Kidung Danghyang Nirartha
(Pupuh Durma)
1. Kacerita Ida Danghyang Nilartha, kairing antuk putera sami, maka siya sanak, sah saking Blambangan, peraya lunga ke Bali, munggah majukungan, puteranne sinareng sami;
2. Yaning Danghyang masiyosan pelinggihan, waluh kele kalinggihin, kewanten anggen jalaran, mangelintangin samudera, sotaning manusa jati, pemelapan Ida, tan peramada ring Widhi;
3. I Bendega ngoregang jukung melayar, mamuat puteran Danghyang sami, Danghyang ngater pungkuran, wiyakti Dewa nyekala, waluh kele kalinggihin, kadi kapu-kapu kambang, mangeser ampehang angina;
4. Gelis rawuh ring pinggirin Jamberana, jukunge raris kesisi, I Bendega pamit budal, Danghyang turun ring Purancak, wenten pura alit keaksi,irika Danghyang meraryan, ring piyasanne melinggih;
5. Wenten pakemit nyerit matur menyagjag, sampunan jag malinggih, wireh Pura tenget pisan, yan tan ngaturang sembah, sinah sengkala iriki, sampun sering mewedang, rarisang muspa mangkin;
6. Danghyang Nilartha kenyung ida miarsa, raris ida nyawurin, bapa jani nuturang, sang pandita kadi bapa, tan wenang pati sembahin, i pekemit kedeh pisan, mangda Danghyang muspa ugi;
7. Ngapitut Danghyang melinggih peraya nembah, wawu ngayat tangan kalih, mewastu linggihe balbal, rawuh bebaturan samberag, i pekemit mengantenin, dadi ya mekesiyab, nyumbah-nyumbah matur sisip;
8. Suweca Danghyang raris ida ngandika, cai bas kedeh ngaturin, apang bapa menyumbah, da sanget nyungsutang, neh kalpika linggaang dini, maka linggan bapa, tui ada kesungsung dini;
9. Sapunika wecanan Danghyang Nilartha, raris ida ninggalin, ring pesisi nganginang, kairing ban puteran ida, irika ida mengaksi, waluh kelene kambang, kari ring tengahing pasih;
10. Ngandika Danghyang ne jani rimani wekas, sapereti sentanane sami, watek para sedaka, tan wenang nganggen ngerayunang, antuk waluh kele tui, apan mange palinggihan, duk Danghyang nguni ke Bali;
11. Sapunika penyapan Danghyang Nilartha, raris ida manguwedanin, waluh kele punika, puput kaperalinayang, wiyakti ida manga sidhi, waluh kelene ical, ngungsi telenging jeladi;
12. Malih Danghyang memarga malon-alonan, nuut eluwaning pesisi, puterane sami tan pasah, dadi ngaksi pura rusak, kocap kerubuhan angina, Danghyang merika simpang, wenten pemangku kepanggih;
13. Sedek ipun i Pemangku bengong negak, Danghyang ida nakenin kerana purane rusak, i Pemangku matur uninga, mepes midartayang sami, indik purane rusak, kerubuhan antuk angina;
14. Uning titiang rupa sampun wenten ping pat, karubuhan iriki, yan napike cedannya, mangkin ica panembahan, ngaksi raris ngicenin, titian penyungsungan, wenten malingga iriki;
15. Danghyang wawu rauh alon ida ngandika, yan keto atur cai, nunas penyungsungan, jani bapa nugraha, roman bapane akatih, di merune linggihang, simpenang sungsung dini;
16. Uli jani purine dini kacerita, meparab rambut-siwi, tui tekaning wekas, wenang kesembah baan jagat, i Pemangku matur bakti, manahnyane binger, Hyang Widhi tulia nyuwecanin;
17. Wus nugrahang Danghyang malih memarga, ring tengah alas mengeranjing, suket madurgama, tan wenten kanten jalan, wenten bojog keaksi, Danghyang ida ngandika, iba bojog tujuin kai;
18. Kija laku mejalan mengalih desa, i bojog iya mewangsit, baan kipekan nganginang, Danghyang raris memarga, dadi mangguhin lelipi, ageng turin galak, raris Danghyang keungsi;
