JANTURAN BAMBANG SUMANTRI SOWAN NATA ING MAESPATI PRABU SRI HARJUNA SASRABAHU
Oong.........
Punika warnanipun satriya saking pertapan Jatisarana, atmajane Begawan Suwandagri ya Suwandageni, engkang awasta Bambang Sumantri.
Maksih jejaka tumaruna dhasar pekiking warna, nadyan sarwa prasaja denya angagem busana parandene amimbuhi kebergasane.
Tembene ingkang amulat tinarka ana dewa ndharat.
Akeh para wanodya ingkang samya ngampil-ampil upacaraning keprabon, kedhep tesmak denya mulat dhateng warnaning Bambang Sumantri.
Ana ingkang plerak-plerok esmu ngujiwat sajak anjejawat, ana saweneh kang ngawe-awe, ana saweneng kang atebah-tebah jaja, ana saweneh ingkang angebuki padharane sarwi angucap, samangsa ing benjang apeputra kakung, sageda jebles lan satriya kang katemben prapta angabyantara nata ing ngarsa Prabu Sri Harjuna Sasrabahu.
Lon-lonan denya minggah ing sitinggil lampah dhadhap anoraga angeka padha yayah sata matarangan, dupi wus pareng ngarsa nata gupuh-gupuh humangsah anguswa pepada sesedhokan panembahan.
Sakala wus lenggah tumungkul yayah konjem ing pertala wedanane.
Wauta, Sri Harjuna Sosrobahu mulat sowaning Bambang Sumantri, nadyan kadangu, jroning tyas wus kraos matrenyuh kaladuk tresna.
Katitik denya bangkit anuju prana lebet datan tilaring tata susila.
Mula sowane adoh hanggung ka'awe cedhak sangsaya rinajetaken, teka mangkana pangudas maraning ndrinya Prabu Sri Harjuna Sosrobahu lamun ta kawijiling lisan.
PATHET NEM JUGAG
Myat jroning wardaya, ngrumpaka kakandha nujweng ari sajuga
Ong......
Srinata sumewa, lenggah dhampar dhenta
Ong......
Ing sitinggil binatarata
Ong......
(Pocapan menika kapendhet saking garap pakeliranipun, swargi Ki Dalang Narto Sabdo. Ing lampahan Sumantri Ngenger)
