KIDUNG PITRA YADNYA
Kidung Pitra Yadnya adalah nyanyian suci (sekar madya) dalam tradisi Hindu di Bali yang dilantunkan untuk mengiringi upacara penghormatan roh leluhur, khususnya dalam prosesi pengabenan atau Atma Wedana. Kidung ini bertujuan mengantarkan roh agar mendapat tempat layak, menyucikan atma, serta mengungkapkan rasa bakti anak kepada orang tua yang telah berpulang.
Keterangan Penting Kidung Pitra Yadnya :
Tujuan: Menyucikan roh leluhur agar mencapai alam Pitra Loka dan memberikan penghormatan terakhir.
Jenis Kidung Berdasarkan Prosesi :
- Sewana/Girisa/Bala Ugu: Saat menurunkan/memandikan jenazah.
- Indra Wangsa: Saat membawa jenazah ke setra (kuburan).
- Adri: Saat mengurug kuburan (gegumuk).
- Praharsini: Saat Ngeseng Sawa (membakar jenazah).
- Aji Kembang: Saat Reka Abu (mengolah abu).
- Sikarini/Asti: Saat Nganyut (melarung abu ke laut).
- Wirat Kalengengan: Saat Nyekah (Atma Wedana).
- Isi : Kidung sering berisi pemujaan kepada manifestasi Tuhan (seperti Dewata Nawasanga) dan permohonan agar perjalanan roh menuju kedamaian tidak menemui halangan.
Kidung ini wajib dinyanyikan dengan tulus ikhlas, seringkali diiringi instrumen gambang**baleganjur, atau angklung untuk menciptakan suasana sakral.
OM AWIGHNAMASTU NAMA SIWA BHUDAYA
RIKALA WAWU SEDA :
OM A TA SA BA I
OM WA SI MA NA YA
MANG ANG UNG
Om Swargantu, mokshantu, sunyantu, murcantu
Om ksama sampurna ya namah swaha.
TEMBANG UKIR
1.
Suwung awak atmane tinancut
Pangkong griya mangke
Matinggal sajroning hati
Ati ati ane ayu
Layone kadi aturu
Mara sayang ira pejah
Mangungsi genahe suwung
Matinggal ring madyapada
Eling sira tininggalan
2.
Kungkungan raga puniku
Wiwitnyane reke
Panca Maha Bhuta jati
Rilepasnya atma iku
Sang mur pwa mangkin kawuwus
Jatinya ida sang atma
Kari urip wantah iku
Nganggen raga kaniskalan
Kaliput panca tan matra
3.
Sadurung sida lepas puniku
Panca tan matrane
Punarbhawa pacang malih
Meraga sekala iku
Nerusang uripnya iku
Pacang nglepasang malane
Jantos sida nunggal iku
Aworing panangkanniya
Maring Ida Hyang Siwatma
4.
Munggah nirmala sang atma iku
Sarin utamane
Galang apadang kapanggih
Tan pamaya langgeng iku
Amerta nir pangan kinum
Lan tan keneng inucapan
Apan sampun kapresida
Amerta jagat putusan
5.
Punika wenten munggah ring tutur
Becikang ta mangke
Kardinin karmane becik
Mangda ayu palan ipun
Apan karma phala iku
Nyantenang polah manusa
Yan sampun karmane ayu
Luwih phalannya riwekas
Dados janma luwih suka
6.
Kawisayan titiang wantah memacul
Lemah peteng reke
Lemah mengebet keladi
Lemeng menyambangin biyu
Malinge reke bas liyu
Tetanduran titiang akeh
Botor komak kacang jagung
Kacang rijig mwang pagpagan
Keladi ubi kesela
.jpg "KIDUNG PITRA YADNYA")
NEDUNANG LAYON PACANG NYIRAMANG
GIRISA
1.
Ata sedeng ira mantuk
Sang sura laga ring ayun
Tucapa aji wiratan
Karyasa nangisi weka
Pinahajengira lawan
Sang putra Nala pinawa
pada litu hajeng anwan
Lwir kandapa pina telu.
2.
Lalu laranira nasa
Sambat putra nira pejah
lakibini sira sumungkem
ring putra luru kinusa
ginamelira ginanti
kang laywan lagi ginugah,
inutus ira masabda
kapwa ajaran bibi aji.
3.
Hana kaleheng ikang sih
yan tunggal kita pejaha
kita tiki katiga alyus
ndyanung panglipura lara
syapa tiki palarengkwa
muktyang rajya sumiliha
ri ilangi tanayangku
nduh ngwang wenaka pejahe.
4.
Ne wuwusira masambat
karwa strya pega malume
inariwuwus tekap
sang sri pandwatmaja malara
pinahayu kinabehan
sampun purna rinuruban
inanyuti panjanging lek
munggwing pancaka gineseng.
NYIRAMANG LAYON
BALA UGU
1.
Bala ugu dina melah
manuju anggara kasih
pan brayut panamaya
asisig adyus akramas
sinalinan wastra petak
mamusti madayang batis
sampun puput maprayoga
tanaswe ngemasin mati.
2.
Ikang layon ginosongan
ne istri tuhu satya
de pemayun matingkah
eteh-eteh sang palatra
toya hening pabresihan
misi ganda burat wangi
lengise pudak sategal
sumarganda mrebuk arum.
3.
Pusuh menuhe utama
malem sampun macawisan
tekening adon intaran
bebek wangi lengis kapur
momon mirah windusara
waja meka panca datu
don tuwung sampun masembar
sikapa kalawan taluh.
4.
Buku-buku panyolasan
pagemelane selaka
kawangene panylawean
gegelange satak seket
sampun puput pabresihan
winiletan dening kasa
tikeh alus wijil jawa
lante maulat penyalin.
5.
Tatindihe sutra petak
rinuruban dening kasa
anak putunia ngabakti
ibu nia munggwing ayun
ginosongan punang layon
kidunge mewanti-wanti
bedil kulkul tan karengwan
gong gambang gender lan angklung.
6.
Tumpang salu palinggihan
kalewaran dadi naga
semu rimrim sanghyang atma
tumoni raga kurungan
umunggu ring damar kurung
nyuluhin ring marga sanga
tatas apadang kang marga
mangungsi swarga bhuwana.
7.