19. Danghyang Nilartha boya ida ngobetang, manggeh tan jerih memargi, dening ida sampun wikan, indik Kasiyapa tatua, kewanten puteranne sami, jejeh makesiyab, reh Danghyang saut lelipi;
20. Danghyang tan kawisiyan mandin upas sarpa, gelis ida ngunus kering, i Baru-Jeriji parab, katuwek lelipi punika, geseng tumuli mati, puterane kecingak, melaib tan panolih;
21. Ngulah laku pemargine mabelasan, Danghyang gelis nyagjagin, raris kakumpulang, ne pinih luhur ical, Dayu Suwabawa pepasih, wenten kacerita, i Bendesa Gading-wani;
22. Sedek ipun memaumang iwong desa, antuk jejehe tan sipi, mati sedina-dina, wong desane meweh pisan, Gde Bendesa memunyi, kenken ban medaya, nah i tungang sareng sami;
23. Sapunika munyinne Gde Bendesa, Dayu Suwabawa ngerawuhin, iwong desa ngantenang, ayune tan petandingan, kasangguh Dewa nurunin, pada suka girang, iwong desa sareng sami;
24. I Bendesa Gading-wani manunasang, titiang ndaweg matur sisip, antuk titiang tanderuh pisan, sapa sira ja pesengan, wiyakti titiang boya uning, yan warna uning titiang, kanten peragayan luih;
25. Dayu Salaga kenyung alon ngandika, pantes paman tuara uning, doning tembe pisan, nira kepanggih, ring paman, nira tui watek Brahmani, saking Jawi Deha, Dayu Suwabawa pepasih;
26. Wantah nira puteran Danghyang Nilartha, kaloka ring tanah Jawi, Wikhu sidhi adnyana, Ida tuah iring nira mai, lunga ke Bali, Ida pungkuran, puteranne katah mengiring;
27. I Bendesa iwong desa pada manyumbah, sami ngaturin malinggih, raris matur mapinunas, mandawegang mangda ledang, Betari malinggih iriki, jagi sungsung titiang, sareng sami iriki;
28. Sapunika aturnyanne iwong desa, medampiyak sami menangkil, suka idepnyanne lintang, tuara ja emed ngantenang, suwebawan Ida Betari, tui manga utama, waluya watek apsari;
29. Dadi rawuh Ida Danghyang Nilartha, tansah putranne mangiring, maka kutus diriya, irika Danghyang manyingak, Dayu Suwabawa ketangkil, antuk iwong desa, rupanyanne sami seeming;
30. Danghyang wawu Rawuh alon ngandika, ne keiwong desa sami, kangen Bapa manyingak, apa karena kecud kembang, tui rupanne sareng sami, mirib kesakitan, indayang bapa orahin;
31. I Bendesa Gading wani matur sembah, inggih titiang matur uning, ring buk pada Hyang, antuk meweh titiang, wong desa sami iriki, reh jagate kageringan, sadina wenten mati;
32. Inggih suwecanin pamurnan gering punika, titiang wantah nunas hurip, Danghyang Ida ngandika, Bapa nulung nyaratang, apang manulak ne jani, ne mangeringin jagat, apang da enu nyakitin;
33. Ne ganten bapane jani pasangan, ditanggung desa pejangin, apang nyatur desa, iwong desa manunas, manyumbah raris memargi, sampun kepasangan, kadi bawos Danghyang sami;
34. Wiyakti Danghyang Pandhita sidhi sakecap, peremangkin reko mabukti, mekanten tui melawat, watek babutanne punika, pagerudug melaib kepasih, rupannyanne mendahan, wong desa katah mebalih;
35. Iwong desa sami pada mengawokang, i Bendesa tui mamuji, kasidiyan kayun Danghyang, kadi Dewa nyalantara, wiyakti tan petanding, iwong desa makejang, boya wenten kari sakit;
36. Iwong desa luh muani pada girang, sakuwubin Gading wani, memanah pacing maturan, sawentenne ring desa, who-wohane manis-manis, mekadi rayunan, ulamnyanne sarwa suci;
