PUPUS KANG ORA TRUBUS
(wayang ora isa nenthokake lakon. Najan wayang duwe karep nrajang pesthine Dalang)
"Djo Bedjo !! .... kuwi rak Wulan Sri Wulandari to ? biyuuuhh jan tambah ayu ... ora luntur ayune ... isih kaya jaman biyen . Adem tenan nyawang legeyane ... "
(kandhane Parmin kang lungguh jejerku sinambi nyenggol lengenku)
Aku mung meneng ndhingkluk , tak lirik panyawange Parmin ora uwal saka pawongan wanitå ing kang lagi caturan karo Sumini .
Sumini kuwi Kanca kawit cilik kang lagi duwe ewuh gedhen nampa mantu .
Lan dina ... iki sakwise selawe taun ora tau kepethuk Wulan .
Kepara oleh kabar yen wis ana seminggu iki bali sambang budhene kang tunggal desa karo aku , Parmin lan Sumini .
Wulan teka ana pasugatan ngundhuh mantu ing omahe Sumini.
Dheeeggg ....
tratapan rasane ati weruh blegere .
Selawe taun ora tau weruh ragane , najan pawartane tansah kadangkala mampir ana kuping .
Ayu .... ayu temenan , isih kaya jaman rikala dadi kanca atiku nalika isih sekolah .
Kepara saiki mundhak luwih - luwih ayune ... miyayeni tindhak tandhuke .
Aku ora wani mandheng , samar yen adu panyawang njur dheweke weruh aku . Atiku dadi saya cilik . Lingsem .
Mung kala-kala pojok mata iki ora bisa di tata , tansah nyolong panyawang nguwasi sekabehe polahe .
Apa iya ... Wulandari isih nyimpen tatu krana pokalku luwih saka selawe taun kepungkur ??
Aahhh .... atiku saya ciut yen kelingan .
Ngulu idu krasa pait ing gorokan .
Selawe taun aku mendhem rasa . Rasa luput ... rasa kangen ... rasa tresna ... uga rasa getun marang Wulandari .
Rina wengi tansah mendhem ubale rasa kepingin sapetemon ,
nanging bareng saiki pawongane wis ana ngarepku ...
aku malah rumangsa kaya manuk gagak kang kepingin ndhemok rembulan .
Aahhh .... kepiye ...?? kepiye iki ....
Atiku mosah masih kaya bubar keterak lindhu .
Biyen ....
Wulandari kuwi prawan prasaja kang lugu tur ayu ndhemenake .
Atiku kepilut ,
ora nyangka yen prawan ayu kuwi pranyata uga ndhuweni rasa marang aku .
Jaka ndesa kang sarwa kekurangan .
Kaya ketiban ndaru rasane nalika kenya kang dadi salah sijine ratu kembang ing taman kuwi nampa talining tresnaku .
Aku kang ora pati bagus ... ora duwe kaluwihan apa-apa
Pinter ora ... sugih bandha ya ora ...
Raga mung saderma tanpa karan endhah sinawang , lulang keling kobong dening panase srengenge ...
Njur bisa sinandhing runtang runtung karo kenya ayu kang lulange kaya gading kasunaran srengenge .
Dhuuuhhh jaman semana rasane kaya ora bisa pinisah .
Saben dina anane mung kepingin reruntungan bocah loro .
Saya suwe tresna saya ngrembaka .
Apamaneh bareng saben dina srawung ... ngerti alus budine kenya prasaja iki . Ati rasane tansaya kaya kena pulut kang ora bisa di ilangi .
Nanging .....
Karan ati mesthi wae isa kena godha .
Aku kegodha endhahe raga kenya liya .
Najan ora ayu sekabehe kaya Wulandari ... nanging solah tingkahe raga kenya anyar kuwi bisa nggugah lelanange para priya ...
Lan aku .... aku kang tibane mung ndhuweni iman luwih tipis saka dluwang , kegodha ...
Aku luwih milih panggodhane raga kang bisa nggugah lelanange priya katimbang ayune budi kang prasaja .
Wulandari tatu ... ning mung meneng tanpa swara .
Mung pojok mripate netes banyu wening tanda catuning ati .
Ora tau ngluputake aku ,
Ora tau njaluk alesanku ...
Dheweke lunga nggawa tatu jeru kang tak blerehake ana atine .
Aku meneng
Wulandari meneng
Tanpa ana ukara ... talining tresna kapunggel peksa .
Njur kabeh lumaku anut ilining banyu ,
Aku nglakoni lakonku ,
Wulandari ilang tanpa pamit nggawa tatu .
Selawe taun nggembol kekes,
kepingin njaluk ngapura marang Wulandari .
Ning ora ndhuweni kewanen .
Ora weruh papan dununge , mung kala-kala kuping iki keprungu pawarta kang ginawa angin .
Wulandari wis karamut dening priya kang tata lahir batine .
Priya pnggedhe kang alus bebudhene kayadene Wulandari .
Najan wis ora timur ning gematine marang Wulandari kaya lintang kang tansah ngancani rembulan ing awang-awang .
Keprungu kabar kuwi ... atiku melu bungah nanging ya ngrasa kebrongot kobonge rasa ...
Kudune aku sing gemati marang Wulandari .
Kudune aku sing nyanding Wulandari .
Kudune aku sing ngancani Wulandari tekaning pati ....
Nanging ....
Aaahhh .... wayang ora isa nenthokake lakon .
Najan wayang duwe karep nrajang pesthine Dalang .