SINOM KADIRI
Leluhur kita sedaya
Ingkang wonten ing Kadiri
Nenggih sang prabu Erlangga
Ibu Dewi Kilisuci
Sang Jayabaya ugi
Raja kang gagah tur luhur
Ugi buta Locaya
Kang wonten ing kulon kali
Tunggul wulung mapan ing wetan bengawan
Sarta pra leluhur samya
Kang datan sinebut nami
Sadaya nggemblengken tekad
Saiyeg saeka kapti
Harumeksa Kadiri
Murih adil subur makmur
Tan na kang cecengilan
Luhur ing budi pakarti
Ayem tentrem guyub rukun tepaslira
Awit ing jaman menika
Tan tepung budi pakarti
Pra pangarsa keh kang lena
Tan ngrasuk budi pakerti
Mangka budaya jawi
Budaya kang adi luhung
Adi ateges endah
Luhung dhuwur drajat neki
Keh wong manca kang angudi kawruh Jawa
Ingkang kathah sapunika
Sugih kendel bandha wani
Datan ajrih ing pidana
Dikunjara ora wedi
Sing penting oleh bathi
Tan etung sanak sedulur
Sanadyan kanca rowang
Datan mikir dina mburi
Tan perduli iku kalal apa karam
Patilasan purbakala
Dipun anggep papaning jim
Wong sing sok saba ing kana
Dipun anggep tiyang musrik
Dikira nyembah Gusti
Pandakwa ingkang keliru
Yen tan weruh takona
Marang wong kang mangerteni
Kang sinembah Gusti ingkang Maha Kuasa
Mekaten atur kawula
Kawontenan jaman mangkin
Mugiya paduka karsa
Mbantu donga dhateng Gusti
Murih enggala bukti
Owah tingkah lakunipun
Ngerteni budaya
Warisan leluhur sami
Tingkah laku landhesan budaya Jawa
