ORA ANA KANG LANGGENG
Bebendu-Ne Gusti Allah kadya wus ora sinirep maneh jalaran kauningan para titahe ya abdi-Ne nglakoni sasenenge lan sakarepe atine dhewe. Prahara, bayu bajra, kobongan dalah sakehing reribed dadi gegambaran minangka ganjaran ukumane Gusti. Ewasamono, manungsa isih bae durung ngrumangsani solah tingkah kang gawe dedukane Gusti.
Ing satengahing bebendu-Ne Gusti angelingake bab kang penting tumrap umat rinipta-Ne dene sejatine ora ana kang langgeng jroning uriping manungsa. Ora ambedakake wong luput, wong sing bener uga klebu para pemimpin kabeh kena sawabe.
Ngaca lan mawas kadadean sing mawantu-wantu ing saindenge arcapada iki sayogya kita umating Gusti kang ditresnani, padha bali marek ing ngarsa-Ne nyadhong pangaksama katuntuna lan rineksa lumaku ing dhawuhe Gusti anetepi ana ing dalan kang bener. Kita umat titahe Gusti kaelingake supaya nora angkuh/jemawa. Sabarang kemajuan, kabecikan, kajayan kang rinengkuh manungsa iku sejatine kanugrahane Gusti Kang Maha Kawasa. Manungsa mula bukane rinipta mawa nugraha akal lan budi, mula ora samesthine akal lan budi mau dipigunakake kanggo kapentingan lan kamulyan pribadi, lali sangkan parane. Mendah ora elok yen manungsa nepuk dhadha, kabeh kamulyan kang rinengkuh mau ora ana sing langgeng. Ana mangsane kang maune dhuwur bakal kaasorake, kang asor bakal kaentas marang kamulyan. Lamun Gusti ngersakake mundhut bali kamulyan iku, kita ora bisa selak.
Uriping manungsa ora langgeng, ana mangsane ninggal donya. Samubarang kang ana ing arcapada iki uga ora langgeng, lir gumanti owah gingsir. Hamung Sih Katresnane Gusti kang langgeng. Panjenengane ora nate kandheg anggatekake lan preduli marang umat titah-E. Bebendu kang katandukake uga wujud pigatene Gusti supaya manungsa rumangsa tumindak luput padha mtatobat lan bali ing dalan kang bener ing ayunane Gusti.
Sumangga kita ayubagya mapagake pamreduline Gusti klawan kebak rasa sokur lan suka rena nggumantungake lan ngarep-arepake Sih-katresnan-Ne kang langgeng.
Mugya sarwa rahayu kang pinanggih awit saking keparengipun Gusti Kang Maha Asih, Gusti amberkahi
Amin Amin