RATU NIR WIBAWA
KRATON ILANG WEWATON
BUDAYA SUDA KUNCARA
(Sinawung Sekar Wirangrong)
.png "RATU NIR WIBAWA KRATON ILANG WEWATON BUDAYA SUDA KUNCARA (Sinawung Sekar Wirangrong)") |
| Foto : Geger lagi di keraton Solo |
Wiranging tyas rongeh mosik,
kraton kinarya wewaton,
pandom budaya Jawa wus pupus,
sami rebut aji,
tan prabeda wong sudra,
padudon rayahan upa.
Sabda ratu wus tan bangkit,
mangrèh pra sentana kraton,
mamrih kawula samya sumuyud,
nglêluri memetri,
adicara budaya,
minangka cihna wong Jawa
Anèng sakurêbing langit,
lumahing bumi wus katon,
drajad pangkat donya brana iku,
akarya panggalih,
karoban hawa murka,
marlupa budi utama.
Jaman èdan kang kaèksi,
kabèh nedya dadi lakon,
mangarsa amuwus munthuk sabun,
yêkti suwung isi,
isin èling wus musna,
bakuné kudu keduman.
Rahayu sagung dumadi
Saking : Yoga Hart, Surabaya, Sept 2024.
ꦫꦠꦸꦤꦶꦂꦮꦶꦧꦮ
ꦏꦿꦠꦺꦴꦤ꧀ꦆꦭꦁꦮꦼꦮꦠꦺꦴꦤ꧀
ꦧꦸꦣꦪꦱꦸꦣꦏꦸꦚ꧀ꦕꦫ
(ꦱꦶꦤꦮꦸꦁꦱꦼꦏꦂꦮꦶꦫꦔꦿꦺꦴꦁ)
ꦮꦶꦫꦔꦶꦁꦠꦾꦱ꧀ꦫꦺꦴꦔꦺꦃꦩꦺꦴꦱꦶꦏ꧀
ꦏꦿꦠꦺꦴꦤ꧀ꦏꦶꦤꦂꦪꦮꦼꦮꦠꦺꦴꦤ꧀
ꦥꦤ꧀ꦝꦺꦴꦩ꧀ꦧꦸꦣꦪꦗꦮꦮꦸꦱ꧀ꦥꦸꦥꦸꦱ꧀
ꦱꦩꦶꦉꦧꦸꦠ꧀ꦄꦗꦶ꧈
ꦠꦤ꧀ꦥꦿꦧꦺꦣꦮꦺꦴꦁꦱꦸꦣꦿ꧈
ꦥꦣꦸꦣꦺꦴꦤ꧀ꦫꦪꦲꦤ꧀ꦈꦥ꧉
ꦱꦧ꧀ꦝꦫꦠꦸꦮꦸꦱ꧀ꦠꦤ꧀ꦧꦁꦏꦶꦠ꧀
ꦩꦔꦿꦺꦃꦥꦿꦱꦼꦤ꧀ꦠꦤꦏꦿꦠꦺꦴꦤ꧀
ꦩꦩꦿꦶꦃꦏꦮꦸꦭꦱꦩꦾꦱꦸꦩꦸꦪꦸꦣ꧀
ꦔ꧀ꦭꦼꦭꦸꦫꦶꦩꦼꦩꦼꦠꦿꦶ꧈
ꦄꦣꦶꦕꦫꦧꦸꦣꦪ꧈
ꦩꦶꦤꦁꦏꦕꦶꦃꦤꦮꦺꦴꦁꦗꦮ
ꦄꦤꦺꦁꦱꦏꦸꦉꦧꦶꦁꦭꦔꦶꦠ꧀
ꦭꦸꦩꦲꦶꦁꦧꦸꦩꦶꦮꦸꦱ꧀ꦏꦠꦺꦴꦤ꧀
ꦣꦿꦗꦣ꧀ꦥꦁꦏꦠ꧀ꦝꦺꦴꦚꦧꦿꦤꦆꦏꦸ꧈
ꦄꦏꦂꦪꦥꦁꦒꦭꦶꦃ꧈
ꦏꦫꦺꦴꦧꦤ꧀ꦲꦮꦩꦸꦂꦏ꧈
ꦩꦂꦭꦸꦥꦧꦸꦣꦶꦈꦠꦩ꧉
ꦗꦩꦤ꧀ꦌꦣꦤ꧀ꦏꦁꦏꦌꦏ꧀ꦱꦶ꧈
ꦏꦧꦺꦃꦤꦼꦣꦾꦣꦝꦶꦭꦏꦺꦴꦤ꧀
ꦩꦔꦂꦱꦄꦩꦸꦮꦸꦱ꧀ꦩꦸꦤ꧀ꦛꦸꦏ꧀ꦱꦧꦸꦤ꧀
ꦪꦼꦏ꧀ꦠꦶꦱꦸꦮꦸꦁꦆꦱꦶ꧈
ꦆꦱꦶꦤ꧀ꦌꦭꦶꦁꦮꦸꦱ꧀ꦩꦸꦱ꧀ꦤ꧈
ꦧꦏꦸꦤꦺꦏꦸꦣꦸꦏꦼꦣꦸꦩꦤ꧀꧈
ꦫꦲꦪꦸꦱꦒꦸꦁꦣꦸꦩꦣꦶ
꧋ꦱꦏꦶꦁ꧇ꦪꦺꦴꦒꦲꦂꦠ꧀ꦯꦸꦫꦨꦪ꧈ꦱꦼꦥ꧀ꦠ꧀꧇꧒꧐꧒꧔꧇꧉