37. Arak berem rasa nggawe binger, canang malih mucukin, Gde Bendesa ngaterang, rencangnyanne ngiringang, penganggenne sami bersih, dabdab mesesaputan, wireh menyadia menangkil;
38. Danghyang Wawu Rawuh sampun ida kakolemang, ring pura Desa malinggih, puteranne sami ngiringang, Danghyang Ida manyingak, I Bendesa Gading wani, rawuh wiyakti dabdab, wong desa katah mangiring;
39. Uli joh nunas lugera raris negak, medampiyak matur bakti, inggih ratu sasuhunan, suecanin titiang samiyan, tambet meatur tan uning, badoh wiyakti jabag, yan manah sujati bakti;
40. Titiang ndawegang mengaturang rayunan, ring woh-wohan akidik, malih ring iyanak samiyan, mangda ida merayunan, nanging sinampura ugi, puput antuk jangan, jagat dusun nggih suwecanin;
41. Kenyung Danghyang raris mawecana banban, bapa suka nampenin, nah dini pahekang ejang, i Bendesa nabdabang, wajik tangan sampun bersih, Danghyang Ida merayunan, sampun puput kawedahin;
42. Para putera maseyosan linggih merayunan, magibung sareng sami, sampun sami wus ngerayunang, raris ngerayunang who-wohan, Danghyang ida nguwecanain, ipun Gde Bendesa, nah jemak cacarang sami;
43. I Bendesa menyumbah manunas lugera, raris ipun mengawukin, iwong desa makejang, mangda nunas lungsuran, wong desanne menesekin, luh muani manunas, lungsuran sami makidik;
44. Sawusanne pada manunas lungsuran, binger idep nyane sami, waluya wus nunas mereta, sabuat sakit nyane hilang, keto pengerasanne sami, raris nesekang, manyumbah meatur uning;
45. Nunas lugera titiang nunas papongoran, antuk peresangga ngelangkungin, nanging saking manah baktiya, awinan lugeraha pisan, atur kaulane bakti, nunas panyungsungan, mangda malingga iriki;
46. Iyanak Betari Suwabawa linggihang, iriki ring Melanting Pulaki, Ida sungsung titiang, sareng wong desa sinamiyan, sakuwuban Gading wani, Danghyang Ida miarsa, raris Ida nyawurin;
47. Yaning keto pinunas caine buat, dening puteran bapa isteri, eweh ban bapa nugerahang, pisan yan cai mengiringang, tui iwong desa sami, pacing perelinayang bapa, jagate dini sami;
48. I Dayu Suwabawa dini iringang, bapa suka nugerahin, wong desa matur ngiringang, sami pada suka girang, reh kicen ngiring Betari, sang meraga utama, malinggih ring Melanting Pulaki;
49. I Bendesa Gading wani matur sembah, titiang matur malih akidik, inggih wenten mindon titiang, ipun Bendesa Mas, taler suwecanin simpangin, wecanayang titiang, nyungsung iyanak iriki;
50. Danghyang Wawu Rawuh nyawurin nakenang, ulih nyen kerana cai, mamindon ring I Bendesa Mas, kenken unduknyanne kocap, i Bendesa matur bakti, raris midartayang, ketatuannyanne rihin;
51. Kumpin titiang ke Bali sareng tetiga, rihin saking Majapahit, nanging meriki pungkuran, ngiring ida Dalem kocap, sesampun sami ring Bali, raris maseyosan genah, ida Dalem mangicenin;
52. Rengen titiang Tan Kober rekewastannya, Kumpin titiang pinih kelih, ring desa Mas kagenahang, nyetanayang Bendesa Mas, ne Madenan reko malih, Tan Mundur wastannya, iriki ring Gading wani;
53. Kumpin titiang punika boya seyosan, I Bendesa Gading wani, sane pinih alitan kocap, Tan Kawur wiyakti wastannya, ring desa Gobeleg malinggih, raris nyetanayang, I Bendesa Gobeleg mangkin;
