TULUNG TINULUNG MINANGKA RERUBA MARANG HYANG WISESA
(Serat Mintaraga/Pustaka raja purwa yasanipun R.Ng Rangga Warsita)
Sabda pangandikane Kresna marang begawan Mandrasa. Kacarita nalika Dewi Wara Subadra murca ginawa raseksi marang satengahing wana, sahingga kalunta-lunta. Mbabar putra Raden Jaka Pengalasan/Abimanyu ana ing pabaratan banjur pinanggih lan pinilala begawan Mandrasa ing wukir Sadara, sabanjure nuli kaupadi ingkang raka Prabu Kresna kepanggih, sang nata dahat panarimane marang sang begawan Mandrasa lan para cantrik, endang tsp. Muga winalesa ing Jawata. Nuli ature begawan Mandrasa mangkene :
"Dhuh Sang Nata bijaksana, menggah mekaten punika masa mborong, etangipun agesang punika kajawi kerabat kasipat, saestu sipat punika anari kawelasan, sanadyan lelampahan wau darmi anglampahi, peparenge titah tulung tinulungan, bebasan jagul kenging pandamel gugur redi, yen imbanganipun tiyang manggih boja(sega) sanalika, menawi kekathahen tanpa rewang tuwuk kamlekeran, bilih menawi rinewangan tur eca tuwuk sedaya, mekaten pepiridaning pandhita, minangka reruba ing Dewata."
Prabu Kresna miyarsa langkung suka, pangadikanipun :
"Dhuh Sang Wiku nadyan Ratu inggih makaten amirsani dhateng kawulanipun, ingkang kekirangan tedha. Ingkang dipun tembungaken kekirangan tedha punika ingkang mlarat sugih anak putu. Wondene sanadyan mlarat menawi saking kekathahen pekareman, boten pantes ginanjar, malah dipun sesuluh pakempalanipun. Kaping kalih kedah nyumurupi kang pujabrata , awit dadhos cagaking praja".
Resi Mandrasa:" Dhuh Sinuhun ingkang anetra batara, sampun salimrahipun jalmi sami angegungaken tulung tinulung, ewa dene manungsa ingkang boten tatajalmi emboh carane. Lagi semut kemawon sami tulung tinulung boten kagungan sipat Iblis laknat , ingkang mengku werdi iblis kadadeyan saking agni dene agni punika urupe mandhuwur, menggah gamblangipun sipat rumangsa dhuwur, paling pinter, paling bener, paling suci, paling sakti punika tartamtu tebih saking karukunan, inggih rasa Aku ingkang dereng saged dikendhaleni."
Dangu ingkang sami rerembagan kasaru rawuhe Raden Arjuna tuwin kadang2 pandhawa, gancanging carita sadaya makempalaken tekad sumedya ngrampungaken pepeteng ingkang dumunung ing kasatriyan Madukara ngantos purnaning gati. Sadaya sami manggih rahayu.
Wasana menawi wonten ukara ingkang boten mranani dhiri kula nyuwun agunging pangaksami.
