LAWASE LAWAS KARASA ROSING RASA KANG SEJATI
(Serat Pakeliran Gandha Kamiyana dening Ikwan Aji - Putu Jati)
Raos boten sekeca jroning manah Dewi Agung Pripta Sang Kunthi Tali Brata jalari blawur paningale, mung peteng kang den ulati dawah pyak kapidara wonten pepangkone ingkang rayi Raden Yamawidura. Dupi eling purwa duksina sampun karubyung Dewi Gandhari, Adipati Drestarastra tuwin Dewi Drusilawati. Dewi Kunthi ngudarasa ing batos lha kok ana wanita nisthane ngungkuli Dewi Sarpa kenaka, kakunge gugur ulate padhang tan urun satetesing waspa. Tumuli sami wawansabda :
Kunthi : "Nini Drusilawati, kabare gurulakimu gugur ing payudan, si nini apa ora cecawis sesaji kanggo ngrukti kang kakung ?"
Drusilawati : "Nyadhong deduka bibi, mila boten cecawis awit nuhoni wekasing laki kula. Sadherenging lumampah ing rananggana sampun karasa wonten wiwara bukur ing pengarip-arip, kethek jaja buthul walikat, rakamas Jaya Drata pamit dhateng kula sakulawarga Buana Keling, kapurih nangis sakmaremipun mumpung taksih sugeng ewadene sesampunipun katimbalan Gusti keparenga suka parisuka. Menggah wigatinipun supados suka penggalihipun Sang Prabu boten kagridhu tangise kaluwarga anggenipun sowan ing Pangeran. Siten ingkang anggridhu adat lupiya gesange sengsara."
Kunthi : "Ngerti wis ana pratandha ora kepenak geneya sira ora murungake karepe ?"
Drusilawati : "Sinten ingkang saged anduwa keparenging kodrat manawi sampun pinesthi dening PANGERAN, badhe angoncati punika naminipun nistha-nisthaning dumadi. Purun boten purun tetep kedah anglampahi bebasan boten saged brojol sela2ning garu. Kedah wangsul ing tepet suci manunggal dhumateng Hyang kang agung DATE ,kang elok SIPATE , kawasa ASMANE sampurna OBAH OSIKE.
Boten cecawis sesaji awit sungkem kula dumunung ing rasa inggih rasa kang sejati sanes rasane badan wadhag legi pahit, adhem panas tuwin rasane ati bungah susah. Rasa Jati tumrape Drusilawati inggih rasa kang alus inggih rasa kang cetha krasane amengku sakahing pangrasa punapa dene kang bisa ngrasakake perlune dumadi tumitah ing dunya.
Nadyan Kurawa punika dugal, jahil, methakil ananging tasih saged bedakaken antarane pribadi tuwin pakerti, pakerti jejer prajurit angrungkepi bumi wutah darahipun Ciktrasi wantun ngrangsang yayi Werkudara. Jiwa kang momot saged amengku pangrasa kang kosok balen bungah-susah, lara kepenak dhemen gething, sugih miskin. Momot boten nampik milih kang dadi mareming ati dipilih kang rekasa di singkiri. Kanthi lampah makaten Kurawa saged tumuju jiwa kang karasa ing rosing dumadi."
Kunthi : " Kakang mbok Gandhari jroning Baratayuda iki sing luwih ngenes punika kula."
Gandhari : "Kepriye larah-larahe yayi dewi?"
Kunthi : "Mugi kepareng nyimpen wewadi Kakang mbok , ampun kapireng ing ngakatah, perange Pandhawa lawan Kurawa punika perange naksanak kenyer-kenyer sami-sami trahing Resi Wiyasa.
Dene perange Arjuna lawan Karna punika perange sedulur tunggal yayah rena ( tunggal saguwagarba). Kakang mbak tasih kengetan anak kula bungkus ? glundhang-glundhung wonten ing tengah alas Mandalasara, bungkus dipun bedah dening Gajahsena medal Si Bratasena tunggal sajiwa. Dene bungkus katetesan ratuning udan dening pukulun Naroda dados Jayadrata. Kakang mbok ewang2ana nyangga abote rasaku iki kaya diblegi bumi."
Broll kadya dineres riwene Dewi Drusilawati kang medal saking sela2ning alis, dawah pyak kapidara dadi royongan.
Selajengipun sedaya sami cecawis sesaji kagem hormati kondure Sang Tirtanata dhateng ngayunane PANGERAN SEJATI. Kanthi sesaji punika nelakake rasa kamanungsan kagem angengeti labuh labetipun duk kalane Jayadrata sugeng ing ngarcapada nandur kabecikan dumateng sesamining titah.
Wasana menawi wonten ukara ingkang boten mranani dhiri kula nyuwun agunging pangaksami.