54. Sapunika satuanne piragin titiang, yan iwang ampura ugi, Danghyang ida miarsa, raris nimbal mangandika, yan keto bapa uning, tui sateriya wang saja, kawite ring Majapahit;
55. Ne jani bapa nyadiya simpang ke Mas, dini apang pageh jati, wiyadin wang desa mekejang, ngiring icening tilingang, aketo cening ne jani, bapa nugerahin ida, luput ring tua pati;
56. Dayu Salaga mendek talangkup anembah, sesampunne kelugerahin, wong desa sami ngiringang, Danghyang raris merelinayang, jagate ring Gading wani, sampun tengah lateriya, suniya jagate sepi;
57. Wiyakti siyep tan wenten suara piarsa, rawuh gumatat-gumitit, suniya saisining jagat, awinan Begametan, Danghyang ida menguwastanin, Betari malingga, manggeh ring Melanting Pulaki;
58. Sampunika kasidiyan Danghyang Nilartha, sekala Sanghyang Widhi, kanten turun ring jagat, kaloka ring Bali Rajiya, I Bendesa Mas mirage, reh ortanne lumberah, indike ring Gading wani;
59. Bendesa Mas peraja mamendak Danghyang, medabdaban memargi, luh muani sagerehan, katah rencangnya ngiringang, kepanggih Danghyang ring margi, i Bendesa ngawas, suwebawan Danghyang tui ning;
60. Bendesa Mas nesekang laut manegak, medampiyak sareng sami, raris matur manyumbah, inggih titiang Bendesa Mas, ndawegang matur sisip, titiang ngaturin simpang, suwecanin panjake bakti;
61. Danghyang Wawu Rauh banban ida mawecana, kerana bapa teka mai, ngungsi Bendesa Mas, wireh ada pabesennya, I Bendesa Gading wani, apang bapa nuturang, indike ring Gading wani;
62. Ne jani iwong desa ditu makejang, sakuuban Gading wani, jani madan Begametan, kasungsung ditu tan liyan, Dayu Suwebawa pepasih, puteran bapa pisan, malingga ring Melanting Pulaki;
63. I Bendesa Mas mehatur saha sembah, suka titiang mirage, titiang maderuwe kadang, antuk subakti pisan, ring lungguh ida Betari, gumanti panyungsungan, panembahan saking Jawi;
64. Titiang ngaturin raris jumah meraryan, Danghyang ida ngalunganin, puterane sami ngiringang, tui maka kutus sanak, I Bendesa Mas mangiring, sampun bersih dabdab, Danghyang Ida raris malinggih;
65. Tana suwe rawuh suamine Bendesa, wiyakti tangkepe pangid, sebenge tama elah, peraya ngaturang rayunan, panjerowanne katah ngiring, sami masuhunan dabdab, nunas lugera raris nangkil;
66. Danghyang Wawu Rauh kenyung ida ngandika, apa kaba ngegawokin, suamine Bendesa Mas, titiang ngaturang rayunan, malih ring iyanak sami, kewanten ampurayang, puput antuk jangan sami;
67. Danghyang Wawu Rauh mesaur banban, suka pisan bapa nampi, nah dini malu pejang, bapa nu mategtegan, demen masiya kerana tui, ngajak Bendesa Mas, lega bapa ketangkilin;
68. Bendesa Mas mepes matur manyumbah, titiang ndaweg matur sisip, peresangga mapinunas, pangeleburan malan titiang, ring dewek titiang ngebekin, suwecanin mangeruwat, mangda sida ugi beresih;
69. Yadian saperetiwi buatning lara roga, sida winasehan beresih, mapan Gangga paman nira, lungguh sang maha Pandita, wenang ngamerastista Bumi, luwih maha pawitera, boya titiang amuji;
70. Danghyang Wawu Rauh alon ida ngandika, nah bapa nugerahin cai, ne jani apang madiksa, Bendesa Mas ngiringang, manguntuk nikel mebakti, sampun wus mapodgala, saha upakara sami;
71. Bendesa Mas manguntuk nyumbah nunasang, pemargan sang Duwi-jati, sidaning amerih kamoksan, manemu tujuaning manah, kerananing amanggih luwih, tan ana mawali muwah, papa petakaning dadi;
