SERAT PURWANING PURA BASUKIH
PUPUH PANGKUR
1.
Ksama swamem atur ning wang
Jadma punggung hina guna, tanpa aji
Pangkah umilu angidung
Kadi wong sampun weruha Sanghyang Sastra
Mogha ndatan keni pastu
Ngawedar sarining babad
Sira Sang Arya Pinatih
2.
Kunang Sang Kawiswara
Mamunggel carita sarining lalintih
Kocap sira Empu Bekung
Sampun sida manguripang mamurnayang
Temajanira sang kakung
Mmengaran Manik Angkeran
Maurip sekayeng lagi
PUPUH SINOM LUMBRAH
3.
Asabda sira Brahmana
Duh kita mas jiwa mami
Bagya bapa lumihata
Mahuripta kayeng lagi
Apan bapa masesangi
Kita dados juru sapuh
Maring Basukih Kahyangan
Aja sira manulakin
Mogha wastu
Anaku kadirgha yusa
PUPUH SINOM WUG PAYANGAN
4.
Pawekas bapa ri kita
Aja ta kita mewali
Pamulih maring Jenggala
Bapa pacang mamegatin
Jawa Bali dening tasik
Kita tan sida ngelalu
Dini dewa ngatur ayah
Nawa natyane lakonin
Budi sadu
Anggon dasar kasubaktian
PUPUH GINADA
5.
Panca Srada anggon dasar
Lalima kwehnyane cening
Brahma, Atma, Karmaphala,
Punarbhawa, ne kecatur
Apang sida mikolihang
Pati urip
Sida ngemangguhang Moksa
6.
Brahmane jani bawosang
Percaya ring Sang Hyang Widhi
Ida sane mengadakang
Sangkan paraning tumuwuh
Atmane sane nguripang
Sarwa prani
Atmane pinaka jiwa
PUPUH DURMA
7.
Karmaphala, wantah pikolih laksana
Ala ulah ala panggih
Ayu ulah ayu terima
Hana pikolih cicihan
Ada ne del kepanggih
Sinah bakat
Tong dadi lakar kelidin
8.
Samsara, Punarbhawa kaping papat
Ring bumi malih nyrewadi
Muponin sehanan kaya
Becik kawon ane pidan
To puponin maring urip
Yan tan telas
Kawekas terus puponin
PUPUH MAS KUMAMBANG
9.
Yening sida, ngeret indryane cening
Ngelakonin kedharman
Nginutin pituduh aji
Wekasan memangguhang moksa
10.
Moksa ika, suka tan pawali sedih
Tunggaling Sangkan Paran
Tetujon agama yukti
Moksatem jagat hita ya
PUPUH DANGDANG GENDIS
11.
Singgih ratu sang mahayati naweg titiang
Nenten purun tempal
Sehanan bawos Hyang Muni
Sampunang lali iratu
Wenten putrane asiki
Mangda stata astitiang
Mogi stata rahayu
Antuk kewentenan titiang kawimuda
Pang ten iriki ngawe sisip
Ring ajeng Ida Bathara
12.
Ahum nanak lwir manik, sutan bapa
Aja walang manah
Bapa tan surud ngastiti
Raris Ida lumaku mantuk
Putrane matur pramasanthi
Raris nyujur ke Kayangan
Sinambi ida menyapuh
Ngarerisak maring natar, miwah taman
Ngantos sami katon asri
Tan bina lwir kahendran
PUPUH ADRI
13.
Pirang dina lawas iku
Miara purane
Raris ngaturang bakti
Canang sari sedia sampun
Toya hening dupa harum
Tumuli ngawit amuja
Pangastawa astu pungku
Manunasang panglukatan
Luput ring papa klesa
14.
Singgih ratu Hyang Sinuhun
Aksi kawulane
I tambet ngaturang bakti
Nunasang panuntun idup
Kedohang ring dosa iku
Sida molih kasunyatan
Lara ngedoh baye kewuh
Titiang wantah misadya
Memanjak ngantos antaka
PUPUH GINADA BASUR
15.
Durung puput mangastawa
Kancit rawuh anak lingsir
Busanane sarwa petak
Ke genah Idane nyujur
Saha ngawijilang sabda
Uduh cening
Bagia dewa dini ngayah
16.
Jani Bapa manuturang
Kawiting Pura Basukih
Melahang dewa mirengang
Anggen satwa benjang pungkur
Kawitnya ring desa Aga
Jagat Jawi
Jawi wetan pwa arannya
Imajiner Nuswantoro