Sanggar tawange bantenin
sapalinggihan pabaktyan
bedeg pipis lan langsangan
salang mote salang pipis
sada luwih lan ukur mas
caconde lan ulap-ulap
angenan mapucuk manik
suci katur ring Bathara.
8.
Pepek aturane genep
pisang kembang pisang jati
bebek katur ring Bathara
pinda lan bubuh pirata
toya pangentase buatang
pangelebe mas leyaran
ulantagane sumandi
sampun puput pabresihan.
ASWALALITA
1.
Ata ri pejah ni sang prawara
somadata tenayan tekap sinisuta
Makin aparek jayadrata tekap
sang arjuna wrekodara ngurekamuk
Irika sakorawa ngrebut angembuli
sarawara sang arjuna nasa
Maka muka sang dwijendra,
krepa salya karna guru putra len kurukula.
2.
Pada teka sahasang udanaken warastra
para yoda ring kurukula
Maka hulu sang srutayu pejah
dinanda ri gada wrekodara nasa
Mapulih ikang srutayu
lawan ayutayu dirga ringayu
Ya ta dinuman warastra
pada mati denira sang arjunan pamanahi.
MEMARGI KE SETRA
INDRAWANGSA
1.
Mamwit narendratmaja ring tapowana
Manganjali ryagraning indra parwata
Tan wismrti sangkanikang hayun teka
Swabawa sang sajana rakwa mangkana
2.
Mangkat dateng toliharum wulat nira
Sinembaying camara sangka ring geger
Panawanging mrak panangis nikung alas
Erang tininggal masaput-saput ima
3.
Lungang lengit lampahira ngawetana
Lawan sang erawana bajra naryama
Tan warnanen desanikang katungkulan
Apan leyep muksa sahinganing mulat
4.
Bhawisyati meh datenging Suralaya
Grahadi naksatra kabeh pada krama
Tejomaya purwa kadhatwaning langit
Pamuktyaning janma sudhira subrata
5.
Taranggana ditya sasangka mandala
Alit katonanya saking swa manusa
Ageng iwa mangkana deni doh nika
Katon sakeng madyapada ngulap-ulap
6.
Wintang lewih litnya leyep tininghalan
Ruhurnya sangkeng sasi wimba karana
Sadohning aditya sangkeng nisakara
Kadohnikang bhumi sangkeng diwakara
7.
Tingkah nikang swarga lawan halepnika
Watang nika lalana gostya tut awan
Pajar sang erawana ring nrepatmaja
Kading pangipyan tanirat hidepnira
8.
Katon tikang Indrapada prabaswara
Wetan sakeng meru marep mangambara
Kutaniya malwa gupuranya pat manik
Karangning aditya sasangka mandala
9.
Samar diwa ratri nikang suralaya
Dening praba satmaka sarwa bhaswara
Anghing sekarning kumuda jaring kulem
Mwang cakrakwakan papasah lawan pria
10.
Tan ngeh angascarya wisesa wastunen
Tan warnanen lwirniya tinon sang arjuna
Dateng sira ndan makire manembaha
Ginyakening camara kon umanjinga
MANDUSIN / NYIRAMIN
1.
Siramin toya anyar puniku
Sisig kurah reke
Kukune patut kerikin
Yeh kumkuman anggen ambuh
Suwah petate puniku
Rangsukin mangke pengangge
Tali itik itik iku
Don intaran di alise
Cermi genahang ring netra
2.
Papusuh menuhe maring irung
Karna don deleme
Untu waja kadagingin
Minyak wangine ring rambut
…………………… ?
Adeng sikapa ring dada
Blonyoh putih sirah iku
Blonyoh kuning maring dada
Don tuwung bola prana lanang
3.
Daun tunjung prana istri iku
Base jerijine
Tangan suku kedagingin
Batu las buku-buku
Minyak asem naka iku
Lungan wajane ring dada
Kwangene lalima ratu
Sirah dada lan angene
Lulutnia kwangen kraras
4.
Angkeb rahi wastra petak iku
Lan angkeb pranane
Wastra ireng kedagingin
Sampun puput nika ratu
Matirta sepatut ipun
Sentanane raris nyembah
Raris let-let layon iku
Sentanane sinuluban
Raris munggah ring payadnyan
NGELUKAT / SUDAMALA
1.
Ongkara stuti ngurakang santun
Krepu kenakane
Muang dupa dipa sumirit
Watek gandharwane parum
Kadi tinuduh dening harum
Dadia sinawuran puspa
Prasida amoring cupu
Dadia lukat tanpa mala
Amuji rahaden bima
2.
Sri Kunti Dewi mwang Dharma sunu
Presama ta mangke
Nararyarjuna sireki
Nakula sadewa iku
Samya musti sekar harum
Wus siniratan maka rwa
Dane Hyang amerta iku
Sanjiwani pangarania
Puput kang yoga malukat
NGESENG SAWA
1.
Sang atapa sakti bhakti,
astiti purwa sangkara
Yan mati maurip malih,
wisesa sireng buwana
Putih timur abang wetan,
rahina tatas apadang
Titisning jaya kemantyan,
mapagehta samadinira
2.
Hulun angadeg ring natar,
kamajaya cintanya
Sang atunggu parawean,
mawungu pekarab-karab
Ilanganing dasa mala
ametang gangga asuci
Panunggal rwaning wandira,
pinaka len prenahira
3.
Yan sampun sira araup,
isinikang kundi manik
Anut marga kita mulih,
yan sira teka ring umah
Tutugaken samadinta,
sapngruwat sariranta
Isinikang pengasepan,
kunda kumutug samidanya
4.
Wewangen dadi tembaga,
rurube kang dadi emas
Arenge kang dadi wesi,
awune kang dadi selaka
Kukuse kang dadi mega,
yeh iku manadi ujan
Tumiba ring mreca pada,
yeh iku dadi amerta
5.
Kukuse Sanghyang Iswara,
lalatu Hyang Mahesora,
Wewangen Bathara Brahma,
kamaligi Bathara Rudra,
Rurube Hyang Mahadewa,
awune Sang Hyang Sangkara,
Arenge Bathara Wisnu,
ambune Bathara Sambu.
6.
Ring kunda Bathara Siwa,
sarining kukus Hyang Guru,
Pangleburan dasa mala,
lara roga winasa ya,
Purna jati sunirmala,
Luput maring papa neraka,
Sadya manggih swarga lewih,
satya brata mangarcana.