72. Danghyang miarsa ature Bendesa Mas, raris ida ngewacanain, Ih cening Bendesa Mas, tutur bapanne dingehang, resepang pejang dihati, margan sang Bujangga, nahayu sarira sai;
73. Sadiya sida nemu ayuning sarira, sukan idepe kepanggih, yan sukan manahe temuang, semadine sida bakat, yang suba nemu semadi, kamoksane pangguhang, peresida amanggih luwih;
74. Ne ada paican bapa sastera dadua, aduwaya lan aduwayadnyani, incepang ring adnyana, rumaga surya sesangka, toya kelawan api, ngeseng malaning sarira, sida bersih tedas ning;
75. Bendesa Mas lintang suka miragiyang, wecanan sang meraga luih, I Bendesa Mas manyumbah, raris mesalin ulah, sotaning polih pawisik, panginceping puja, pituduh tanganne kalih;
76. Bendesa Mas raris ipun mengaturang, piyanaknyane isteri, maka pangurijaga, maduluran panjerowan, punika maka kalih, keambil antuk Danghyang, kasuwen maputera kalih;
77. Anak Bendesa Mas muterayang Ida watek Mas, anak panjerowanne malih, ngawentenang Ida Petapan, kalokayang Mas alitan, puteran Danghyang Wawu perapti, kang wijiling Jawa, tembenin malih midarti;
78. Patnin Danghyang kaucap saking Deha, ngawentenang putera kekalih, isteri wiyakti luhuran, Salaga Suwebawa parab, ring Melanting Pulaki malinggih, lanang ne alitan, Wiraga Sandi pepasih;
79. Watek Kemenuh wiyakti ida kawentenang, rabi pasuruanne malih, meanak Ler Lor Wetan Kuluwan, pat Manowaba dadia, patni Belambanganne malih, meanak Telaga Kenatan, watek Kaniten menadi;
80. Ida kalumberah inucap catur duwija, puteran Danghyang Wawu perapti, Kemenuh Manuaba, Kaniten lawan Mas, ke pat dadi sawiji, watek Siwa ida, kacerita ring Bali;
81. Pirang dina lawas Danghyang wawu perapta, kairing antuk putera sami, sampun maderuwe peseraman, aturan Bendesa Mas, menyanding taman ngelangenin, tunjung nyane katah, toyan telagane ning;
82. Sedek Danghyang malila-lila ring taman, sarwi ida amanting, ring ron tunjung ngadeg Danghyang,mawastu ida kacingak, antuk Betara Tohlangkir, manusa mada Dewa, metu hiyung Betara iri;
83. Wastu kelem pupun Danghyang apagelangan, Danghyang ida manolih, kacingak Sanghyang Maha Dewa, ring gunung Agung malingga, cinging dewane di Bali,tan wenang pinadan, ling Danghyang mantuk gelis;
84. Kaloka kadibiyan Danghyang ring Bali rajiya, katur ring lungguh Sri Aji, aneng Suweca Pura, raris ida aputusan, kiyayi Dauh kandikain, Kiyayi Dauh pua kita, lunga kita den agelis;
85. Angaturin Ida Danghyang wawu prapta, apan kaloka luwih, Dawuh aja nginepa, sadina tulak uga, Kiyayi Dauh nyumbah amuit, budal raris meyas, abusana sarwa putih;
86. Apan manggeh meyasa nyurya sewana, wiyakti sadina mabersih, Kiyayi Dauh Panulisan, tumuli raris memarga, mangelinggihin kuda putih, apajeng taler petak, sok pengawin ireng sami;
87. Tan kawarna lampah ira aneng awan, sampun rekua ngerawuhin, aneng panegara Mas, Kiyayi Dauh Panulisan, saking doh sampun metangkis, tedun saking undakan, nabdabang kampuh memargi;
88. Danghyang wawu rawuh sedek ida ring wedal, i Bendesa Mas menangkil, I Bendesa Mas matolihan, kacingak Kiyayi Panulisan, Bendesa Mas menyagjagin, kenyung matur banban, Gusti tembe ngerawuhin;
