PANGAJABKU
Sawarsa wus lumaksana
Titiwanci kang anyar bakal gumanti
Kang lawas tilar ing pungkur
Dadya seksi kridhanya
Hamecaki sadawane risang wektu
Pait-manis kang kapanggya
Yeku bumbune ngaurip
Murih dadya lelimbangan
Saniskara kang huwus denlakoni
Kang ala binuwang semprung
Kang becik ugemana
Kuwi dalan tumuju urip rahayu
Jer kang eling lan waspada
Widada samargi-margi
Hamapag warsa kang anyar
Lelambaran cipta rasa kang suci
Anggayuh panjangka luhur
Marmane kawruhana
Sakeh pitutur nguni kang adiluhung
Mrih tansah nemu raharja
Sing taliti ngati-ati
Kang baku ywa kongsi lirwa
Anggung ngestu pada ngonjuk pepuji
Mring Gusti Kang Maha Luhur
Mrih tansah jinangkunga
Muga urip hayom hayem kang kapangguh
Tebih saking sambekala
Urip tentrem sagung batih
Amin.
