MANUK KEDASIH / EMPRIT GANTIL
Ujare ibuku rikala jaman isih cilik jaman dhisik, manuk iki kalebu imigran. Jare tekane saka Timur Tengah. "Coba kae rungokna !! Tit tit tiirr. Prit prit balekna nyang Mesir...". Kala semana aku percaya wae. Manuk iki arane Emprit Gantil.
Ana uga mitos, yen keprungu manuk iki bakal ana pepati. Bener apa ora nyumanggakake.
Nanging yen disinaoni watak wantune manuk iki yekti mitos ing dhuwur ana benere.
Manuk wadon sing birahi mesthi nyuwara sora celuk-celuk manuk lanang kang gelem dadi pasangane. Sawuse kawin lan pingin ngendhog, dheweke golek susuh manuk liya sing luwih cilik, lan ngendhog ing kono. Endhoge luwih gedhe tinimbang endhog manuk liya mau.
Manuk wadon ora gelem angkrem. Pasrah bongkokan marang manuk kang duwe susuh. Semono uga sawuse netes, manuk sing kanggonan sing ngopeni.
Sawuse netes anak Emprit Gantil sing gedhe ukurane banget srakahe. Panganane dulure mesthi diroyok. Uga tansah budidaya dulur-dulure cilaka, disronggoli nganti ceblok saka susuhe. Pungkasane panganan saka simbokne amung dheweke sing nguntal.
Ing kasusastran, mligine crita silat, unine manuk iki asring ditiru kanggo sasmita sandhi prajurit sing ngayahi tugas kanthi dhedhemitan. Kanggo piranti komunikasi marang balane.
