BATHARA KALA
Bethara Kala tumekeng pralaya ketiban gada inten pusakane Wisanggeni. Wisanggeni iku atmajane Raden Janaka, panengahe Pandhawa, dene keng Ibu yaiku sawijining widadari asma Bethari Dresanala putri Bethara Brama. Wisanggeni sawijining nom-noman kang lantip, kendel, ora nduweni rasa wedi marang sapa wae tur ya sekti mandraguna. Dheweke ora tau basa yen guneman marang sapa wae, kejaba marang Sang Hyang Wenang. Wiwit cilik dheweke manggon ing kahyanganing Sang Hyang Wenang.
Nalika ngarepake perang gedhe Brantayuda Jayabinangun, Wisanggeni dalah Antasena katimbalan dening Sang Hyang Wenang, kautus mbiyantu para Pandhawa kanggo mateni Bethara Kala lan Bethari Durga supaya ora bisa mbiyantu Kurawa ana ing perang Brantayuda.
Sawise nindakake jejibahane nyirnaake Bethara Kala lan Bethari Durga, Wisanggeni dalah Antasena sowan ing kahyangan Sang Hyang Wenang lan paarah jiwaraga mring Sang Hyang Wenang awit kuwajibane ing alam donya wus paripurna.
Sang Hyang Wenang arsa nyampurnakke kekarone supaya bisa lumebu ing kaswargan jati. Sawise kekarone padha nduweni antebing manah ndherek kersaning Sang Hyang Wenang, mula Sang Hyang wenang paring marga tumuju ing kasampurnaning titah sakloron. Nalika socaning Sang Hyang Wenang ngedalke cahya kang tempuk kalawan soroting mripate Wisanggeni lan Antasena, kekarone banjur saya mengkeret lan saya cilik nganti ilang mlebu ing kaswargan jati.
mBokmenawa titisane Bethara Kala ing jaman iki uga ana, kacihna ana pawongan kang tansah dadi dhalange kisruh ing negara Indonesia. Apa ya dheweke bakal nemahi sirna margalayu dening "satriya" kang lantip, kendel, ora duwe rasa wedi marang sapa wae lan tansah tumindak tanpa pamrih mbrastha angkaramurka.
Wektu kang bakal paring wangsulaning pitakon iku.