89. Sahur kenyung Kiyayi Dauh Panulisan, tiang kautus de Aji, ngaturin sang wawu perapta, Bendesa Mas matur banban, sandang becika ne mangkin, Nabe sampun ring wedal, raris tangkil titiang ngiring;
90. Kiyayi Dauh sareng ring Bendesa Mas, makaron raris menangkil, Kiyayi Dauh nunas lugera, Bendesa Mas mendek nembah, Danghyang kenyung mangelugerahin, malungguh sapisanan, semita rarase pangid;
91. Kiyayi Dauh Panulisan bengong nyingak, suwebawan sang wawu perapti, kapineh ring pekayunan, luir damuh tungtunging lalang, ngentirik mecaya hening, tui Pandhita utama, nyandang jani tunasin;
92. Kiyayi Dauh raris mehatur nunasang, punapi indiking kawi, tatua carita punika, sasuduk artine katah, punapi artine jati, sahur ida Danghyang, kene kojarannya jati;
93. Yan akene sasterannya kene linggannya, kene artinnyane pasti, tuara ada arti katah, meneng Kiyayi Panulisan, sampun karesep ring hati, malih matur nunasang, punapi ulah cumuani;
94. Sahur Danghyang yan cumuana ketatuannya, nguli perewesa inisti, yan kene sasterannya, akene tui sasniya, ring windu rahasiya upeti, irika ungguannya, kama abang kama putih;
95. Meneng Kiyayi Dauh Penulisan, mengerasa-rasa ring hati, sampun peresida karasa, bawose sang Pandhita, Kiyayi Dauh matur malih, inggih punapi tatuannya, wilanganing windu jati;
96. Sahur kenyung Danghyang raris midartayang, kene tatuannyane jati, angka ngaran pawilangan, panelas angka pawilangan, wantah asiya tui pasti, siya mawak windu tunggal, windu tunggal pinalih teri;
97. Dadua nucap Brahma Wisnhu ketatuannya, ne besik Siwha pitu jati, ento maka isining buana, sangkaning windu pawilangan, liyu yan pacing wilangin, tuara bisa telah, yan isin windune wilangin;
98. Kiyayi Dauh gawok kayunne miarsa, bawos Danghyang midartain, kapineh Danghyang samudera, raris mendek manembah, mepes meatur sisip, titiang mendawegang, mapinunas kadi mangkin;
99. Inggih suwecanin titiang wantah nuhun pada, menyadia pacang nyiwi, wiyakti buk padan Danghyang, saking jati nirmala, mapinunas mabersih, nunas pangelukatan, pangeruwat malaning dadi;
100. Danghyang wawu Rauh alon mawecana, bapa jati nyawecanin, atur Kiyayi Panulisan, jani mapodgala, Bendesa Mas matur bakti, inggih yan upekara, titiang ngaturang sami;
101. Kiyayi Dauh sampun rekua mapodgala, puput kaicen pawisik, Kiyayi Dauh Panulisan, lali ring dados utusan, kadi bawos Sri Aji, mengaturin Danghyang, sampun tigang dina meling;
102. Irika Kiyayi Dauh Panulisan, ngaksama matur sisip, titiang nunas papongoran, sampun waneh sasuhunan, antuk iwang titiang lali, wiyakti kandikayang, ngaturin sinuhun meriki;
103. Ida Dalem Waturenggong wantah sarat, mangutus titiang mariki, ngaturin sasuhunan, kenginan lali pisan, antuk kelangenne ngelintangin, kicen panugerahan, bawos Nabe lintang luih;
104. Sahur Danghyang nanak Kiyayi Panulisan, naj kemo budal ne jani, uningayang kapo bapa, ring lungguh Sri Ajiya, ne buin puan bapa tangkil, apang da mebarengan, nanak ring bapa memargi;
105. Kiyayi dauh mendek manyumbah ngiringang, tumuli raris mepamit pemargane gegancangan, tan kewarna ring awan, kacerita ida Sri Aji, aneng Sueca Pura, Kiyayi Dauh kinati-ati;
106. Apan liwar ring ubaya tan teka, sampun langkung tigang wengi, Dalem Ida salit arsa, wawu makesiyan kejaba, Kiyayi Dauh mengerauhin, tui asalin ulah, sampun arupa ngewikonin;
