkur lan kuwatir kesingkur saka bebrayan agung.
Begawan : " Hek Antasena, Butarepan watak becik-ala ora manira rembug mung manira prayogaake aja sira rangkepi ngukur slira supaya ora nuwuhi gendra."
Antasena : " Ngukur salira kok kira singawaki kepenak sing disrawungi ya kepenak iku salah mbah !.dhirine liyan tansah didakwa wewatekane lan tumindake pada kaya dhirine dewe. Dasare ora ngrumangsani dirine dewe iku bener apa luput, Kosok balene mulat salira. Watake Pandawa beda karo Kurawa."
Nggonmu ngukur dhirimu lan dhirine Pandawa mangkono iku isih jeneng DIRI yaiku isih sipat Aku Ijen. Lha rasa AKU ijen iku ngebot-boti tujuwan marang AKU sawutuhe. Rasa Aku ijen iku kena dayane hukum kodrat.
1. Becik kumpul becik bisa rukun, tentrem.
2. Becik kumpul ala yen si becik gelem kurban perasaan bisa runtut rukun si becik ora kepenak kasarane kelara-lara.
3.Ala kumpul ala mesthi ora runtut , mesthi crah dadi ora kepenak. Angger-angger Alam iku goleki golongan (soort zoekt soort) lire ala goleki golongane ala yen wis kumpul sedela banjur sulaya. Kaya Kowe mbah kumpul karo SENGKUNI (Sengkuni = Wong sing bosok atine manawa wong sing arep dikuwasani ora kena, wong-wong liyane diajak gething, dengki,.....sakora orane ana sing arep direbut pamore isa uga milike supaya tindake dibenerake wong-wong)
Apa kowe tetep arep ngadeg Aku ijen cara genahe Aku Begawan Kutut putih kondhang sekti wicaksana nelukake satriya Pandawa padha ngleset ana sangandap ampeane Begawan suci2ne manungsa. Elinga mbah iku begalane urip sing gedhe tumrape KASUNYATAN"
Trenyuh Sang Begawan Sitawaka tumuli angawe ingkang putra Prabu Sridenta kapurih nekuk dengkul angayom dhateng Pandawa karana kayungyun dening pepoyaning kautaman. Semanten ugi Raden Antasena angusadani patih Jumapala Ditya Amongdenta nirmala waluya jati, jati satemah mulya.
Saking :
(Serat Pakeliran Kamiyana dening Ikwan Aji Nugraha Jati)