TEKA WAHYANE MANGSA KALA SUKERTA BAKAL SIRNA
(Serat Kamiyana dening Ikwan Aji Nugraha putu jati)
Kisis barisan Pandawa katrajang dening Prabu Salya kang amung sajuga. Rinewangan Aji Candrabirawa buta bajang siji dadi sewu, sewu dadi mayuta-yuta ngebaki pabaratan. Waspaos paningali nata Dwarawati tumuli anyaketi prabu Puntadewa makaten pangandikane :
Kresna : " Yayi Prabu keparenga tumuju ing pabaratan nandingi kridhanipun paman prabu Salya."
Puntadewa : " Selawase gesang Puntadewa boten nate memengsahan katelah Ajathasatru. Turta kula boten saged perang."
Werkudara ;" Mbarep kakangku, majua perang Iki panjaluke sedulurmu papar. Yen ora gelem padha Atep Pati obong."
Puntadewa :" Kowe apa arep ngisin-isinke aku selawase ora nyekel gegaman. Yen padha Atep nglalu nglaluo, ora ana jamak lumrahe wong nglalu Muni dhisik iku klakon."
Kresna : " Menawi mekaten Baratayuda sampun rampung, boten wonten ginanipun kula dados bothohe Pandawa."
Puntadewa : " Rampung inggih mangga, boten inggih mangga.
Kurawa satus punika mangertosi watake Puntadewa wiwit alit, milanipun boten nandhukaken gegaman dhateng Puntadewa. Saupami negari Indraprasta disuwun diparingaken gunane punapa didoli perang.
Kurawa mangertosi bilih Pandawa sanes putra-putrane prabu pandu kang sejati.
Kaka Prabu paring pangandhika bilih dados bothohe Pandawa, kula nyuwun pirsa bedane punapa anak mantu kaliyan anake pribadi?"
Kresna : "Sami-sami anak inggih boten dibedak-bedakake, pangrengkuhe boten beda tumrape gesang bebrayan."
Puntadewa : "Menawi makaten sampun trewaca, bilih tuhu wicaksana rama Prabu Pandu rumiyin mundhut putra andanu kakang Duryudana kinen tumut angembat ruwet rentenging praja Astina dipun paringi kekasih Raden Jaka Pitana.
Amargi Rama Prabu Pandu kenging Sot Resi Kimindana jalari boten saget peputra, dene dumadine Pandawa saking Aji Kuntha Wekasing Rasa Sabda Tunggal Tanpa Lawan. Ibu Kunthi keparingan kanugrahan putra saking dewa lima (Bathara Darma, Bayu, Asmara, Haswan, Haswin).
Sejatosipun ingkang kagungan damel Bratayuda punika bothohe Pandawa, Kurawa kemawon boten mawi bothoh. Milanipun sang duta agung pangawak Pandawa nyuwun wangsul negara Indrapasta sajajahane tuwin negari Hastina warisan Prabu Pandu.
Manawi sampun kapratelakaken dening kaka prabu boten wonten bedane anak mantu tuwin anak pribadi, jagad sampun anyekseni bilih Pandawa punika sejatosipun sanes darahe Prabu Pandu. Kawuningana bilih kakang mbok ratu Jembowati garwa paduka punika sayekti tedak turune prabu Pandu. Boten wonten bedane Ratu Jembawati tuwin Nata Dwarawati.
Supados kalis saking saliring dedosan, keparenga jumeneng salira Bathara Wisnu, kang minangka wadhag Nata Dwarawati tumuli paringa dhawuh."
Sakedeping netra Nata Dwarawati wenteh Sang Hyang Wisnu angejawantah nuli paring dhawuh :
Wisnu, "Kaki Puntadewa tak jaluk gawemu papakna nata Mandwaraka Prabu Salya, kanthi mundhi jamus Kalimasada kudu nganthi Arjuna."
Nitih rata tinarik kuda kalih kembar warni putih memplak, prabu Puntadewa ngasta Jamus Kalimasada cinancang wonten bedore panahe Arjuna. Kaenerake wonten jajane prabu Salya dening Arjuna, linepasaken saking kendheng dening Arjuna jumepret swarane jalari gugure prabu Salya.
Menggah werdinipun makaten :
Puntadewa punika pralambang angkasa. Dene prabu Salya punika pralambang rembulan awit prabu Salya inggih Nara Soma (rembulan).
Dene Arjuna punika pralambang banyu(segara), Kresna punika pralambang lemah. Kekalihipun sami-sami kuwadhaanipun bathara Wisnu inggih bumi.
Candrabirawa punika kekiyatanipun rembulan ngobahaken ombak alune segara (gaya gravitasi rembulan). Pejahe Nara Soma awit rawuhipun begawan Bagaspati inggih Srengenge (Matahari), ngracut Aji Candrabirawa.
Dados Puntadewa tetep kinalisake saking dosa tetep dados pralambang angkasa.
Wasana manawi wonten ukara ingkang boten mranani dhiri kula nyuwun agunging pangaksami
Tambahan :
Ratu Jembowati putrinipun Prabu Pandu nalika taksih jaka tumaruna kagiwang dhumateng garwanipun Kapi Jembawan inggih Dewi Trijatha ing Hastana Gadhamadana, kanthi lampah nyidra resmi salah gawe.