107. Kiyayi Dauh nunas lugera manesekang, mengees malinggih tangkil, Dalem raris ngandika, Kiyayi Dauh maduweng ujar, tua mambek cenik, ujar kua ri kita, rinenga tan hana ring hati;
108. Kiyayi Dauh ngaksama meatur iwang, lipiya dening tembe manggih, ida sang meraga wasman, ring indik aksara telas, sampun garban ida sami, waluya samudera, dalem tan sida ukurin;
109. Sapunika wiyakti sang meraga Pandhita, Suwebawane tedas hening, ngemanggehang kedarman, yoga semadi tan obah, sidhi sekala Hyang Widhi, sampun mabukti katah, ida dane katah uning;
110. Bawos Danghyang malih kalih dina lunga, meriki ida nyadia tangkil, Dalem ida miarsa, kayunne kaduk menggah, lintang duleg mengaksinin, Kiyayi Dauh mapodgala, misa-misa padidihin;
111. Sahur Dalem nah kemo suba meraryan, Kiyayi dauh mepamit, raris ngejabayang, Dalem kayunne tan purna, benjang semeng ida mijil, peraya lunga ke Padang, raris nabdabang pangiring;
112. Raris memarga mangelipurang pekayunan, kocap rawuh ring pesisi, ring Padang bendega katah, kandikayang ngerereh ulam, wiyakti rame ring pesisi, surup ida Hyang Surya, Dalem mesanggerahan gelis;
113. Kacerita ida Danghyang Nilartha, peraya ke Gelgel manangkil,pasemengan memarga, rauh rekua ring Tegal, wenten pura Tugu keaksi, irika meraryan, ring piyasanne malinggih;
114. Wenten Pemangku raris matur menyagjag, sampunang jag malinggih, yan durung ngaturang sembah, jag malinggih diduhuran, sinah kesengkalan iriki, sampun perede pisan, rarisang ke muspa rihin;
115. Danghyang miarsa kenyung ida manggutan, raris tedunan malinggih, peraya ida nembah, ngicepang pekayunan, wawu ngayap tangan kalih, mewastu Tugune bal-bal, rawuh dasarnyanne sami;
116. I Pemangku makesiyab nyopak ngantenang, nyumbah-nyumbah matur sisi, inggih uripang titiang, Danghyang ida ngandika, Mangku bas kedeh ngaturin, apang bapa manyumbah, bapa jani nuturin;
117. Yaning Tugu Pandhita tan wenang nembah, jani bapa manugerahin, ne kancing gelung bapa, kalpikane linggayang, tui dini wangunang candi, apang dadi kasembah, antuk jagate di Bali;
118. I Pemangku nyumbah manunas ngiringang, Danghyang raris ninggalin, pemarganne nganginang, rawuh ring tulikup kocap, kacerita Kiyayi Pinatih, sedek dijaba negak, Danghyang ida mengerawuhin;
119. Kiyayi Pinatih gawok kayune nyingak, suwebawa sang wawu perapti, eling mirage orta, wenten wiku wawu perapta, melingga ring Mas luwih sidi, sinah ne tuwara lenan, Kiyayi Pinatih nyagjagin;
120. Raris negak perenamiya matur nunasang, titiang wantah matur sisip, peresangga ngelungsurang, Danghyang peraya lunga kija, Danghyang ida menyawurin, bapa kasuweca pura, ngenah ring lungguh Sri Aji;
121. Arya Pinatih malih matur mengasab, titiang ndaweg matur sisip, ngaturin Danghyang simpang, titiang ngaturang kelungah, doning titiang lintang miskin, kewanten bakti manah, boya sida katur napi;
122. Kenyung Danghyang nyawurin alon ngandika, cening Ngurah Pinatih, bapa suka simpang, nangingke ajahan, apa ne suba singit, apang eda petengan, pemargan bapa ring margi;
123. Gusti Pinatih ngiring Danghyang kemerajan, ring piyasanne melinggih, Siyayu Pinatih ngaturang, canang wiyakti dabdab, melinggih natiya menangkil, Gusti Pinatih lanang, ngerereh kelungah tuwi gati;
