KESUSU BAKAL KELIRU SAREH BAKAL PIKOLEH
.png "KESUSU BAKAL KELIRU SAREH BAKAL PIKOLEH")
Cinarita duk samana negari Paranggelung miturut gotheke wisnu purana, kinarya jejering kandha hanenggih prabu Angga. Nandhang getiring manah awit ngelingi trah titise bathara Narayana atur sesaji boten tinarima dening dewa, makaten kang dadi uneg-uneging bathos :
Prabu Angga : " Dhuh Bathara kang hambeg dewa budi tama, kula tansah ngluhuraken Dati ( Hyang tunggal) saha Widatri (Maha Cipta). Dhuh pukulun mugi linepatna sakatahing bendhu tuwin tulak sarik."
Resi Marici : " Dhuh sinuhun ampun kedawan-dawan anggenipun nandhang dukita, ing mangke keparenga niti priksa menggah gegayuhanipun paduka sinuhun . Sekawit sinuhun gadah pangacas arsa jumenengaken patrap panunggal ananging Kawasa punika boten nate ngerang-ngerangi titahe ingkang lampah prihatin. Tartamtu disembadani dening Kawasa , manungsa ngunduh wohing panandur ngrasuk wohing pakarti, manawi boten kiat lampahipun eman-eman kandeg dalan.
Ngelingi sang Prabu dereng kagungan putra keparenga sesaji upayasa (susu campur sega).
Ila-ila leluhur-leluhur kuna pantesipun olah kawruh kasepuhan punika manawi sampun kagungan wayah (putu) dene paduka putra kemawon dereng kagungan. Saged dipun basakaken dereng dawa ususe amung sakdami garing.
Prabu Angga :" Inggih lakar leres pangandika paduka kakang resi. Ha....ha..... ha....
Sesaji saupama dewa ora padha mara ora dadi ngapa , manjing tilam rum jalari ati dadi lega."
Resi Marici : " Sinuhun Kedah prayitna ing batin eling marang Kawasa, saking nomane titah kawasa tansah peparing sedaya panyuwunan disebadani, menawi boten percaya Kawasa badhe minangkani boten sisah nyeyuwun selawaae luwung dahar guling kemawon."
Gelise carita Prabu Angga peputra sesilih Raden Wena, satriya kebah ing kautaman cinaket dening para pandhita, berbudi bawa laksana gumanti keprabone ingkang rama sesilih Narpati Wena.
Jantrane jagad awit saking ciptane tiyang sepuh ingkang kesupen marang ancase, kaya-kaya dielingke dene Kawasa kanthi rawuhe pandhita kleyang kabur kanginen tasih darahe Tulding jan banujan aran Begawan Durparamarta. Makaten sabdanipun,
Durparamarta : " Dhuh putu prabu, semune kabejan ing donya iku ora bisa ginayuh sarana kautaman, paramarta, pangapura, katemenan katulusan sarta panggawe sing ora nerak pepali. Manawa ambeg kaya mangkono mau bisa nekakake kabejan teneh anak prabu sakawulane dadi jajahan negara Pageralun. Kawula alit sengsara mencit kudu pajeg gundul glondhong pengareng-areng marang Pageralun, gineya pajeg ora dipangan kawulane dhewe kareben wareg.
Anak prabu ora lali ngenekake apa sing dibutuhake para tapa lan para Sanyasi ninggalake gebyare donya semono uga wanaprasta yaiku para tapa kang ora dhedhepok. Semono uga sesaji marang dewa wujud sesaji Waka ana kedhaton, Sesaji Pundharika, sesaji Gosawa, kabeh wus dilakoni ya tetep dadi gedibal kesete Pageralun."
Narpati wena :" Adhuh Eyang panembahan dosa punapa ingkang badhe kula sadhang menawi suwala dhateng dhawuh paduka, keparenga paring pangandika."
Duparamarta : " Wiwit dina iki Negara Paranggelung dadekna ajang ngabotohan, saka jangkrik, gemak, jago lan dadu. Aja lali wanita kang sulistiyawarna dipapanake ngarep. Omben-omben hergelek ciu tuak kinarya cecawisan semono uga nyeret candu wajib utama.
Prajurit-prajurit aja dikonkon mangan turu dawuhana salin panganggon ngrampok begal maling ana negara Pageralun. Undangen ratu sewu negara diajak Ngabothohan, bandar arang banget ana critane kalah, saka sesukan dibacutke ngabothohan.
