NGULAT SARIRA
Sabên titah kadunungan luput
Panyaruwé ndlidir kanggo sing luput
Tansah métani nora urun pémut
Malah nuwuhaké kahanan kang sêmrawut
Sabên janma kanugrahan rong prêkara
Éling lan lali manunggal ing jiwangga
Awèh panyaruwé ora dadi apa
Waton nora nuwuhaké daksiya
Jroning pasrawungan
Ngulat sarira dadia padatan
Aja mung wasis nyaruwé luputé liyan
Murih nora kélangan kawicaksanan
Ngulat sarira kudu katindakaké
Murih nora sêmbrana jroning nyaruwé
Dadi luwih bêcik ing têmbé mburiné
Nora ninggal tatu mring sêpadhané.