7.
Yan manis marep angetan,
astuti Bathara Iswara,
Yan pahing marep angidul,
astuti Bathara Brahma,
Yan pwon marep angulon
astuti Hyang Mahadewa,
Yan wage marep anglor,
astuti Bathara Wisnu.
8.
Keliwon mareping tengah,
astuti Bathara Siwa
Angadeg angeka pada,
Regep ikang panca indra
Cela tatekeping kembang,
salwiring kembang kangin,
Sinrang saking awaking wang,
mrebuk arum gandanira.
9.
Bathara Siwa pinuja,
telenging gangga nirmala
Anut ta watek Dewata,
kang pinuja ring manusa
Mareng sira prenahira,
pinuja rahina wengi
Awuran tang kadewatan,
pangucapku sakti bakti
NGESENG SAWA
PUPUH ADRI / TEMBANG UKIR
1.
Sang atapa sakti bakti tuhu
Pangacep astitine
Pamuewa sangskara luwih
Yan kita maurip esuk
Wisesa sireng bwaneku
Putih wetan purwa rakta
Rahina tatas puniku
Titisning jaya kemantyan
Mapageh ta samadin nira
2.
Ring natar pwa angadeg ulun
Tansah astitine
Kama jaya citaneki
Parawean sang atunggu
Pakarab-karab mawungu
Ilanganing dasa mala
Ametang gangga adyus
Pamunggel rwaning wandira
Pindaka len prenahira
3.
Yaning sampun pwa sira araup
Aja kita ime
Isinikang kundi manik
Anut marga kita mantuk
Yan sira ri wesma rawuh
Tutugaken samadinta
Sapangruwat sariranmu
Isinikang padupayan
Kunda ketug samidan niya
4.
Wangi-wangi dadi temageku
Lan dulurannyane
Rurub dadi emas luwih
Arenge wesi iku
Awone slaka puniku
Kukuse kang dadi mega
Yeh iku menadi jawuh
Tumiba ring mercepada
We iku dados amertha
5.
Kukuse Sanghyang Iswara teku
Pirengang ta mangke
Lelatu mesora yeki
Wawange hyang brahma iku
Kamaligi hyang ludreku
Rurube hyang mahadewa
Awune sangkara iku
Arenge bathara wisnwa
Ambune hyang sambu dewa
6.
Bathara siwa ring kunda mungguh
Elingang ta reke
Sarin kukus hyang gureki
Panglebur dasa maleku
Lara roga brasta iku
Purna jati sunirmala
Puput maring papa iku
Sadya manggih swarga melah
Satya brata mangarcana
7.
Yan manis marep purwa iku
Bathara iswara astuti
Yan paing marep angidul
Astuti hyang brahma iku
Yaning epon marep kulon
Mahadewa Astuteku
Wagene marep uttara
Astuti bathara wisnwa
8.
Keliwon mareping tengah iku
Aja eleh meneh
Bathara siwa astuti
Tunggalaken dasa bayu
Regep ikang pancendriaku
Sila padma kang laksana
Salwiring kembang pwaeku
Sinerang saking awakingwang
Mrebuk arum gandan nira
9.
Bathara siwa pinuja iku
Langgeng tang budine
Ring gangga nirmala luwih
Anut watek dewateku
Kang pinuja manuseku
Mareng sira prenah ira
Puja rahina wengeku
Aworan tang kadewatan
Pangucapku sakti baktya
AJI KEMBANG
1.
Ring purwa tunjunge putih,
Hyang Iswara dewatannya,
ring papusuh prenahira,
alinggih sira kalihan,
pantesta kembange petak,
yan tembe lamun dumadi,
suka sugih tur rahayu,
dana punia astiti bakti.
2.
Ring ghneyan tunjunge dadu,
Mahesora dewatanya,
ring peparu prenahira,
alinggih sira kalihan,
pantesta kembange dadu,
ring tembe lamun dumadi,
widagda sira ring niti,
subaga sireng bhuwana.
3.
Ring daksina tunjung mirah,
Sang Hyang Brahma dewatanya,
ring ati prenahira,
alinggih sira kalihan,
pantesn ta kembange mirah,
ring tembe lamun dumadi,
sampurna tur dirghayusa,
pradnyan maring tatwa aji.
4.
Ring neriti tunjunge jingga,
Sang Hyang Rudra dewatanya,
ring usus prenahira,
alinggih sira kalihan,
pantes ta kembange jingga,
ring tembe lamun dumadi,
Dharma sira tur susila,
jana nuraga ring bhumi.
5.
Ring pascima tunjung jenar,
Mahadewa dewatanya,
ring ungsilan prenahira,
alinggih sira kalihan,
pantes ta kembange jenar,
ring tembe lamun dumadi,
tur sira sura ring rana,
prajurit watek angaji.
6.
Ring wayabya tunjung wilis,
Hyang sangkara dewatanya,
ring limpa prenahira,
alinggih sira kalihan,
pantes ta kembange wilis,
yan tembe lamun dumadi,
teleb ring tapa brata
gorawa satya ring budhi.
7.
Ring utara tunjunge ireng,
Sang Hyang Wisnu dewatanya,
ring ampru prenahira
alinggih sira kalihan,
pantes ta kembange ireng,
ring tembe lamun dumadi,
sudira suci laksana,
surupa lan sadu jati.
8.
Ring ersanya tunjunge biru,
Sang Hyang Sambu dewatanya,
ring hineban prenahira,
alinggih sira kalihan,
pantes ta kembange biru,
ring tembe lamun dumadi,
paripurna santa dharma,
sidha sidhi sihing warga.
9.
Tengah tunjung mancawarna,
Sang Hyang Siwa dewatanya,
tumpuking ati prenahira,
alinggih sira kalihan,
pantes ta kembang mancawarna,
ring tembe lamun dumadi,
gung prabawa sulaksana,
satya brata tapa semadi.
RIKALA NGANYUT
1.
Ring wetan hana telaga,
rika ta hulun adyusa,
asalah raja bhusana,
anglebur awak tan porat,
hilanganing dasa mala,
sebel kandel ring sarira,
sakwehing mala petaka,
kalebur ring tanana.
2.
