WASPADA MARANG JATINING PAMAWAS WIDAGDA ING LAKU UTAMA
(Serat Kamiyana)
Medal saking Blabar kawat kentheng Waja Raden Bratasena tan kuwawa nrenggalani kridhanipun ingkang paman Arya Gandhamana. Nadyan ta kesinungan Tirta Rasa Kundha karosane 80 gajah tuwin kuku pancanaka datan saged busekaken kulite, nalika pancanaka nyenggol Songsong robyong sakala Arya Gandhamana jenggeleg dados Dewa Amral raseksa pitung gunung gedhene.
Lumebu gelangganging sayembara Raden Puntadewa amundhi jamus Kalimasada daya panguwasane angel lamun ta den caritakake. Larut musna kasektene Arya Gandhamana nglumpruk tanpa bayu rebah gumebruk ing bantala, makaten kang dados pangandhika :
Gandhamana : " Anak-anakku Pandhawa ayo padha nyaketa mrene Ngger, sayembara wus pari purna, nini Drupadi dikukup dening anakku Puntadewa, kang wenang dadi guru lakine ."
Pandawa : "Sendika ngestokaken dhawuh paman."
Bima : " Ya Gandhamana pamanku."
Arjuna : " Dhuh paman , mugi keparenga nglunturaken kawruh kasektenipun kang prasasat jagad datan timbang."
Gandhamana : " Iya kulup, nanging sadurunge anak-anakku Pandawa kudu wis atul anggone golongake cipta , banjur waspada marang sejatining tingal yaiku Pramana.
Tumlawung iku kelalen marang Aling-alinge (gampange wis tanpa aling-aling). Klawan pangerti saka karepe dhewe sarta ya ngrasa dhewe. Eneng ening eling cethane.
Eneng enenging raga lan pancadriya, ening eninging cipta, dene eling ya elinge budi. Kudu krasa dhewe ngerti saka karepe dhewe.
Mungguh lali iku anggone ora eling miturut kaelingane angen-angen yaiku lali marang
Alaming wujud lali marang badane dhewe. Jalaran nalika iku wus katut kapindhah marang wewengkone kasunyatan. Dadi nadjan lali nanging kawengku ing elinge jiwa."
Arjuna : " Paman , babar pisan kawedharna mungguh jiwa tuwin sukma."
Gandhamana : " Ya, yen wus bisa nglungguhake cipta, lagi bisa netepi ing sukma. Ana tembung SUKSMANEN tegese karasakna nganggo rasa kasukman kang katemu ing jroning eneng, ening eling.
Ananging lungguhing jiwa mono wus ora kamomoran pangrasa kalahiran satithik2a mula dinebut kalakuwan kang tumrap bangsa batin. Kepriye lakune ?"
Bratasena : " Ha........, Pitakon iku sejatine ora perlu dijawab, sabab kang takon mangkono iku mesthi panganggo, mangka payembahe jiwa iku sesanggemaning jiwa (kang nganggo panganggo mau) dadi angen-angen pangrasane ati, pancaindriya sarta badan wadhag......ora duwe wewenang takon mangkono. Dene wewenange amung takon kepriye panyembahe cipta marang jiwa lan panyembahe raga marang cipta."
Ringkesipun carita Raden Puntadewa kaparingan SONGSONG ROBYONG, dene Raden Bratasena kaparingan Aji Bandung Bandawasa, Aji Ungksl Bener, Aji Blabak pangantol Antol. Sasampunipun nenggani dhaupe Raden Puntadewa kaliyan Dewi Drupadi, tumuli Arya Gandhamana nutup Tirtanarmada selajengipun muksa saragane.
Catetan :
SONGSONG ROBYONG wujudipun kalung.