Gladhèn Nganggit Tembang.
Werkudara Sinekar Geculan.
ꦒ꧀ꦭꦣꦺꦤ꧀ꦔꦁꦒꦶꦠ꧀ꦠꦼꦩ꧀ꦧꦁ꧉
ꦮꦼꦂꦏꦸꦣꦫꦱꦶꦤꦼꦏꦂꦒꦼꦕꦸꦭꦤ꧀꧈
Gladhèn Nganggit Tembang.
Werkudara Sinekar Geculan.
Plenikan Setunggal.
1. Balabak
Satriya agung luhur apindha meru,
dedegé,
rempyak-rempyak kadi barongan sinempyok,
lajuné,
hanekuk nawa ngaliwati karnané,
rawisé.
2. Balabak
Kendel sekti mahambara dhasar jujur,
ambegé,
prawira turta sembada ring palugon,
kridhané,
anteng tajem polatané arang kadhéng,
wuwusé.
3 - Balabak
Angregancang lwir Lintang Bimalinuhung,
ngadegé,
ngengreng hanjenggureng yèn pinandeng katon,
sigité,
tanpa pepindhan marang rama wibiné,
bektiné,
4 - Balabak
Apindha dwipangga sasra angalumpuk,
rosané,
yèn hamateg ji lwir sèwu gunung bobot,
slirané,
prasasat tan tinandhing maring dwijané,
setyané.
5 - Girisa
Lah menika ta warnaning,
Risang Panenggak Pandhawa,
putra Ratwagung Sri Pandhu,
Déwanata akekasih,
Radèn Harya Wrekudara,
Bimaséna Jayalaga,
Gandawastratmaja Dhandhun,
Bima Bhirawa Balawa.
6 - Girisa
Brataséna Pandhusiwi,
Séna Kusumadilaga,
Nagara Bayu Panutup,
Bayuputra Bayusiwi,
Wijaséna Dwijaséna,
Nagata Kusumayudha,
Bondhan Paksajandhu Bungkus,
Bayusuta Wayuninda.
7 - Wirangrong
Akekasih Pandhusiwi,
awét pranyata ing kono,
atmajanira Srinata Pandhu,
Séna nggegirisi,
Bayusuta Bayuputra,
atmaja Bayu Bathara.
8 - Wirangrong
Wrekudara mengku werdi,
andarbé padharan kados,
asu ajag ya wetengé wreku,
pun Bima awerdi,
gagah prakosa saha,
santosa jiwangganira.
9 - Wirangrong
Dyan Sindhuséna sesilih,
sumbaga jayèng palugon,
kawimbuhan budiné kang luhur,
tan mokal manawi,
Dyan Harya Wrekudara,
kinacèk samining satrya.
10 - Pranasmara
Satryatama kena lara,
nanging datan kena ing patiné,
kukuh wengkuh maring sesanggemané,
anebihi lampah cidra,
datan purun analisir,
tuhu yekti witaradya.
11 - Pranasmara
Akekasih pun Kowara,
krana kalangkung kondhang asmané,
binasakaken Jayalaga awét,
budiné kang jembar pindha
wiyaring pun jalanidhi,
amot hamengku aksama.
12 - Pranasmara
Satriya gagah birawa,
sembadèng warna muncar téjané,
tedhaking andana warih dhasaré,
godhèg wok asimbar jaja,
Nagara hamengku werdi,
dadi bèntènging nagara.
13 - Pangajapsih
Uga akekasih Sang Bayu Panutup,
kang minangka panutuping,
ikadasa pun cacahing kadang Bayu,
peparab Pandhita Sénawangi wastu,
nalika Risang Harya jumeneng wiku,
Harya Jodhipati krana,
mapan anèng Jodhipati,
Bondhan Paksajandhu,
samukawis wisa kalis.
14 - Pangajapsih
Sang Asigit uga asesilih Dhandhun,
anèng kono mralambangi,
manawi Sang Séna hangleksanani pun,
jejibahanira kanthi teguh kukuh,
sasat datan mungkur mring geguntur,
Gandawastratmaja ingkang,
dadi sinambating wangi,
awét putra Pandhu,
ya Gandawastra Sang Aji.
15 - Puspanjali
Wiwit Sang Harya truna,
tumeka diwasa,
datan naté numpak,
skathahing titihan,
ula-ulaning jaran,
pedhot sanalika,
natkala Risang Harya,
tindak hanitihi.
16 - Puspanjali
Numpak karéta sigra,
ambrol kanang rodha,
tan prabéda manawa,
nitih bak karéta,
semplok datanpa rupa,
karemenanira,
Sang Harya Wrekudara,
mung malumpat yekti.
17 - Puspanjali
Kekasih Wijaséna,
wija ya wijang,
uga ateges milah,
mengku makna manawa,
Radèn Wrekudara,
satriyatama kang,
kukuh hredayanira,
lan anggegirisi.
18 - Tebu Kasol
Sang Bhirawa,
ingkang mengku,
werdi gedhé saha medèni,
Bayusunu,
putra Hyang Nila,
Déwa Panguwasa Maruta.
19 - Mahésa Langit
Sesilih Wayuninda awét,
darbé kekuwatan wastu,
mijil saking prabawaning,
pun Sang Hyang Bathara Bayu,
yektos damel rahayu.
20 - Mahésa Langit
Sesilih Nagata werdiné,
ingkang sanyata mengku,
sasmita manawa yekti,
nalanira kukuh bakuh,
tan samar mring kang satuhu.
21. Mahésa Langit
Dwijaséna ing nalikané,
madhegé Sang Abagus,
minangka brahmana ardi,
kang mulang salwiring kawruh,
lair twin batos pinangguh.
Wonten candhakipun.
Awit saking lodhang saha kawigatosanipun kula ngaturaken agunging panuwun.
Rahayu Sanggyaning Tumitah.
Wargisastro kang amarni.
Nuwun.
Gambar amung minan
Sugeng sedaya para pewaos artikel Imajier Nuswantoro, dhalah para sutresna kinasih, mugi kanugrahanipun Panjenenganipun Gusti ingkang mawantu-wantu, manggeng hamewahana kekiyatan, kesarasan saha kaluhuraning budi ingkang utami.
Imajier Nuswantoro
