WUYUNG (Sekar Pocung)
Sekar pocung kinarya jampine wuyung
Wuyung mring andika
Manik pepujaning ati
Siyang ratri tansah kumanthil neng netra
Kawistara saben-saben mung ngalamun
Risang pepujanta
Kang tansah ngratoni ati
Mèsam-mèsem anggana kadya wong owah
Melas temen yen wuyung kongsi kedlarung
Lali samubarang
Kadi wong wuru kepati
Usadane kalamun wus bisa panggya
Kalamun ta kasembadan bisa pangguh
Klawan pepujanta
Kang wuru sakala mari
Sukarena kang wuyung antuk usada
Nyuntak kapang sinamun ing swara arum
Samya sesekaran
Ginita sesukeng kapti
Sekar pocung minangka langen asmara