Kidungan Dandang Gendis
1.
Wonten kidung kekancinging ratri
Hanepangken dununging panembah
Inggih niku sejatine
Allah kang maha agung
Kang hanyipta sagung dumadi
Kang rumeksa, misesa
Kabeh titahipun
Bumi, langit sak isinya
Jalma, sato, malaikat myang sagung jin
Lan uga tetuwuhan.
2.
Allah niku pan asipat dhahir
Naning ugi asesipat batos
Ya kang awal lan akhire
Datan asipat jalu
Nanging ugi tan asipat estri
Datan sipat peputra
Nanging ugi tuhu
Tan pinutrakken sayektos
Sagung titah gumantung mring Allah Gusti
Ya kang maha kawasa.
3.
Inggih Allah kang paring rejeki
Maha asih tur ya maha welas
Ingkang tansah nggatosake
Marang titah sadarum
Kang nentokken urip lan pati
Jodo, sangat lan qodar
Sadaya tinemtu
Maha paring pangapura
Maha sugih, maha wenang, maha suci
Tur ugi maha pirsa.
4.
Allah sangkan paraning dumadi
Lire sangkan pan sagung dumados
Nggih Allah Gusti asale
Bumi gumelar niku
Langit kang kajunjung puniki
Wulan, surya lan mega
Kali saha gunung
Angin, udan myang samudra
Jalma, sato, tuwuhan, malaikat, jin
Inggih Allah asalnya.
5.
Lire paran sejatine niki
Dateng Allah sadaya purugnya
Yen wus tekan ing wancine
Kabeh kapundut wangsul