Patilasane Eyangmu Bathara Druwa wujud sela gilang kinurung ringin pitu tansah di pepetri dening para pandhita, gawenen carita ngayawara sing ngaluk-aluk sebaren ana manca negara. Yen wis kena gelar mesthi padha mara sumungkem sela gilang, ninggali bandha amung cukup dibandhani abab pinter carita bebasan ngluruk tanpa bala.
Mastuti dhawuhe Resi Duparamarta malik grembang Negara Paranggelung rusak tanpa tatanan, ilang rasa-rasa kamanungsan bawane saka resi Durparamarta.
Larut kerut bandha-bandha manca negara ana ing glanggang ngabotohan. Semono uga sing lampah begal maling ngecu ngrampok sewune-suwe wani ngrampit negara Pageralun.
Negara kelangan pranatan kelakuwan ora beda jalma alasan asu gedhe menang kerahe. Kanthi aboting ati prabu Angga medal saking negara Paranggelung, boten kiat nenggani ingkang putra prabu wena trimah masanggrah wonten tengahing wana wasa.
Prabu Angga ngegungaken panalangsa metani kalepatanipun wiwit puncuking dumugi iga-iga kang wekasan, rumangsa sedaya sanggite kawasa amung narima trusing batin. Dangu-dangu Sang prabu kuwawi ngipataken naga pasa apus yaiku tetalining donya kang tansah ngreridu lampahing panunggal.
Byar padhang jroning manah sasat anjajah mayangga seta, prabu Angga asalira bathara bebasane Ya Angga ya Narayana, Narayana ing Utara Segara. Wudhar anggenipun samadi makaten sabate :
Angga : " Jagad Dewa bathara, anakku ngger Narpati Wena, kabeh lelakonmu jebul bapakmu sing salah wengweng. Kurang ngati-ngati anggon ku meminta nugrahane jawata, kulup kang dadi lantaran pun bapa bisa ngipatake pepaes donya dadi kasembadan sedyane bapa, jebul kulup kang dadi lantaran. Muga-muga antuka wewengane dewa kulup."
Geger rame negari Paranggelung kedhatengan parang muka kang tinindihan dening Resi Marici ngamuk punggung sora tantaha boten narimahaken dene para resi kapurih laku nangkoda, kapapak dening prabu Wena ing ngalun-alun makaten sumbare :
Narpati Wena : " Weeee lha dalah.....resi ngamuk punggung kaya kurang gawean, diwenehi dagangan bandha carita bisa urip mulya rabi gonta ganti sedina ping pitu klakon, apa kurang trima?
Aja semuci suci, ora susah merang tatal, hayo tamakna pusakamu tak tadahi dhadha.
ora bakal tak oncati Wena sejatine luwih luhur tinimbang Narayana "
Marici :" Ya Wena manawa sira ora taklunasi kawula bisa minger keblate panembah uripe ora beda sato kewan, amung buru nikmat pucuking ilat lan nikmat pucuking perji (planangan) ora ngelingi rasa kamanungsan.
Iki tampanana gagange pari (dami) takpuja dadi sanjata dadi lantarane sira sowan marang Sang Hyang Yama."
Ketaman panah dami Narpati Wena rebah jebabah depani lemah dipun rungkepi dening ingkang ibu Dewi Suniti. Makaten Sabate :
Suniti : " Ngger Wena aja mati kulup sira dhurung duwe turun kepiye mengko negara Pageralun. Dosamu Ibu kang nyangga turune wong suci saupama reged luntura ya suci maneh, tak langkahi kaping telu enggal tangiha kulup."
Linangkahan kaping tiga dening dewi Suniti, raden Wena kaya bayi kang lagi lahir suci tanpa dosa, nanging eloking kahanan gaweane sing Gawe jagad Narpati wena sigar dados kalih wujud bayi kaparingan asma Raden Pripta titising Narayana setunggalipun bayi cemen kaparingan nami Nisadha (Bangsa Nisadha)
Resi Marici tuwin ingkang rayi dewi Suniti sami narimah sedaya sampun karsane Kawasa.
Wasana manawi wonten ukara ingkang boten mranani dhiri kula nyuwun agunging pangaksami.
Saking : Serat Sekar Jinarwi dening Sri Harto Jati
Kaserat malih dening : Imajier Nuswantoro
