LAKUNE SUKMA TUMINDAKE RAGA
Tumindake raga kudu sabar, narima, eklas kanti ngalah kuwi tegese laku mulung
Tumindak kanti mengkana kuwi mau tumrap jiwa raga, ateges laku manunggal, supaya entuk rasa
Yo kuwi rasa tentrem, dene raga kudu laku sabar, narima, eklas kanti ngalah amerga dadi wadahe urip
Mangka urip kuwi sabar sabaring sabar, narima narimaning narima, eklas eklasing eklas, ngalah ngalahing ngalah
Murih raga tansah bisa anindakake laku kuwi mau, patrape kudu tansah eling
Raga anggone tansah kudu laku mengkana mau salawase ana, dadi tanpa wates ateges nganti bali, mula carane raga kudu tansah dilatih saka setitik-setitik
Angayomi tegese reksa rineksa, welas lan asih kuwi lakune urip, yo rasa welas lan asih, lakune apa ? yo kuwi urip, sukma, sipat, krasa, rumangsa, ngrasakake, dadi lakune gelar lan gulung
Welas lan asih kuwi krasa ngrasake mring rasane liyane ingkang nyandang rekasa, welas lan asih kuwi laku lan lungguhe
Dene yen welas lan asih kuwi tegese eling, ukuran welas lan asih kuwi ing rasa, welas lan asih tumrap raga yo kuwi laku anggembleng, amerga urip kuwi welas welasing welas, asih asihing asih, buktine langgeng tan owah gingsir
Kawruh Jowo kuwi dalan, laku ageman, kuwi lakune wong melek dadi lakune budi pekerti, tumindake saka angen-angen, mula lungguhe rasa pangrasa dadi rumangsa ngrumangsani
Buktine yen kuwi lakune wong melek, yen turu ninggal kawruh amerga angen-angen ginulung rasa tegese iki dudu mung karep bener nanging bener benering bener awit buktine krasa temenan
Manungso iku sing duwe lelaku sukmone kebak welas asih lan tumindak rogone kebak tetulung marang sapadha-padha
