TRIMA LEGAWA NALANGSA PASRAH ING HYANG SUKMA
(Serat sekar jinarwi anggitanipun Sri Harto jati)
Ganthos ingkang cinarita, prabu Gudhayitma alampah kamandaka arsa nyidra dewi Wara Sembadra kadenangan dening Bambang Manon Bawa kang wus waspada ingsemu sinamun ing samudana, anulad lekase prabu Dasarata, ulat manis kebak ing trapsila tuwin subasita adamel luluh tyas prabu Gudhayitma. Kekalih sami pajagongan kaya mitra lawas kang dangu datang ketemu, kalajengaken wawansabda.
Gudhayitma ;"Ya bandhaku ya dunyaku, he Manon Bawa ingsun nyawang sira ora beda nyawang yayi Dasarata ing Ayodya jebles datan genggang serambut. Kanggo ngraketake ingsun lawan sira, gelema sira tak sebut yayi".
Manonbawa;" Matur sembah nuwun sinuwun kersa angrengkuh badan kula".
Gudhayitma ;"Mara gage batangen cangkrimanku tulung wedarna kang pratitis, Sesotya mungwing wadana lan warih mungwing sesotya?".
Manonbawa;" Sesotya punika mripat, mungwing punika manggen, wadana punika rai dados wus sakmestinipun mripat punika manggen ing rai, dados karsa paduka, satriya utawi ratu punika kedah gadhah praja lan dunung, hananging sanadjan manonbawa mboten gadah praja lan dunung niyatipun boten damel sisah ing liyan tuwin kasisahaning sanes, jejer amung kasahenan lan karahayoning sagung dumadi.upami mripat boten kula angge nyawang barang awon."
Dene warih warih mungging sesotya punika, warih tegese banyu sesotya mripat, toya mripat dipun wastani eluh . Dene medale eluh punika karsa paduka mracihnani menawi dewi wara sembadra kadaup dening raden arjuna sedinten dinten angedalaken luh jalaran boten saged wibawa jumeneng prameswari agelar sang Narpa Dayinta.
Mugi andadosna kawuningan sinuhun, raos mukti lan tentrem punika kinaten manggeng wonten dununging kahanan, dados ingkang anglayang tanpa sasana kados kula punika inggih gadhah raos mukti lan tentrem ingkang perangan ageng inggih punika raos pangraosipun, dene wedale eluh punika dereng kinanten tiyang sisah, sanadjan tiyang bingah inggih saged ugi ngedalaken luh. Buktinipun tiyang gumujeng ingkang ngantos kekelen punika saged ngedalaken luh punika samangsa dados tetimbangan kula punika sanes eluh sisah nanging luh bingah sanget ".
Gudhayitma ;" Mathuk,....ha..ha...ha....,Dek rikala ingsun jumeneng nata ing Ngalengka Diraja anggongku ngaji aji drajating wanita tak pundhi kaya pangestune ibuku Dewi Sukesi, anggongku mbedah kayangan Kaendran oleh triman midodari telu, Dewi Antari tak kukup kinarya prameswari, Kiswani lan Triwati tak wenehke marang adiku Kumbakarna lan Wibisana iku anggonku mikir sedulur, beda adoh karo Arjuna aja amung telu sakupama sekethi kurang siji dikukupi pribadi.
Sabdane para Dewa manawa Dewi Widuwati bakal lahir saka garwaku Dewi Antari, brol lahir diijoli dening Gunawan wujud Indrajit nadjan dudu anaku ngaku anaku ya tak rengkuh dadi anakku temenan , beda karo Arjuna wanita jinatu krama endhi-endhi papan duwe bojo, kaya-kaya anak ora diurus bareng gedhe ngawu-ngawu sudarma isih dijaluhi lelabuhane, yen ora isa minangkani apa diaku anak? Eling-elingen Bambang umbaran anak Dewi Durniti bisa diakoni anak nanging kudu bisa ngot ogal-agil, ora ana bejane awak kepleset Cemplung kedhung dadi Buta Nirbita kawaca.
Beda lawan jeneng ingsun, kabeh selirku taksuwun cara satriya apa bebanane takujudi, disekseni dening kawula lan para raja-raja, rabi padhang dudu petheng-pethengan ora kaya carane gandarwa.
Niatku nyondokake Dewi widuwati ana Ngalengka mengku pangajap gawe makmure kawula, ngelingi Dewi widuwati iku dewane kamakmuran.
Saupama ingsun ora ngluhurake derajate wanita mesthi Sinta uwis takjejamak kaya derajate sato, nanging sinta cumandhok 16 tahun ana ngalengka Ingsun jaga kasuciane, ngelingi ingsun linahirake saka rahime wanita.
Sakmanehi upama Rama iku satriya linuwih gineya ora nantang perang lawan ingsun ijen-ijenan. Perang tandhing ana ing blabar kawat kentheng waja ora ngorbanake kawula kang kang tanpa dosa malah ngusungi bedes-bedes saknegara.
Ingsun dusta sinta ijen tanpa kawula, ana sebabe rama mlebu alas dandaka wewenkon negara Ngalengka tanpa jaluk idi sing duwe alas, sing tunggu alas dipateni.
Kira-kira lanang endii ingsun lawan Rama lan Arjuna?"
Manonbawa;" Manawi sinuwun kang luhur-luhure triloka taksih kesdu nglirik Dewi wara Sembadra punapa boten memerang jagad kados pundi sorake kawula tuwin Dewa lan para raja, atase trah Resi Wisrawa kedugi Shahar sisa."
Gudhayitma;" Bener kandhamu Manonbawa, Arjuna bojone sing cetha/padhang ana 8 ewa dene isih gelem nyidra asmara marang Dewi Banuwat bojone kakange. Dewi wara Sembadra tak upamakna mertiga suci dinilat srenggala, sutik Ingsun trima mangan sisa. Manon Bawa andum basuki yayi ingsun kondur ing Tawang Gantungan."
Manonbawa;" Sakonduripun sinuhun kula dherekaken sugeng"
Kaya sinendhu alus dening prabu Gudayitma, Manon Bawa badar dados raden Arjuna. Rumaos nelangsa jroning penggalih, jroning batos boten badhe angambali tumindak ingkang sampun nlisir saking darmaning gesang, tumuli lumampah miturut angger-anggering kautaman.
Makaten Agunging Pangeran ngelingaken titahe mboten pilih jalma kang kinarya lantara kapara brekasakan minangka piranti ngelingaken Raden Arjuna.
