LABETING KARTIYOSO
Kautaman Bagus ing Ati
Labeting kartiyoso puniko
Awit saking pambudayaning gito dursilo
Rinuwat kanthi mrihatini adrenging karso
Nguboro lan ngumbara miyat dumununging kamitran
Amangsuli prahoro bebendu agung
Tan ginayuh hastaning mamilat broto
Wosing roso kang ginubel graito
Graitaning karso, dumununging cipto
Tan ono angkoro
Tan ono rubedo
Tan ono dursilo
Tan ono tandang duraka
Jejer anyar
Gagrak anyar
Titah anyar
Jagad anyar
Sarwo gumebyar
Tan ono kang samar
Tansah suminar
Magilar-magilar
Anggelar tulusing nalar
Budi pinilih, luhur angarih-arih
Moso wurungo karsaning Jati
Hangesti drajading titah
Hawya mirudo kang kinarso ing Gusti
Kabeh soko telenging jangkah
Kabeh awit gumelaring pratingkah
Kabeh ngemu tulusing ngabdi
Kunjuk Ing Ngarsaning Gusti
Humangkoro
Humangroso
Hamungwat trikarso
Hamungwing baskoro
Hamungwing jumantoro
Ngadep Gusti
Welasing Gusti
Ingkang Moho Sih
Mawanti-wanti, angati-ati
Ojo kongsi keri nunggang jung omah agung
Kang dinayung dewo hambaruyung
Dipandhegani dening poro dewo
Sinanggo mring poro leluhur
Kinebakan jalmo utami
Mulyaning manungso jati
Kang pinilih dening Gusti
Kapilah saking ngalamipun
Awit driyanira mung nyawiji
Kabeh kagungane Gusti
Mulo ojo noleh
Mulo kudu mantheng
Katuto baitagung
Nyuwuno palilahe Hyang Agung
Awit kuwi Kagunganipun
Najan wus kebak ilmune
Najan wus gentur tapane
Najan wus suwung samadine
Ning durung kaparingan karsaning Gusti
Mulo dudu rapale, ning atine
Mulo dudu wujude, ning lire
Mulo dudu jlegere, ning kawruhe
Poma, sindukoro karaning ronsih
Sawunging sworo sawang suwung
Gebyaring gebyur gambyong grambyangan
Rinakit, rinoso, rapito, retyakaning radyo
Tlusurono sing tlaten
Anggito gitaning suksmo
Andungkap sunaring padhang
Njingglang ngawang-awang
Hamung sawiji kang kinanthi
Wahyuning Gusti
Kang pinuji-puji
Wus pupus barang kalire
Hooong...
Wilaheng Sekar ing Bawono Langgeng
Rahayu Kamulyaning Jagad
Imajiner Nuswantoro