124. Daas diis nesekang raris ngaturang, inggih ratu suwecanin, titiang ngaturang kelungah, Danghyang ida ngandika, keto bapa tuwah ngidih, pacang tatad bapa, inum kesatan ring margi;
125. Jani bapa ngedih base apakpakan, wus nyedah Danghyang memargi, bungkake reko ketatad, rawuh baler siyut desa, sampun dawuh nem singit, Danghyang raris meraryan, pinggir tukade melinggih;
126. Wenten anak mengerereh saang kacingak, Danghyang ida nganikain, baang bapa nyilih belakas, anggon bapa ngempug bungkak, sang ngerereh saang ngaturin, raris nangkil menegak, Danghyang nebih bungkak gelis;
127. Irika Danghyang mengerayunang kelungah, wus merayunan, memargi, celebongkake kegenahang, pinggir tukad punika, Danghyang manerus memargi, tan kewarna ring awan, wantunang satuwene malih;
128. nggih tuturang pecak linggih Danghyang Nilartha, ring merajan Gusti Pinatih, tatakan canang punika, mengendih sadina-dina, malih meambu wangi, wong desa katah mangguhang, raris kewangunang palinggih;
129. Kewastanin Pura Sakti tuwi kalumberah, palinggih Danghyang nguni, wong desa pada manembah, rawuh mangkin kacerita, celobongkak tuturang malih, ring pinggirin tukad, Danghyang ngenahang ne rihin;
130. Wiyakti ngendih ngancorong waluya bulan, wong desa siyut manggihin, raris linggih kekaryanang, kewastanin Pura Tangkulak, ring pinggir tukade nepi, linggih pura punika, desa Siyute mengaci;
131. Sampunika keluwihan Danghyang Nilartha, kaloka ring jagat Bali, awinan kebawosang, Betara wawu rauh Ida, reh dewa tuliya nurunin, panjang yan tuturang, pemargan sang melingga luwih;
132. Kacerita Kiyayi Dauh Panulisan, Bancingah Gelgel nyantosin, linggih ida sasuhunan, reh janjine kalih dina, ne mangkin dinane pasti, sampun lingsir hiyang surya, mekelap Danghyang ngerawuhin;
133. Kiyayi Dauh suka girang raris mendak, mendek menguntuk mebakti, inggih sasuhunan titiang, pelungguh Dalem tan ring pura, lunga ke Padang ne ibi, wiyakti menggah ring titiang, reh titiang simpal pemargi;
134. Antuk titiang madiksa tan manguninga, kenyung Danghyang nyawurin, sotanin memarekan, kasisipang kesayangan, tuwara dadi pacang bani, ring guru wisesa, ida tuwah patut iring;
135. Eda tulak ring yun sang guru wisesa, eda ngupet ring aspi, baktine apang nirmala, jaba jero apang saja, apang putih tekeng hati, apang da buka sinonggan, putih taluh keto pelih;
136. Kiyayi Dauh Panulisan matur sembah, titiang nyuk semayang jati, wecane sesuhunan, sampun surup hiyang arka, Kiyayi Dauh mengaturin, Danghyang mangda simpang, arsa Danghyang ngelunganin;
137. Ring purine Kiyayi Dauh Panulisan, wiyakti sampun dabdab beresih, gumanti kesadiyeyang, pakoleman sasuhunan, Danghyang Ida melinggih, katuran rayunan, puput wantah ngeledangin;
138. Wus ngerayunan raris Danghyang kakoleman, Kiyayi Dauh mepamit, raris ngungsi pemereman, boya nyandang tuturang, kocap sampun galang kangin, paksine meswara, Danghyang ida gelis metangi;
139. Gelis masucian raris nabdabang mepuja, papujan sampun cumawis, sampun reke wus mepuja, Kiyayi Dauh menesekang, manyumbah natiya menangkil, Danghyang mawecana, nanak dabdabang ko jani;
140. Jalan luwas tangkil ring Dalem di Padang, Kiyayi Dauh matur bakti, inggih titiang ngiringang, raris Danghyang memargi, Kiyayi Dauh mengiring, tan kewarneng awan, rawuh ring Padang gelis;
Imajiner Nuswantoro
