MARA ENGGAL ELINGA
(Gurit Sarkara)
Tikus pithi amemangan pari
Saben-saben mung ngamunasika
Kadang tani tandurane
Pari kang lemu-lemu
Datan ngukup keh padha mati
Pindhane pra pangarsa
Kang nerak ing kukum
Ngalalke sakehing cara
Murih bisa kasembadan urip mukti
Gawe tuna kawula
Busanane rapi nganggo dhasi
Jaja mungal ngatonke wibawa
Mrih sinuyud kawulane
Murih kabeh tumungkul
Kawicaksananira yekti
Kudu nut mring anglingnya
Mangka mung pus-apus
Apuskrama kang sanyata
Mbilaeni tumrap deg-jejeging nagri
Kebak ing samudana
Kang mangkana pakarti puniki
Dadya ama tumraping nagara
Melang-melang kawulane
Mung bisa angling angluh
Ngelus jaja sarwi miyati
Tan bisa apa-apa
Nadyan nahen gempung
Mulat kanyatan kang ana
Saperangan pangarsa padha korupsi
Prihatin jroning nala
Saupama gelem ngrumangsani
Pangkat semat kabeh mung titipan
Nugraha saking Gustine
Amanah kang satuhu
Karya bagyamulyaning dasih
Kawula sanagara
Mrih tentrem rahayu
Mara den enggal elinga
Urip kudu piguna tumrap sasami
Ywa mung mikir priyangga