DATAN MALANG TUMOLEH AMUNG RASA KAMANUNGSAN KANG TINOLEH
(Serat Sekar Jinarwi dening Sri Harto Jati)
Dungkap sangang candra dasa ari genya Batari Gangga anggarbini miyak langse mandala giri broll mijil ponang jabang bayi, miyos kakung dasar pekiking warni daya-daya kabeta wonten tepining begawan badhe kabucal kacandhet dening prabu Sentanu Dewa makaten ingkang sabda:
Sentanu : "Yayi garwane pun kakang Gangga, sepisan iki pun kakang nyuwun kanthi tulusing ati, ponang jabang bayi sing kaping wolu aja di buang ana begawan sabab wus taktaleni nganggojejantungku"
Gangga : Dhuh sinuwun mugi kemutan prasetya kula duk rikala semanten, purun kapundut garwa dening sang prabu manawi peputra kedah kacemplungaken bengawan."
Sentanu : "Jebul tinemune asor-asore drajate tumitah ana bangsane widadari sing kudune drajate aluhur kebah ing patuladan, bisa-bisane gegedhohane asore ngalah-ngalahi kewan, macan wae ora kolu mbadhog gogore dhewe, lha kok ana widadari nyitesi anake kaya nyites mimik endhi dununge rasa kamanungsane ?"
Gangga : "Hek kaki Sentanu tak jabel basaku, ratu iku kudu netepi bawa laksana apa kang diputusake kudu ditindakake, manawa sira nyimpang ing janji pitukone bakal lumebu ing yomani. Ora amung kulup Sentanu nanging uga tedak turunmu uga ana sing melu-melu nyemplung naraka."
Sentanu : "Iya bathari Gangga, aja amung dosa dadi intipe naraka bakal takaba-abai lamun kanggo jejege rasa kamanungsan ngelingi yen aku iki jejere manungsa. Sang Bathari angucap besok turunku ana sing kaya aku,wus tak semprong bolong padhang narawangan katon tedak turunku satriya plangkawati andustha gendewa kyai Gusara yasane bathara Wisnu ana patengane rama marasepuhe nata Dwarawati, jenenge maling iku dosa panggonane naraka, nanging dosa wong siji kanggo keslametane nusa lan bangsa ngadepi Barisane mungsuh gelar Cakra Byuha, mangkono anggone rila dadi intipe naraka waton gawe kamulyane kawula sanegara nadyan gugure ora lumrah janma."
Lilih penggahipun Bathari Gangga tumuli maringaken ingkang putra dhateng sang Prabu Sentanu dewa makaten wijile pangandika:
Gangga : "Dhuh sang nata binatara, kang rayi badhe dumugekaken dedongenganipun. Rikala semanten wonten ing satunggaling dinten wasu wolu anjang sana katindihan dening wasu priptu nyumurupi Lembu Nandhini saba wonten wana. Garwane wasu Dahu kagungan krenteg arsa andarbeni lembu.
Ature garwane wasu dyahu marang kakunge, duh sang pukulun dununging sesembahan kula, waleh-waleh punapa saestunipun kula punika gadah mitea wonten ngarcapada asesilih dewi Jitawati langkung indah ing warni putrinipun nalendra ing Kusinara putus ing guna wiweka miwah sengsem ulah katemenan, duh pukulun kula kepengin sanget lembu punika dalah pedetipun badhe kula sukaajen mita kula dewi Jitawati. Sok sinten ngombe pohanipun boten saget sepuh boten saged jompo.
Telas ature sang dewi kang kanthi angasih-asih, sang wasu dyahu kalangkung emeng ing penggalih, awit saking sanget panggubelipun ingkang garwa, satemah sang wasu dyahu kepareng amituruti saha andhusta lembu andhini.
Resi Apawa inggih Resi Wasista kang kagungan Lembu Nandhini boten badhe kasamaran bilih lembu Nandhini dipun dhusta wasu wolu, sang resi sanget boten narimah ing penggalih satemah kawiyos pangandhikanipun ngesotaken wasu wolu, bilih badhe sami tumurun wonten ngarcapada dados manungsa.
Pramila para wasu wangsul umareg ngarsanipun sang resi wasista mangsulaken lembu Andhini kalawan nyuwun lumunture pangapura nanging sang resi boten kepareng jabel. Sang Resi ngandhika, Kauningana para Wasu kula sampun kalajeng ngucap tumrap jengandika sedaya punika sampun boten kenging dipun jabel. Jengandika bakal gegenthosan saben tahun mandhap wonten ngarcapadha
Wasu pitu saking luwar sanalika ing wedal kalahiran wonten ing donya dados amung sekedhap sanget wonten ing donya lajeng enggal wangsul malih wonten ing kadewatan. Namung Wasu dyahu ingkang anyalirani dhusta nuwun inggih badhe dangu manggen ing donya, dene minangka wadahipun inggih Bathari Gangga.
Saking dedongengan kula punika Sinuwun, sampun pundhat sesanggeman kula wonten ing ngarcapada tumuli badhe wangsul ing kawidodaren. Dene putra jengandika peparapa Risang Jahnawi Suta.(Bhisma)."
Sentanu : "Ya yayi widadari sewanci -wanci sira kabutuhake aja mindha gawe, kudu ngarah ngabyantarane pun kakang."
Gangga : "Amung dherek karsa paduka sinuwun kang tinitah langkung sampurna, benten pun rayi amung dumadi saking cahya. Milanipun sinuwun amung puji pangestu paduka ing benjange sageda nunggal kahanan, surga nunut neraka katut. Keparenga sinuhun anyalirani jumeneng manungsa sejati surga neraka jagad saisine jinereng kagulung amung sak mrica jinuput sajroning ati."
