PEPELING
(Sekar Sarkara)
Anyarkara kang dumadineki
Kabeh mau karsaning Hyang Suksma
Wujud asih mring titahe
Minangka paring pemut
Mrih tan samya anggunggung dhiri
Lepya mring ingkang yasa
Mung anggung ketungkul
Digang digung adiguna
Temah lali kudu sumungkem mring Gusti
Tuk'ing sih kayuwanan
Mula payo kadang-kadangmami
Anglenggana yen luput lan dosa
Hanyadhong sih aksamane
Mrih sirna kang pageblug
Bali tentrem kadya ing uni
Mardika akekridha
Sanitya rahayu
Tebih sakehing rubeda
Tan sumelang was-was hangayahi kardi
Wit jinangkung ing Suksma
SEKAR SARKARA
Wahya sampun malbeng madyaratri
Wahya janma wus kepati nendra
Lerem ing pagulingane
Swasana sepi samun
Muhung walang ataga muni
Midid kang samirana
Mimbuh rasa nglangut
Kumeliping taranggana
Ngiwi-iwi mring ingong kang tanpa kanthi
Kèrem ngumbar gagasan
Madyaratri wahya kang piniji
Nglerem driya angeningken cipta
Anyaket marang Gustine
Ngaraspada sumujud
Nyuntak gegebenganing ati
Nyadhong asih wilasa
pangayomanipun
Anggunga paring nugraha
Bagaswaras ayem tentrem sagung batih
Rahayu sanityasa
Imajier Nuswantoro