Ring kidul hana telaga,
rika ta hulun adyusa,
asalah raja bhusana,
angelebur awak tan porat,
hilanganing dasa mala,
sebel kandel ring sarira,
sakwehing mala petaka,
kalebur ring tanana.
3.
Ring kulon hana telaga,
rika ta hulun adyusa,
asalah raja bhusana,
anglebur awak tan porat,
hilanganing dasa mala,
sebel kandel ring sarira,
sakwehing mala petaka,
kalebur ring tanana.
4.
Ring lor hana telaga,
rika ta hulun adyusa,
asalah raja bhusana,
anglebur awak tan porat,
hilanganing dasa mala,
sebel kandel ring sarira,
sakwehing mala petaka,
kalebur ring tanana.
5.
Ring madya hana telaga,
rika ta hulun adyusa,
asalah raja bhusana,
anglebur awak tan porat,
hilanganing dasa mala,
sebel kandel ring sarira,
sakwehing mala petaka,
kalebur ring tanana
6.
Sampun ta sira abersih,
anambut raja bhusana,
binurating sarwa sari,
mrebuk arum ganda ring wang,
matur sira ring Hyang Guru,
sinung wara nugraha sira,
keasunganing mandi swara,
pari purna tur yowana.
NGESENG - MENDEM
1.
Widyadara presama tumurun
Mendak sang atmane
Watek nawa sanga sami
Tetabuhanne gumuruh
Suling rebab mwang celempung
Pareret warap sarine
Gong gending angalun-alun
Guntang kumarincing karengwan
Curing munya kaklentingan
2.
Sinambut atmane sang putus
Inunggahang mangke
Ring jempana tuhwa ngrawit
Maring-ring sutra wungu
Araab bang ijo murub
Kalasania sutra jingga
Asamir papatran alus
Cina rancanging kambala
Kumurub kenyar komala
3.
Widyadara prasama angrubung
Amumundut kabeh
Pada papadon rimihin
Tatabuhane angalun
Sopacara munggwing ayun
Angresing ati polahe
Swaraning gumpit angalun
Curing rebab kecapya
Guntang muni kaklentingan
4.
Sampun munggah sang atma rinubung
Ring jempana mase
Adulur lampahe aris
Prawatek Hyang maring hayun
Grebegan deniya malaku
Kancit prapta maring swarga
Tumurun akweh mangrubung
Munggah maring meru wetan
Agegenteng mas komala
5.
Tinariban wedurya anglangu
Cendana bature
Ring natare mareresik
Merune katon sumunung
Amangle komala ungu
Kumeranyab pakedepdep
Kumarining manik banyu
Endah pelag lwir muliane
Rahina ratrine sama
RIKALA MENDEM
1.
Kungkungan raga punika mungguh
Makawit tanahe
Mewali ke tanah malih
Rilepasnya atma iku
Wang mur pwa ne kawuwus
Jatinya Ida Hyang Atma
Kari urip wantah iku
Ngangge raga kaniskalan
Nglanturang uripnya ika
2.
Sadurung nyidayang nunggal iku
Ring Hyang Siwa reke
Punarbhawa pacang malih
Ngangge panca maha bhuteku
Panca tan matra puniku
Saha selanturanya
Jantos sida nunggal iku
Ring Ida Hyang Widhi Wasa
Pacang nlasang punarbhawa
MENDEM MEKINGSAN - NGURUGIN
1.
Om Awighnam sembahing hulun
Hyang pretiwi reke
Sang sedahan setra malih
Nunas lugra Hyang Sinuhun
Rumaksanen sawa iku
Saksana manunas lugra
Age amreteka iku
Tan nyantos wates tahunan
Tityang jagi amreteka
2.
Nugraha rahayu atman ipun
Tan keneng papane
Nerakane tan kepanggih
Tekan hana gawe iku
Irika ulun anebus
Ring Bathari pretiwya
Lan Bathara dalem iku
Muwah panguluning setra
Rawuh ring sedahan setra
3.
Aywa nanda Bathari pukulun
Lan watek bhutane
Rumaksa setra tan lugrahin
Wantah titiang nunas rahayu
Nunas ica dewa ratu
Doning hulun labda karya
Om sidhi pangestun hulun
Sweca ratu manugraha
Titiang manyurupang sawa.
KAYEH - NGENING
1.
Ring wetan tirtane petak iku
Anggen panglukatan
Yan hana wong adwa munyi
Mamobab manguluk-uluk
Rawose setata hayu
Tan nyihnayang naya hala
Semitane semu halus
Hyang Iswara mamicayang
Pangleburan dasa mala
2.
Ne ring kidul tlagane mungguh
Rakta warnannyane
Tetamane sami becik
Druwen Hyang Brahma puniku
Irika ta hulun adyus
Pangleburan dasa mala
Panglukatan wong midudu
Mandung mandung padrebean
Salwiring laksana hala
3.
Tirta jenare punika ratu
Kulon ya genahe
Hyang Mahadewa ndruwenin
Panglukatan wonge iku
Laksana dratikrameku
Solah gamya punika
Alpaka ring yayah ibu
Angkara ring sane lanang
Lukat dening tirta ika
4.
Sane ring lor ireng warna iku
Druwen Hyang Wisnune
Panglukatan sane luwih
Ganda ring Widhi puniku
Miwah pitrania puniku
Sahananing lara ica
Lebur dening tirta iku
Mala petakane telas
Geseng antuk we Hyang Siwa
5.
Malih ring madya genahe iku
Druwen Hyang Siwane
Panglukatan wong agering
Melaksana tatan patut
Suda antuk toya iku
Salwiring laksana hala
Rabining wong ya kaburu
Turing ngalap somah anak
Lebur antuk toya ika
MEMARGI
1.
Kacerita pamargan Sang Bayu
Sampun adoh reke
Lampahira tanpa nolih
Ngungkulin negara iku
Prapteng ambarane sampun
Akeh henu kalintangan
Kapungkuran tan aketug
Rawuh maring catus pata
Ararian sirengkana
2.
Awak tandruhing margine catur
Tansah mlecut reke
Raden Bima anarungin
Angelor lampahe asru
We wecine tan kaitung
Prapta maring penangsaran
Lampah nireng suta bayu
Angelor lawan wetan
Ngidul ngulon tan karengwa
3.