Salam budaya
RAHAYU RAHAYU RAHAYU
Aksara Jawanipun :
꧋ꦠꦸꦭꦸꦁꦠꦶꦤꦸꦭꦸꦁꦩꦶꦤꦁꦏꦉꦫꦸꦧꦩꦫꦁꦲꦾꦁꦮꦶꦱꦺꦱ
꧋(ꦱꦼꦫꦠ꧀ꦩꦶꦤ꧀ꦠꦫꦒ/ꦥꦸꦱ꧀ꦠꦏꦫꦗꦥꦸꦂꦮꦪꦱꦤꦶꦥꦸꦤ꧀ꦫ꧀꧈ꦔ꧀ꦫꦁꦒꦮꦂꦱꦶꦠ)
꧋ꦱꦧ꧀ꦝꦥꦔꦤ꧀ꦝꦶꦏꦤꦺꦏꦿꦼꦱ꧀ꦤꦩꦫꦁꦧꦼꦒꦮꦤ꧀ꦩꦤ꧀ꦝꦿꦱ꧉ꦏꦕꦫꦶꦠꦤꦭꦶꦏꦣꦺꦮꦶꦮꦫꦱꦸꦧꦣꦿꦩꦸꦂꦕꦒꦶꦤꦮꦫꦱꦺꦏ꧀ꦱꦶꦩꦫꦁꦱꦠꦺꦔꦲꦶꦁꦮꦤ꧈ꦱꦲꦶꦁꦒꦏꦭꦸꦤ꧀ꦠꦭꦸꦤ꧀ꦠ꧉ꦩ꧀ꦧꦧꦂꦥꦸꦠꦿꦫꦣꦺꦤ꧀ꦗꦏꦥꦼꦔꦭꦱꦤ꧀/ꦄꦧꦶꦩꦚꦸꦄꦤꦆꦁꦥꦧꦫꦠꦤ꧀ꦧꦚ꧀ꦗꦸꦂꦥꦶꦤꦁꦒꦶꦃꦭꦤ꧀ꦥꦶꦤꦶꦭꦭꦧꦼꦒꦮꦤ꧀ꦩꦤ꧀ꦝꦿꦱꦆꦁꦮꦸꦏꦶꦂꦱꦣꦫ꧈ꦱꦧꦚ꧀ꦗꦸꦫꦺꦤꦸꦭꦶꦏꦻꦴꦥꦣꦶꦆꦁꦏꦁꦫꦏꦥꦿꦧꦸꦏꦿꦼꦱ꧀ꦤꦏꦼꦥꦁꦒꦶꦃ꧈ꦱꦁꦤꦠꦣꦲꦠ꧀ꦥꦤꦫꦶꦩꦤꦺꦩꦫꦁꦱꦁꦧꦼꦒꦮꦤ꧀ꦩꦤ꧀ꦝꦿꦱꦭꦤ꧀ꦥꦫꦕꦤ꧀ꦠꦿꦶꦏ꧀ꦌꦤ꧀ꦝꦁꦠ꧀ꦱ꧀ꦥ꧀꧈ꦩꦸꦒꦮꦶꦤꦭꦺꦱꦆꦁꦗꦮꦠ꧉ꦤꦸꦭꦶꦄꦠꦸꦫꦺꦧꦼꦒꦮꦤ꧀ꦩꦤ꧀ꦝꦿꦱꦩꦁꦏꦺꦤꦺ꧇
꧋"ꦣꦸꦃꦱꦁꦤꦠꦧꦶꦗꦏ꧀ꦱꦤ꧈ꦩꦼꦁꦒꦃꦩꦼꦏꦠꦺꦤ꧀ꦥꦸꦤꦶꦏꦩꦱꦩ꧀ꦧꦺꦴꦫꦺꦴꦁ꧈ꦄꦼꦠꦔꦶꦥꦸꦤ꧀ꦄꦒꦺꦱꦁꦥꦸꦤꦶꦏꦏꦗꦮꦶꦏꦼꦫꦧꦠ꧀ꦏꦱꦶꦥꦠ꧀ꦱꦌꦱ꧀ꦠꦸꦱꦶꦥꦠ꧀ꦥꦸꦤꦶꦏꦄꦤꦫꦶꦏꦮꦺꦭꦱꦤ꧀ꦱꦤꦣꦾꦤ꧀ꦊꦭꦩ꧀ꦥꦲꦤ꧀ꦮꦻꦴꦣꦂꦩꦶꦄꦁꦭꦩ꧀ꦥꦲꦶ꧈ꦥꦼꦥꦫꦺꦔꦺꦠꦶꦠꦃꦠꦸꦭꦸꦁꦠꦶꦤꦸꦭꦸꦔꦤ꧀ꦧꦼꦧꦱꦤ꧀ꦗꦒꦸꦭ꧀ꦏꦼꦔꦶꦁꦥꦤ꧀ꦝꦩꦺꦭ꧀ꦒꦸꦒꦸꦂꦉꦣꦶ꧈ꦪꦺꦤ꧀ꦆꦩ꧀ꦧꦔꦤꦶꦥꦸꦤ꧀ꦠꦶꦪꦁꦩꦁꦒꦶꦃꦧꦺꦴꦗ(ꦱꦼꦒ)ꦱꦤꦭꦶꦏ꧈ꦩꦼꦤꦮꦶꦏꦼꦏꦛꦲꦺꦤ꧀ꦠꦤ꧀ꦥꦫꦺꦮꦁꦠꦸꦮꦸꦏ꧀ꦏꦩ꧀ꦭꦺꦏꦺꦫꦤ꧀ꦧꦶꦭꦶꦃꦩꦼꦤꦮꦶꦫꦶꦤꦺꦮꦔꦤ꧀ꦠꦸꦂꦄꦼꦕꦠꦸꦮꦸꦏ꧀ꦱꦼꦣꦪ꧈ꦩꦼꦏꦠꦺꦤ꧀ꦥꦼꦥꦶꦫꦶꦣꦤꦶꦁꦥꦤ꧀ꦝꦶꦠ꧈ꦩꦶꦤꦁꦏꦉꦫꦸꦧꦆꦁꦣꦺꦮꦠ꧉"
ꦥꦿꦧꦸꦏꦿꦼꦱ꧀ꦤꦩꦶꦪꦂꦱꦭꦁꦏꦸꦁꦱꦸꦏ꧈ꦥꦔꦣꦶꦏꦤꦶꦥꦸꦤ꧀꧇
꧋"ꦣꦸꦃꦱꦁꦮꦶꦏꦸꦤꦣꦾꦤ꧀ꦫꦠꦸꦆꦁꦒꦶꦃꦩꦏꦠꦺꦤ꧀ꦄꦩꦶꦂꦱꦤꦶꦣꦠꦺꦁꦏꦮꦸꦭꦤꦶꦥꦸꦤ꧀ꦆꦁꦏꦁꦏꦼꦏꦶꦫꦔꦤ꧀ꦠꦼꦣ꧉ꦆꦁꦏꦁꦣꦶꦥꦸꦤ꧀ꦠꦼꦩ꧀ꦧꦸꦔꦏꦺꦤ꧀ꦏꦼꦏꦶꦫꦔꦤ꧀ꦠꦼꦣꦥꦸꦤꦶꦏꦆꦁꦏꦁꦩ꧀ꦭꦫꦠ꧀ꦱꦸꦒꦶꦃꦄꦤꦏ꧀ꦥꦸꦠꦸ꧉ꦮꦺꦴꦤ꧀ꦝꦺꦤꦺꦱꦤꦣꦾꦤ꧀ꦩ꧀ꦭꦫꦠ꧀ꦩꦼꦤꦮꦶꦱꦏꦶꦁꦏꦼꦏꦛꦲꦺꦤ꧀ꦥꦼꦏꦫꦺꦩꦤ꧀ꦧꦺꦴꦠꦺꦤ꧀ꦥꦤ꧀ꦠꦺꦱ꧀ꦒꦶꦤꦚ꧀ꦗꦂ꧈ꦩꦭꦃꦣꦶꦥꦸꦤ꧀ꦱꦼꦱꦸꦭꦸꦃꦥꦏꦺꦩ꧀ꦥꦭꦤꦶꦥꦸꦤ꧀꧈ꦏꦥꦶꦁꦏꦭꦶꦃꦏꦼꦣꦃꦚꦸꦩꦸꦫꦸꦥꦶꦏꦁꦥꦸꦗꦧꦿꦠ꧈ꦄꦮꦶꦠ꧀ꦝꦣꦺꦴꦱ꧀ꦕꦒꦏꦶꦁꦥꦿꦗ"꧉