Bali marang Allah sayekti
Mila tansah elinga
Dateng Allah niku
Tansah pasrah lan sumarah
Nggega dawuh lan wewaler den tebihi
Titah hamung saderma.
Tulisan aksara Jawanipun :
ꦏꦶꦣꦸꦔꦤ꧀ꦝꦤ꧀ꦝꦁꦒꦼꦤ꧀ꦝꦶꦱ꧀꧈
꧇꧑꧇꧉
ꦮꦺꦴꦤ꧀ꦠꦺꦤ꧀ꦏꦶꦣꦸꦁꦏꦼꦏꦚ꧀ꦕꦶꦔꦶꦁꦫꦠꦿꦶ
ꦲꦤꦺꦥꦁꦏꦺꦤ꧀ꦝꦸꦤꦸꦔꦶꦁꦥꦤꦺꦩ꧀ꦧꦃ
ꦆꦁꦒꦶꦃꦤꦶꦏꦸꦱꦼꦗꦠꦶꦤꦺ
ꦄꦭ꧀ꦭꦃꦏꦁꦩꦲꦄꦒꦸꦁ
ꦏꦁꦲꦚꦶꦥ꧀ꦠꦱꦒꦸꦁꦣꦸꦩꦣꦶ
ꦏꦁꦫꦸꦩꦺꦏ꧀ꦱ꧈ꦩꦶꦱꦺꦱ
ꦏꦧꦺꦃꦠꦶꦠꦲꦶꦥꦸꦤ꧀
ꦧꦸꦩꦶ꧈ꦭꦔꦶꦠ꧀ꦱꦏ꧀ꦆꦱꦶꦚ
ꦗꦭ꧀ꦩ꧈ꦱꦠꦺꦴ꧈ꦩꦭꦻꦏꦠ꧀ꦩꦾꦁꦱꦒꦸꦁꦗꦶꦤ꧀
ꦭꦤ꧀ꦈꦒꦠꦼꦠꦸꦮꦸꦲꦤ꧀꧈
꧇꧒꧇꧉
ꦄꦭ꧀ꦭꦃꦤꦶꦏꦸꦥꦤ꧀ꦄꦱꦶꦥꦠ꧀ꦝꦲꦶꦂ
ꦤꦤꦶꦁꦈꦒꦶꦄꦱꦺꦱꦶꦥꦠ꧀ꦧꦠꦺꦴꦱ꧀
ꦪꦏꦁꦄꦮꦭ꧀ꦭꦤ꧀ꦄꦏ꦳ꦶꦫꦺ
ꦣꦠꦤ꧀ꦄꦱꦶꦥꦠ꧀ꦗꦭꦸ
ꦤꦔꦶꦁꦈꦒꦶꦠꦤ꧀ꦄꦱꦶꦥꦠ꧀ꦄꦼꦱ꧀ꦠꦿꦶ
ꦣꦠꦤ꧀ꦱꦶꦥꦠ꧀ꦥꦼꦥꦸꦠꦿ
ꦤꦔꦶꦁꦈꦒꦶꦠꦸꦲꦸ
ꦠꦤ꧀ꦥꦶꦤꦸꦠꦿꦏ꧀ꦏꦺꦤ꧀ꦱꦪꦺꦏ꧀ꦠꦺꦴꦱ꧀
ꦱꦒꦸꦁꦠꦶꦠꦃꦒꦸꦩꦤ꧀ꦠꦸꦁꦩꦿꦶꦁꦄꦭ꧀ꦭꦃꦒꦸꦱ꧀ꦠꦶ
ꦪꦏꦁꦩꦲꦏꦮꦱ꧉
꧇꧓꧇꧉
ꦆꦁꦒꦶꦃꦄꦭ꧀ꦭꦃꦏꦁꦥꦫꦶꦁꦉꦗꦼꦏꦶ
ꦩꦲꦄꦱꦶꦃꦠꦸꦂꦪꦩꦲꦮꦼꦭꦱ꧀
ꦆꦁꦏꦁꦠꦤ꧀ꦱꦃꦔ꧀ꦒꦠꦺꦴꦱꦏꦺ
ꦩꦫꦁꦠꦶꦠꦃꦱꦣꦫꦸꦩ꧀
ꦏꦁꦤꦼꦤ꧀ꦠꦺꦴꦏ꧀ꦏꦺꦤ꧀ꦈꦫꦶꦥ꧀ꦭꦤ꧀ꦥꦠꦶ
ꦗꦺꦴꦣꦺꦴ꧈ꦱꦔꦠ꧀ꦭꦤ꧀ꦐꦺꦴꦣꦂ
ꦱꦣꦪꦠꦶꦤꦺꦩ꧀ꦠꦸ
ꦩꦲꦥꦫꦶꦁꦥꦔꦥꦸꦫ
ꦩꦲꦱꦸꦒꦶꦃ꧈ꦩꦲꦮꦼꦤꦁ꧈ꦩꦲꦱꦸꦕꦶ
ꦠꦸꦂꦈꦒꦶꦩꦲꦥꦶꦂꦱ꧉
꧇꧔꧇꧉
ꦄꦭ꧀ꦭꦃꦱꦁꦏꦤ꧀ꦥꦫꦤꦶꦁꦣꦸꦩꦣꦶ
ꦭꦶꦫꦺꦱꦁꦏꦤ꧀ꦥꦤ꧀ꦱꦒꦸꦁꦣꦸꦩꦣꦺꦴꦱ꧀
ꦔ꧀ꦒꦶꦃꦄꦭ꧀ꦭꦃꦒꦸꦱ꧀ꦠꦶꦄꦱꦭꦺ
ꦧꦸꦩꦶꦒꦸꦩꦺꦭꦂꦤꦶꦏꦸ
ꦭꦔꦶꦠ꧀ꦏꦁꦏꦗꦸꦚ꧀ꦗꦸꦁꦥꦸꦤꦶꦏꦶ
ꦮꦸꦭꦤ꧀ꦱꦸꦂꦪꦭꦤ꧀ꦩꦺꦒ
ꦏꦭꦶꦱꦲꦒꦸꦤꦸꦁ
ꦄꦔꦶꦤ꧀ꦈꦣꦤ꧀ꦩꦾꦁꦱꦩꦸꦣꦿ
ꦗꦭ꧀ꦩ꧈ꦱꦠꦺꦴ꧈ꦠꦸꦮꦸꦲꦤ꧀ꦩꦭꦻꦏꦠ꧀ꦗꦶꦤ꧀
ꦆꦁꦒꦶꦃꦄꦭ꧀ꦭꦃꦄꦱꦭ꧀ꦚ꧉
꧇꧕꧇꧉
ꦭꦶꦫꦺꦥꦫꦤ꧀ꦱꦼꦗꦠꦶꦤꦺꦤꦶꦏꦶ
ꦣꦠꦺꦁꦄꦭ꧀ꦭꦃꦱꦣꦪꦥꦸꦫꦸꦒ꧀ꦚ
ꦪꦺꦤ꧀ꦮꦸꦱ꧀ꦠꦼꦏꦤ꧀ꦆꦁꦮꦚ꧀ꦕꦶꦤꦺ
ꦏꦧꦺꦃꦏꦥꦸꦤ꧀ꦝꦸꦠ꧀ꦮꦁꦱꦸꦭ꧀
ꦧꦭꦶꦩꦫꦁꦄꦭ꧀ꦭꦃꦱꦪꦺꦏ꧀ꦠꦶ
ꦩꦶꦭꦠꦤ꧀ꦱꦃꦄꦼꦭꦶꦔ
ꦣꦠꦺꦁꦄꦭ꧀ꦭꦃꦤꦶꦏꦸ
ꦠꦤ꧀ꦱꦃꦥꦱꦿꦃꦭꦤ꧀ꦱꦸꦩꦫꦃ
ꦔ꧀ꦒꦼꦒꦣꦮꦸꦃꦭꦤ꧀ꦮꦼꦮꦭꦺꦂꦣꦺꦤ꧀ꦠꦼꦧꦶꦲꦶ
ꦠꦶꦠꦃꦲꦩꦸꦁꦱꦣꦺꦂꦩ꧉