Hana danta danti dudu iku
Danta duk gedange
Pisang gading aran teki
Ambilan tatan panawur
Uwa-uwi aran ipun
Sang jogor manik angucap
Suka ingulun angerungu
Wastu kita manggih swarga
Maring meru tumpang lima
4.
Ikita ring lor wetan tinuju
Katemu swargane
Sapa wani angalangin
Sang atma anembah halus
Pukulun duh Hyang Sinuhun
Amwit ingsun sakeng ngke
Lumampah angantun-antun
Prapta ring banjaran sekar
Araryan sira ring arsa
5.
Akweh tang atma alaku anut
Atawan tangise
Apan tan weruh maring margi
Tur angucap duh sang putus
Welasin kelawan ingsun
Apan ingsun nemu jele
Lamun urip maring besuk
Ingsun anawuran hutang
Sang wiku alon angucap
6.
Angucap sira asemu sendu
Kangen kang atmane
Swarane ngasih asih
Duh aja ta sira milu
Apan twara Widhi asung
Sang atma alon lampahe
Prapta ring bale tatemu
Kancit prapta widyadara
Amakta jempana ratna
7.
Batara Pandu lumakwa ring ayun
Lan sri dewi kabeh
Sang pandawa parek sami
Dewi madrine katuntun
Nakula sadewa ngarubung
Prasama alon lakune
Prapta ring banjaran santun
Munia umung tatabuhan
Gong gending munia sasaron
8.
Sampun liwat ring banjaran santun
Prapta ring pangastren
Sesek widyadari prapti
Amapag ring margi agung
Muni tetabuhe halus
Preret kendangnyane kembar
Kasawurin pada umung
Sungu suling karerengwa
Curing nganyih swaran guntang
9.
Widyadarane sami amundut
Jempana mas ratna
Asamir sutra manjeti
Permase sarwa awungu
Kelasa sutra tinurut
Kumeredep paradane
Amangle komala turut
Pekarining pakaranang
Gegrantangan sarwa endah
10.
Bethara pandu munggah amungguh
Ring jempana ratna
Kalih sareng dewi madri
Widyadarane amundut
Widyadari pada ngarubung
Mwang prawatek swarga kabeh
Angayap betara pandu
Kumerebeg kang lumampah
Swarane tan panglinggaran
11.
Tatabuhania muni ring ayun
Ngureret ngarengia
Curinge anganyih-anyih
Ketanjekin gangsa anut
Sulinge angalup-alup
Kadi sungsut sasolahe
Gupit swarania ngulangun
Kalentingan lawan sangka
Umenge maring akasa
12.
Gong maswara angalun-alun
Mwah swaran bende
Tlembungnia amunia jangih
Kocap-kocap ulat rengu
Swarane amelas kayun
Kumerebeg pakerenceng
Endah pelag lwir tinutur
Jengah punang wong angayap
Kumerinting pakenyahnyah
13.
Wus liwat bale pangarip iku
Prapta ring pangastren
Trus lampah sampun kairing
Ring bale kandeg katemu
Meh prapta ring bale agung
Liwat kaketeg puniku
Ring bale warna alungguh
Irika sami mararian
Tumurun alelesuan
14.
Betari Kunti ika angrubung
Sang pandawa kabeh
Hyang pandu sama angrepekin
Munggah sira maring meru
Sareng dewi madri tumut
Ring meru tumpang sawelas
Tan sipi alep dinulu
Ring meru wetan linggihnia
Ari sumena angraras
15.
Angladag paratama arurus
Mabatur cenana
Asri alep angreresik
Watu komalania wungu
Mwah sekar merik arum
Alep tinonton polahe
Teja abang abra murub
Dina ratri tan tengeran
Wengine sama rahina
PANCA LAYWA
1.
Panca laywane punika mungguh
Kedapan plasane
Soka nata nagasari
Kedapan kepel puniku
Bangsah muang muncuk gadung
Pusuhan padma putih reke
Busung daun pudak iku
Tunjung biru lan rijasa
Dusa keling don intaran
2.
Mangkin raris reka galih iku
Tunjunge ring sirah
Pusuhan padma dadi pipi
Alis don intaran iku
Baongin baan muncuk gadung
Betek batis daun pudak iku
Pala lengen baan busung
Isite kembang rijasa
Kajang sinome ban bangsah
3.
Rarisang nyepit punika ratu
Tetep magelang benang
Arta satak manimpalin
Raris sepit saking hulu
Ring sasenden genah iku
Arinira sami kabeh
Tetep panyepite sampun
Ring bale slunglung gingsirang
Irika pacang mangirag
4.
Sampun munggah ring bale salunglung
Sami sentanane
Sanak putu tetep sami
Duwegan gading puniku
Pangiragan antuk tebu
Tebu ratune utama
Raris ngirag mangkin asru
Sami tata laksanane
Satingkah sama utama
5.
Wus mangirag rarisang manyidu
Sidu antuk emas
Sentanane mangrihinin
Kesarengin sanak putu
Sami pada wus manyidu
Kagenahang ring kalungah
Bekelin mas perak iku
Miwah jinah wadon sangka
Wadon sarine utama
6.
Adegang puspane mangkin ratu
Upih pangawake
Galihin baan tiying gading
Wastra sutra petak halus
Antengin daluang kayu
Kalawistane dimuka
Matimpal kalpika asru
Tunjung biru di kupingnya
Sekar jepun kembang patpat
7.
Ee baas tungkednyane puniku
Malilit ambengan
Matimpal kapuk madori
Payas puspa nika halus
Pamangku mapuja sampun
Raris kalukat puspane
Wus malukat mangkin asru
Pamitang mangkin ka surya
Mrajapati dalem pura
8.
Wus malukat mangkin pacang nganyut
Kapundut puspane
Matatakan bokor ngrawit
Raris mider ya ping telu
Nganyut ke segara gunung
Sami ramia suwarane
Gong gambang gender lan angklung
Sampun edoh pemargine
Prapta ring genahe lina
9.
Tumuli gelis sira inanyut
Hyang Baruna astaw
Bethara nata ring giri
Ngampura mangda rahayu
Saha suci sampun puput
Sampun wusan nganyut mangke
Prasama kabeh umantuk
Tan kocapan Hyang dewata
Prapta ring genahe lina
PENEBUS / NGAGAH
1. Indah ta kita sang suratma iku
Sang jogormanike
Sira ta ngawe sutrepti
Sukertaning petra iku
Iki panebusan ulun
Marupa saji lalauhe
Sajin sang durloma iku
Sira mekel petra ika
Iki amet sajin ira
2. Sega punjung iwak jatah iku
Bathara saci reke
Sira lurah petra iki
Danghyang parimiti iku
Penyarikan petra inut
Iki wreti kakelune
Maka panebusan ulun
Ri kita lan Bethara Yama
Sira maka ratuning petra
3. Nihan sang sarwa damel puniku
Maka panebusane
Aturan ingsun teki
Prasama sira apupul
Elingan sajin sireku
Wehen tangulun nugraha
Mangda sida manggih ayu
Ulun anebus sang atma
Nista madya mautama
4. Aja tan nyukretaning ulun
Abencana reke
Anyengkala anyengkali
Icenin mangda rahayu
Tang marga apadang iku
Tuduhan maring swarga
Mangda sida ayu nulus
Om Sidhirastu astawa
Manusa matur suksma
BANTEN KE SURYA
Bantene ke surya niki ratu
Suci ngero reke
Pras ajengan dewa dewi
Pabangkite beten sampun
Gelar sanga pagenan iku
Magenah ring undag sanggar
Tetep ring pawedan sampun
Suci ngero bebek ukudan
Pras sesantun sarwa patpat
PEMERASAN
1.
Uduh bapa cingak titiang
Dija bapa uli nguni
Titiang ngruruh mailehan
Duh deriki jua kepangguh
Durus bapa cingak titiang
Uli driki
Pianak cucu mengantosang
2.
Pianak cucu jak makejang
Trima pamrasane mangkin
Pada bedik jua kanggoang
Nanging kayune rahayu
Selegang ja cening jumah
Bapa pamit
Nutugang menangun yasa
3.
Durusang bapa memarga
Mogi polih genah becik
Yasayang ja titiang jumah
Raris mangkin munggah jukung
Tan gantas gantas memarga
Tolah tolih
Jukunge nglampah segara
4.
Pianak cucu jak makejang
Cingak jukunge memargi
Sayan sayan mangejohang
Ban ban alon samar saru
Leluhure ngulap ulap
Uduh cening
Bapa maninggalin luwas
5.
Sentanane bengong engsek
Di pamerasane nangun tangis
Bantene tan karunguang
Buyar inguh mangu mangu
Leluhure mrawat rawat
Ane jani
Upakarane lanturang
RING MRAJAPATI
1.
Om Awighnam Sanghyang Sinuhun
Sembah manusane
Ngastawa Hyang Mrajapati
Ulun angaturaken pawungu
Sweca ratu gelis turun
Ngaksi damuh Batharane
Mangayap ngaturang kukus
Manusa manunas ica
Kenak ratu manugraha
2.
Asep menyan mwang kukus arum
Iringan pujane
Dinulur gagending sari
Tejaning Sanghyang tumurun
Umanjing ring budi mungguh
Manyusup ring cita mangke
Manincap ring rasa sampun
Wus malingga ring adnyana
Jenek nyeneng ring hredaya
3.
Puniki aturan sane mungguh
Canang ajumane
Pras daksina mwang suci
Maduluran canang santun
Kirang luwih niki ratu
Gung arta pamopognya
Kenak ratu atatuku
Ring pasar soring wandira
Saha kenak pakayunan.
RIKALA NGANGKID / NGAGAH
1.
Sri Kunti ngregep semu sendu
Pareng lan sanake
Mamusti ngesti wrespati
Kancit sang bima rawuh
Amundut atman sang pandu
Miwah dewi madri reke
Prapta sira maring luhur
Enak ambek dewi kuntya
Muwah sang panca pandawa
2.
Sri dewi kunti gelis anambut
Inangisan reke
Bathara pandu kinaris
Dewi madri tan kantun
Samya nangis melas kayun
Tinutupaken galihe
Prasama sampun akumpul
Sri dewi raja amojar
Duh bapa panca pandawa
TATUKON
TEMBANG UKIR / ADRI
1.
Tatukone mangkin anggen kidung
Upakara matine
Ngiyune makebat kampil
Kasane punika mungguh
Pada ya masurat iku
Ring kasa mungguh surate
Dasaksara padma ring niyu
Kampile masurat padma
Beras mereka wong-wongan
2.
Pindaka sirah klapa awungkul
Bila utu reke
Benang seleme ngebokin
Lekesane solas ditu
Di boknya masih mungguh
Don intaran di alise
Cambenge pindaka cunguh
Jaum keling bulunnyane
Istri selikur lanang solas
3.
Gumpulukan netra adeng iku
Tingkihe ring netra
Tunjung biru ika malih
Pindaka paliat iku
Ring polo tape maungkus
Pinda kuping don deleme
Godoh sumpinge puniku
Sama karna ya pindaka
Manggis pindanang bibihnya
4.
Kasunane rong dasa ring untu
Pat bawang putihe
Punika pindaka caling
Sekar rijasa isit ipun
Pinda layah dodol iku
Pangi pejang di jagute
Kasturi pindaka tilu
Durene pejang di muka
Puput sampun maring sirah
5.
Buluh gading acengkang ring bahu
Mules sutra petak
Jebugarume sawiji
Batun salak pindan ipun
Lungad duang iis iku
Pindaka tulang singgele
Pinda lengen bantal agung
Base buwah juringan lima
Kecambahe bangkit tangan
6.
Tebu cemeng petang keleng mungguh
Seasta panjange
Pinda lengene kekalih
Bantal base jerijin ipun
Ring jerijin tangan ya mungguh
Pindaka tlapakan tangan
Jahe duang impang ditu
Pinda susune karuwa
Limang soroh to akehnya
7.
Miwah ketan gajihe mabubuh
Empehan leput lempe
Kalawan bulung sasapi
Don gatepe anggen ngaput
Geti gempole puniku
Pindaka pungsed ta reke
Ring dumine paya tanduk
Pisang edak duang ijas
Punika pindaka iga
8.
Pinda kampid antuk nyalian buluh
Duang bancang reke
Pusuh biyu pusuhan dadi
Kalih ijas pisang kayu
Nika pindaka peparu
Gula pindaka atine
Benang putih punika usus
Kladi gondange pindaka
Maka rwa babuwahan
9.
