Sura Sudira Jayanikangrat Swuh Brastha Tekap Olah Darmastuti
&
Candra Sengkalaning Tahun
(Dening Dhalang Ki Sunyoto Bojonegoro)
Rerumpakan tembung ing nginggil menika sejatosipun sampun hanjrah dhateng bebrayan agung, tur sampun rowakaken / jembaraken dening para Dhalang-dhalang konndhang kados panjenenganipun ki Narto Sabdo swargi.
Dene Saloka menika sejatosipun wonten Serat Witaradya karya agung R. Rongga Warsita, ing thn 80 asring kawedharaken dening ki Anom Suroto dene jangkepipun woten 11 bab kados kula aturaken ngadhap menika.
1. Jagra angkara winangun > Sipating Satriya kudu bisa meper hawa napsu, amangun diri.
2. Sarjana marjayeng westhi > wong kang linuwih iku yekti kang bakal bisa nyirnakake bebaya lan kamurkan.
3. Puwara kasup kasup kuwasa > ora jeneng mokal lamun ing tembe ana Satriya misuwur kuwasa, labet saka ora nindakake kamurkan.
4. Wasita jro wedha muni > sastraning (wewarah) sajroning buku (Kitab) wus ngandhakake Apiwulang luhur.
5. Sura dira jayaningrat > sapa wong kang ngegungake kasuran lan kasudiran.
6. Lebur dening pangastuti > sirna ing tindak kang tansah miturut darmaning Gusti kang akarya Jagat.
Kacadhet dumugi mriki menawi dipun sekaraken mawi sekar Kinanthu jalaran jumbuh kalian guru lagu, guru wilangan twin gatranipun.
Dene jangkepipun 11 bab kadhos ngandhap menika..
7. Ring janma dikang winangun> marang wong kang linuwih, ditata uripe ora bakal tumindak angkara.
8. Kumenyar wimbaning Rawi > gumebyar kadi pletheking Srengenge.
9. Menang kang sarwa dumadi > wus cetha sak isining jagat ingkang gumelar.
10. Hambeg santa paramarta > wong kang ora angkara murka, watake alus ora bakal gawe kapitunane liyan, iku den gandrungi titah.
11. Puwara hanyakrawati > wong kang watake alus oara gawe kapitunane liyan, ora jeneng mokal yekti ingkono mesthi bakal amangku jagat lan nguwasani ing samu barang reh....
Mekaten babaring Serat Witaradya ingkang kula ngertosi, dene wonten ingkang lakung pana twin gamblang mangga kula aturi jangkepi!!
Tartamtu seratan saha pemanggih kula kathah lepatipun, mila ing mriki kula nyuwun pangaputen ingkang kathah, sak kadariny lampah sak gaduking manah anut kadewasaning kesagetaning jiwa kula.
Mbok bilih mekaten sepisan malih nyuwun pangaputen matur nuwun.....
Candra sengkalaning tahun
Tilaraning para Sarjana sujaning budi paring tilaran buku" Minongka pakem, kangge ngrakit tembung utawi basa nedahaken angkaning tahun!.
Kalaning manah tumlawung, mila kula lajeng bukak buku ingkang kula gadhahi, ngiras pates dhudhah mutiara kependhem utawi budaya ingkang sampun lungset umpami busana!.
Dene pangrakiting tembung Candra Sengkala kula ungelipun mekaten :
Amising Segara Karya Urip!!!.
Tamtu kathah para kadang ingkang kirang mangertos tembung wau kok saget dados angkaning tahun Hijriah sakmenika?.
Amis nedahaken ongka: 6
Segara nedahaken ongka: 4
Karya (perbuatan) nedahaken ongka: 4
Urip nedahaken ongka : 1.
Menawi dipun urutaken angkanipun 6441, menawi dipun walik angkanipun dados tahun 1446 Hijriah!.
Mekaten angge kula ngrakit tembung Candra Sekala miturut buku pakem kangge pathokan ndamel tembung Candra Sengkala.
Kula pitados tasih kathah para kadang" Ingkang langkung lebda (pinter) ngrakit tembung ingkang kados kula aturaken.
Mila mangga kula aturi paring panyaruwe saha paring dhawuh minongka tambahing sesereban ing babagan budaya utawi kawruh ingkang sampun meh ical saking bebrayan sakmenika!.
Mboten ketang namung lombok ning dherek tombok, mrica kecut mboten ketang sakuni- unine atur kula, lepat nyuwun pangaputen.
Pungkasaning atur mugi rahayu ingkang sami pinanggih, ugi tansah nampi sihing Gusti anggenipun mecaki warsa enggal menika rahayu
Imajiner Nuswantoro