꧋ꦉꦱꦶꦩꦤ꧀ꦝꦿꦱ꧇"ꦣꦸꦃꦱꦶꦤꦸꦲꦸꦤ꧀ꦆꦁꦏꦁꦄꦤꦺꦠꦿꦧꦠꦫ꧈ꦱꦩ꧀ꦥꦸꦤ꧀ꦱꦭꦶꦩꦿꦲꦶꦥꦸꦤ꧀ꦗꦭ꧀ꦩꦶꦱꦩꦶꦄꦔꦺꦒꦸꦔꦏꦺꦤ꧀ꦠꦸꦭꦸꦁꦠꦶꦤꦸꦭꦸꦁ꧈ꦄꦼꦮꦣꦼꦤꦼꦩꦤꦸꦁꦱꦆꦁꦏꦁꦧꦺꦴꦠꦺꦤ꧀ꦠꦠꦗꦭ꧀ꦩꦶꦄꦼꦩ꧀ꦧꦺꦴꦃꦕꦫꦤꦺ꧉ꦭꦒꦶꦱꦼꦩꦸꦠ꧀ꦏꦼꦩꦮꦺꦴꦤ꧀ꦱꦩꦶꦠꦸꦭꦸꦁꦠꦶꦤꦸꦭꦸꦁꦧꦺꦴꦠꦺꦤ꧀ꦏꦒꦸꦔꦤ꧀ꦱꦶꦥꦠ꧀ꦆꦧ꧀ꦭꦶꦱ꧀ꦭꦏ꧀ꦤꦠ꧀ꦆꦁꦏꦁꦩꦼꦁꦏꦸꦮꦼꦂꦣꦶꦆꦧ꧀ꦭꦶꦱ꧀ꦏꦣꦝꦺꦪꦤ꧀ꦱꦏꦶꦁꦄꦒ꧀ꦤꦶꦣꦼꦤꦼꦄꦒ꧀ꦤꦶꦥꦸꦤꦶꦏꦈꦫꦸꦥꦺꦩꦤ꧀ꦝꦸꦮꦸꦂ꧈ꦩꦼꦁꦒꦃꦒꦩ꧀ꦧ꧀ꦭꦔꦶꦥꦸꦤ꧀ꦱꦶꦥꦠ꧀ꦫꦸꦩꦁꦱꦣꦸꦮꦸꦂ꧈ꦥꦭꦶꦁꦥꦶꦤ꧀ꦠꦺꦂ꧈ꦥꦭꦶꦁꦧꦼꦤꦼꦂ꧈ꦥꦭꦶꦁꦱꦸꦕꦶ꧈ꦥꦭꦶꦁꦱꦏ꧀ꦠꦶꦥꦸꦤꦶꦏꦠꦂꦠꦩ꧀ꦠꦸꦠꦼꦧꦶꦃꦱꦏꦶꦁꦏꦫꦸꦏꦸꦤꦤ꧀ꦆꦁꦒꦶꦃꦫꦱꦄꦏꦸꦆꦁꦏꦁꦣꦼꦉꦁꦱꦒꦺꦣ꧀ꦝꦶꦏꦺꦤ꧀ꦝꦭꦺꦤꦶ꧉"
꧋ꦣꦔꦸꦆꦁꦏꦁꦱꦩꦶꦉꦉꦩ꧀ꦧꦒꦤ꧀ꦏꦱꦫꦸꦫꦮꦸꦲꦺꦫꦣꦺꦤ꧀ꦄꦂꦗꦸꦤꦠꦸꦮꦶꦤ꧀ꦏꦣꦁ꧇꧒꧇ꦥꦤ꧀ꦝꦮ꧈ꦒꦚ꧀ꦕꦔꦶꦁꦕꦫꦶꦠꦱꦣꦪꦩꦏꦺꦩ꧀ꦥꦭꦏꦺꦤ꧀ꦠꦺꦏꦣ꧀ꦱꦸꦩꦺꦣꦾꦔꦿꦩ꧀ꦥꦸꦔꦏꦺꦤ꧀ꦥꦼꦥꦼꦠꦼꦁꦆꦁꦏꦁꦣꦸꦩꦸꦤꦸꦁꦆꦁꦏꦱꦠꦿꦶꦪꦤ꧀ꦩꦣꦸꦏꦫꦔꦤ꧀ꦠꦺꦴꦱ꧀ꦥꦸꦂꦤꦤꦶꦁꦒꦠꦶ꧉ꦱꦣꦪꦱꦩꦶꦩꦁꦒꦶꦃꦫꦲꦪꦸ꧉
꧋ꦮꦱꦤꦩꦼꦤꦮꦶꦮꦺꦴꦤ꧀ꦠꦺꦤ꧀ꦈꦏꦫꦆꦁꦏꦁꦧꦺꦴꦠꦺꦤ꧀ꦩꦿꦤꦤꦶꦣꦶꦫꦶꦏꦸꦭꦚꦸꦮꦸꦤ꧀ꦄꦒꦸꦔꦶꦁꦥꦔꦏ꧀ꦱꦩꦶ꧉
ꦱꦭꦩ꧀ꦧꦸꦣꦪ
ꦫꦲꦪꦸꦫꦲꦪꦸꦫꦲꦪꦸ
Imajiner Nuswantoro