Pindaka nyaline paya puwuh
Limpa buah gedange
Bubuh sumsume makulit
Dluwang masurat padmeku
Punika pindaka tudtud
Tebu cemeng bantal pudak
Seasta panjangnya iku
Nanging pada patpat-patpat
Pida batisnya karwa
10.
Base jriji kalih dasa mungguh
Lan bebantenannyane
Punika ya jrijin batis
Tlapakan batise iku
Jahe duang impang iku
Tuwung bwaka tunggak batise
Betek suku ban katimun
Babalungan ban cecana
Atal lengis catur warna
11.
Puniki prasama pinda muluk
Arak berem reke
Tuwak miwah berem injin
Sami-sami pada mapucung
Muwah galuga bareng ditu
Pindaka getih ta reke
Kawat slaka pada galah
Punika pindaka uwat
12.
Genti gempong miwah genti gunung
Gagala sinurane
Prada reke lan gagunting
Maka isin raga iku
Benang sutra bija catur
Lan benang catur warnane
Banyu emas ika tinut
Prasama ika pindaka
Maka rerampinging awak
13.
Tuwung bola sukun lan katimbul
Waluh bligo pare
Kacang rangkep tanah putih
Wangi-wangi masih mungguh
Sranduning raga puniku
Srampitan kebo yosbrana
Bubuh pirata puniku
Lengis merik lungsir petak
Punika sranduning awak
14.
Sutra petak kulite puniku
Carang ee baase
Seet mingmang ya dagingin
Maka tatekene iku
Genep sawarnaning temu
Muwang plawa ampinane
Ne mungguh ruwaning taru
Tatukuan kayu emas
Kayu sugih lan kikihan
15.
Kenanga daun ancake mungguh
Teja ambengane
Padang lepas ika malih
Woh-wohan nasi sagulung
Siap matingkag di tundun
Miwah sarwa babungkilan
Bubuh pirata puniku
Kadagingin calon jatah
Lan ajuman petak jenar
16.
Pindaka kuku kepitan pusuh
Lan tuwung pitpite
Mwang cepaka putih kuning
Maka miwah guling taluh
Carang dapdap anggen nusuk
Sampyannyane naga puspa
Wastra petak anggen rurub
Rajah sastra triaksara
Orti kecer jajepitan
PENGADANG-ADANG
1.
Sajin pangadang-adang puniku
Rarapan pitrane
Sang cikrabala aturin
Pacang ngicalang lareku
Kakalih mewadah wakul
Maaled kampil masurat
Beras nasi kalih pulung
Nanging alednyane ceper
Ambengan lan padang lepas
2.
Madaging klapene abungkul
Antigan satane
Jatah calon deng deng ati
Muwang brabas ayung-ayung
Jangannyane bayem luhur
Miwah balung gagenderan
Katupang lan balung kidung
Ular alir serambitan
Garem miwah sera rakta
3.
Madaging tum kacu lan tum ijung
Tum gagenderane
Balung bolong muwang kakali
Miwah urutan matunu
Daging ya panak biyu
Saka wenang rakannyane
Wadah antuk wakul busung
Kecer orti jajepitan
Rateng mentah pada nunggal
4.
Sajin bwanane punika mungguh
Sega tepengane
Sambel adas kadagingin
Miwah sajenge apucung
Malih sajin weci iku
Sekul sasah lan kawangen
Mawadah piring puniku
Kalawan bubuh pirata
Miwah bija catur warna
5.
Sajin Bathara Kalane mungguh
Payuk misi toya
Punika makalung pipis
Nanging wantah lima likur
Pabresihan bija catur
Miwah dyus kamaligine
Duwegan ditu abungkul
Kelawan plawa ambungan
Punika dados awadah
6.
Bathara Kala mamukti iku
Pasajinnya reke
Muwang sorohan pebangkit
Malih sajin awan iku
Kembang urane puniku
Sajin titi gonggang reke
Bubuh piratane mungguh
Sajin semut gula klapa
Buluh mules sutra petak
7.
Medaging bulun merak puniku
Kemaon maleme
Bulun angsa jaum kodi
Matekep ban jebugarum
Klawan sekule apulung
Sera rakta iwaknyane
Elingang pun ika ratu
Patut patut kabuatang
Bawang jahe ika muwah
8.
Sajin rarene punika ratu
Akeh segehane
Sami ya mawadah tangkih
Nanging wantah pelukutus
Kacang komak iwak ipun
Sajin empas ijo reke
Taluh bebek ya tatelu
Miwah ulam bawi mentah
Kalih bija catur warna
9.
Klapane asigar nika ratu
Madaging gendise
Awadah punika dadi
Sajin kebo raja iku
Muncuk dapdap tigang muncuk
Miwah padang lepas reke
Sajin asu gaplong mungguh
Sagulung sekul punika
Iwaknyane calon patpat
10.
Taler munggah balung gending iku
Sawenang rakane
Sajin itik ulu leking
Segene ya kalih pulung
Brengkes miwah balung kidung
Miwah daging jajerone
Lan sajin waksida malung
Bubuh pirata punika
Wot bekatul iwak nika
11.
Dagingin punika bija catur
Awadah dadosne
Sajin asu jamprah malih
Segene nika apulung
Maiwak katupang balung
Isin jeron lan berengkes
Kadagingin bija catur
Miwah sajin temekure
Satus kutus akehniya
12.
Dadosang limang wadah puniku
Sajin tukad reke
Sajin uma sajin pasih
Sajin bwana sajin gunung
Saji manca warna iku
Sami matunggalan wadah
Di madya segehe brumbun
Sane putih miwak nyalyan
Sane barak miwak udang
13.
Sane ireng nika mulam yuyu
Sane kuning lele
Brubun srandu iwak malih
Pabyakawon sareng ditu
Matunggalan wadah ratu
Miwah saji panebusan
Sajin Suratmane mungguh
Lalawuh anggen iwaknya
Puput punang panebusan
14.
Sajin kaki patuk mangkin mungguh
Sanunggal tumpenge
Be tutu ayam dagingin
Nanging wadahnyane wakul
Tungked wesi canggah telu
Matanceb carang agondang
Kampil anggen kamben wakul
Pepetete wastra poleng
Madaging beras akulak
15.
Muwang jinah satak lima likur
Lawe lan pisange
Iber iber ayam wiring
Pelas miwah gerang agung
Woh wohan lan bija ratus
Jajepitan lan kakecer
Matanceb orti puniku
Presama pada magalah
Sami nika tunggal wadah
16.
