JANTURAN KYAI JALADARA
Ngaglah aneng madyaning alun-alun negari Dwarawati. Rata pusaka kyai Jaladara titihaning sang prabu Sribathara Kresna. Ingkang rinakitan kuda catur kang ulese abang, ireng, kuning lan putih.
Padha dedege, padha karosane, nanging beda daya pangwasane.
Kang abang awasta kyai Bramasakti, peparinge Sanghyang Brahmara.
Daya pangawase sumusuping samudra latu datan kobar, bisa ngayomi kanca rowange.
Kang ireng aran kyai Sukantha peparinge Hyang Sambu, darbe daya pangwasa bisa ambles ing bantala ngayomi kanca rowange.
Kang kuning sinebut kyai Sugriwa peparinge Bathara Basuki, darbe kasekten bisa lumaku ing sandhuwuring banyu, ngayomi kanca rowange.
Dene kang awarna putih arane kyai Ciptawilaha peparinge Sang Hyang Wisnu, daya pangawase bisa mabur ing dirgantara, ngayomi kanca rowange.
Rata awarna gudhaka sinung manik pagedhongan, linungse renda awarni jenar, kalamun kinarya lumaksana katempuhing angin rembyak kaya angawe-awe.
Pagedhonganing rata sinung kaca gedhah binuwang rasane katon jaba njerone, linurupancindhe wills.
Dandananing rata sadaya sarwa rajaning tosan.
Pancatan wesi mangambal, paku janur wesi pulosani, indhen wesi balitung, wengkuning rodha wesi mangangkang, laring rodha milih kayu cendhana sari miwah kayu garu rasamala, mila lamun lumaksana katempuhing samirana, angambar arum rumabasing durgantara.
Kang minangka wengku ineping pintu, kencana mulya pinarak mirah mutiara, inten, jamrut binesthi, hergeni kang akarya uparengganing rata.
Lamun kasoroting dewangkara pathing galebyar pathing calorat, nganti kaya kartika asilih pernah.
Ingkang mangka sandhanganing kuda apus buntut pusparaga.
Lapak baludru rekta, kinalungan mas ingkang rinengga.
Turangga catur weton Sukawati, kena den andelake aneng rana madyalaga, tautate sisip jemparing sumusup kukusing sendha..., datan tumawa saliring braja, tapak paluning pandhe, sisaning gurendra, tanapi tedhaning kikir.
Mangkana kusir wus nyandhak lis lalean sambuk, ponang cemethi lamun ngadeg kaya teja, yen malengkung yayah kluwung, kenek sigra mapan ing panggonane.
Sintenta ingkang wus wahana rata, nenggih Nata Darawati kang ajejuluk prabu Sribathara Kresna.
Nalika samana kusir wus sinasmitan tumuli anyandhak lising kuda, nyeblakake sambuk mobat mabit mobat mabit ponang cemethi, tuna dungkap panyambuke kenging pok gantanging kuda anggemprang layuning turangga, mamprung lampahing rata sacengkang yayah tan ngambah bantala.
(Kapendhet saking pakeliranipun swargi Ki Narto Sabdo)