Mangkin sajin jikrabala mungguh
Iwak sulampite
Lima likur kehnya jati
Lan sajin kokokaniku
Segehnya ramesan iku
Balung gagending iwake
Antiganing itik iku
Miwah klapane asigar
Gendise sakerak ika
17.
Malih sajin Widyadari ratu
Sege pangkon reke
Sekul petak miwah kuning
Mawunga sekar manurut
Warnan segehe puniku
Matekep adeng madadar
Tepat pesor taler mungguh
Sakawenang rakan niya
Punika dados awadah
18.
Malih sajin sang buta kakulung
Sege pangkon reke
Iwakniya genep akawis
Muwah sajin bangkaliku
Ulamniya mewadah sinduk
Miwah sajin sang suratma
Sekule mewadah kawu
Maulam ya balung gita
Nanging sami pada matah
19.
Sera lebeng matah ulamiku
Isin jajerone
Presama nika madaging
Dados petang ceper iku
Brengkes miwah pelas marus
Sama ya pada magalah
Malih sajin buta pancung
Iwaknya tasik selutan
Sembuwuk sekul lembaran
WEWEHAN
1.
Maka bekel Sanghyang atma tuhu
Sarin pagawene
Ento sangu bekel mulih
Boya ja I pangan kinum
Miwah panganggene murub
Ento tuah anggen di lemah
Makejang ento tanpa unduk
Di suban ceninge metinggal
Kasugian tanpa guna
2.
Pianak somah braya liyu
Ngateh ke semane
Pada mekelin eling
Di subane pada mantuk
Cening laut pati untul
Tuara tepuk baan margane
Angen-angen ngelah liyu
Sane jati tan pasaja
Bas sanget baan ngamotang
3.
Dwaning keto cening melah ngerungu
Dabdabang bekele
Sane utama kardinin
Kotaman bekele mantuk
Angge kasukan setuhu
Eda mengulah sekalane
Sekala niskala ruruh
Dasarin baan kanirmalan
Kadi linging Hyang agama
SIKARINI
1.
Hyang Iswara maring Purwa
Sarwa pinge bhusananira
Tunjung petak puspanira
Lembu putih wahananira
Babahan Sang Kala Wisesa
Atunggu saha senjata
Linggihira munggwing sarira
Ring papusuh padmasana.
2.
Hyang Mahesora ring Ghneya
Sarwa dadu Bhusananira
Tunjung dadu puspanira
Angsa maka wahananira
Babahan Sang Kala Jaya
Sang atunggu saha sanjata
Stananira ing sarira
Haneng peparu pernahira
3.
Hyang Brahma maring Daksina
Sarwa abang bhusananira
Tunjung abang puspanira
Lwir gadharba wahananira
Babahan Sang Kala Mandi
Sang atunggu saha sanjata
Stananira ing sarira
Tungtunging ati pernah ira
4.
Hyang Rudra maring Neriti
sarwa jingga bhusanannira,
tunjung jingga puspanira
liman agung wahananira
babahan sang Kala Cakra,
sang atunggu saha sanjata,
stananira ing sarira
ring jejaring pernahira
5.
Hyang Mahadewa ring Pascima
sarwa jenar bhinusanan,
tunjung jenar puspanira
Nagapasa wahananira,
babahan Sang Kala Swarna
sang atunggu saha sanjata,
stananira ing sarira
haneng ungsilan pernah ira.
6.
Hyang Sangkara ring wayabya
sarwa ijo sinandangira,
tunjung ijo puspanira
kuda maka wahananira,
babahan sang Kala Badra
sang atunggu saha sanjata,
stananira ing sarira
haneng limpa perna ira.
7.
Hyang Wisnu maring utara
sarwa ireng sinandangira,
tunjung nila puspanira
sang garuda wahananira,
babahan sang Mandi Guru
sang atunggu saha sanjata,
stananira ing sarira
haneng ampru pernahira.
8.
Hyang Sambu haneng ersanya
sarwa biru sinandangira,
tunjung biru puspanira
warak maka wahananira,
babahan sang Kala Mraja
sang atunggu saha sanjata,
stananira ing sarira
ring usus agung pernahira.
9.
Sang Hyang Siwa haneng madya
sarwa warna sinandangira,
tunjung warna puspanira
sang Wimana wahananira,
babahan sang Kala Sana
sang atunggu saha sanjata,
stananira ing sarira
haneng ineban padmasana.
10.
Hata ri wus ngastungkara
watek Dewata Nawa Sanga,
Dukuh Suladri kelawan kang istri
mekek sanga dwara,
angde sang tri kama rupa
manas budhi lawan sang atma,
moksa umoring acintya
tumilaring ikang Bhur loka.
11.
Karmawasana kelawan Prana
haneng lingga sarira,
lawan Panca Maha Bhuta
sumuruping ibu pertiwi,
matemahan Nagapasa
kelewaran ing Kama-Loka,
gineseng geni ropata
linebur semala petaka.
12.
Swasta tan ketaman mala
Sang Pitara umoring Widhi,
mungsir maring Kedewatan
sukhasana ing Budha-laya,
lumepet sakeng kurungan
lwir urangka manjinging duwung,
tumoning angga sarira
yaya tampak kuntul anglayang.
13.
Semu rimrim Sang Hyang Atma
mesat miber haneng Nirbana,
diptaning damar kurungan
anyuluhi kang marga sanga,
mesat sireng Maha Para
Nirwana haneng Sapta Loka,
umanjinging swarga dibya
sang niskalatma nungkap sadyuh.
14.
Punang laywan rinuruban
Dukuh Suladri mwang dayita,
wibukti lineng sarira
sinuksema adnyana sidhi,
kastawa kejana loka
Sanghyang Ongkara ngepet pati,
marmaning kreta semaya
byakta mulih sangkaning dadi.
------------------
Majeng ring pengwacen :
Titiang mupulang daging cakepan puniki saking makudang-kudang sumber, menawi wenten iwang antuk titiang nyurat lan nedun, mangda ledang ida dane ngicenin tuntunan lan pemargi sane patut, kirang langkung titiang ngelungsur pangampura.
Sumber Referensi:
Tulisan : I Wayan Sukeman
Imajiner Nuswantoro
