Suluk Perang Kembang Lakon Lahire Setyaki / Perang Tanding Raden Permadi kaliyan Buto Cakil
(Versi Ki Anom Suroto)
Kocap kacarito :
Lah ingkana ta wau, ing mangke wus lumawat Raden Permadi ingkang kadherekaken repat punakawan catur,
mandhap saking pertapan hanalasak wana grigiting ancala tepaking wau dadi.
wana gung kasrang tan ketang pringga bayaning marga.
Bebasan munggah gunung mudhun jurang yayah angayam wana tindaking sang apekik
sigra manjing wana winangsraya,
sinigeg ana ing tengahing lampah..,
“KASASAK LAMPAHING DENAWA WINGKING SAKING NEGARI SWALABUMI”…!
Suluk :
Buta Pandawa tata gati wisaya
indriyaksa sara maruta
pawana bana margana
samirana lan warayang
panca bayu wisikan gulingan lima,
ing..
CAKIL : houp! lhadalah,
bojleng bojleng iblis laknat podo jeg-jegkan Hong titi Ywang Kala Ludra manik raja dewaku hanyah.. hanyah..
Satriyo bagus ! mandek, mandek, mandek, aku bakal takon mandek ya gus !
tak takoni cara buto, ngakuo ya lik ya nang ya gus! aja mesam-mesem ngakuo.. ngakuo..
PERMADI : buto buto.., idumu pating caliprat, polahmu kaya manuk branjangan,
menawa tambuh marang aku, balik ngendhi dhangkamu sapa pracekamu?
CAKIL : babo babo! ditakoni durung blaka nyandhak dangka kepa~rat!
kowe tambuh marang aku!
Iki mburi saka keraton Swalabumi keseding Prabu Setiyasa aranku Ditya kala banyak calura!
PERMADI : ditya kala banyak calura?
CAKIL : hiyo Gendir Penjalin..!
PERMADI : gendir penjalin?
CAKIL : ya Klanthang Mimis..!
PERMADI : klanthang mimis?
CAKIL : nadyan kowe sopo?
PERMADI : Pamadyaning Pandawa satriya Madukara Raden Permadi
CAKIL : apa sedyamu ana madyaning alas!
PERMADI : aja takon marang lakuku mara enggal sumingkira bakal tak gawe liwat
CAKIL : ora kena mbacut! kudu bali, kudu bali..!
PERMADI : aweh mbacut ora aweh ngruda paripaksa,
Suluk :
Buta Pandawa tata gati wisaya
indriyaksa sara maruta
pawana bana margana
samirana lan warayang
panca bayu wisikan gulingan lima,
ing..
CAKIL : wani tandhing kelawan aku.!
PERMADI : apa kang tak wedeni
CAKIL : kaci dhuwur!
PERMADI : nempiling ndhasing yaksa ora ndadak nganggo ancik-ancik
CAKIL : kaci sugih japa mantra.!
PERMADI : ora nana jamaking satriya maguru marang bathanging yaksa.
CAKIL : kaci gedhe.!
PERMADI : kurang gedhe ngrangkula gunung leganing atiku,
CAKIL : harda walepa.!
PERMADI : dasar yaksa kapara sangka
CAKIL : kurang prayitna kelakon “TEBAK KEMUDHA AMBROL DADHAMU SATRIYA BAGUS”..!
CAKIL : whadhuh..
lir sikatan nyamber walang satriyo bagus kepa~rat..!
PERMADI : mara majua ora bakal ndak tinggal oncat buto..
CAKIL : yoh! aja kowe sumbar, lena pangendhamu langga curiga mbrodhol ususmu gus..!
CAKIL :
Hadhuhh..!
Wadhuh..!
Adhuh yung..!
Whuah.. Whuah…!
SABUK GUNUNG : e e e..! hah heh hah,, heh hah heh.., Weehh…
..“WHADHUH KANCAKU MATI”..!
Suluk :
Yaksa krura kagiri-giri
gengnya lir prabata,
abang kawlagar
manguwuh ing mungsuh
haminta lawan
anggro sru singanabda
Arsa kadi hanubruk nubruka…
SABUK GUNUNG : raja satriya heh..!
PERMADI : ana paran?
SABUK GUNUNG : mbelakno patine kancaku..!
PERMADI : jaluk mati mara majua,
SABUK GUNUNG : ora ngerti kridhaning buto, adoh balang bedhama cerak saut sampirke nggithok nggo ngreyog “MBLEDUG KWANDAMU” heh..!!
Suluk :
Tunjung mbang terate
irim-irim atap
taping kayu apu
asrining lelumut
kangkungira ijo
sri gadhing diwasa
retnaning rejasa
kembang karang sungsang
bogme araras, raden,
kembangira karang sungsang kembangira karang sungsang
Imajiner Nuswantoro
Aksara Jawanipun :
꧋ꦱꦸꦭꦸꦏ꧀ꦥꦼꦫꦁꦏꦼꦩ꧀ꦧꦁꦭꦏꦺꦴꦤ꧀ꦭꦲꦶꦫꦺꦱꦼꦠꦾꦏꦶ/ꦥꦼꦫꦁꦠꦤ꧀ꦝꦶꦁꦫꦣꦺꦤ꧀ꦥꦼꦂꦩꦣꦶꦏꦭꦶꦪꦤ꧀ꦧꦸꦠꦺꦴꦕꦏꦶꦭ꧀
(ꦮ꦳ꦺꦂꦱꦶꦏꦶꦄꦤꦺꦴꦩ꧀ꦱꦸꦫꦺꦴꦠꦺꦴ)
ꦏꦺꦴꦕꦥ꧀꧇
꧋ꦭꦃꦆꦁꦏꦤꦠꦮꦻꦴ꧈ꦆꦁꦩꦁꦏꦺꦮꦸꦱ꧀ꦭꦸꦩꦮꦠ꧀ꦫꦣꦺꦤ꧀ꦥꦼꦂꦩꦣꦶꦆꦁꦏꦁꦏꦣꦺꦫꦺꦏꦏꦺꦤ꧀ꦉꦥꦠ꧀ꦥꦸꦤꦏꦮꦤ꧀ꦕꦠꦸꦂ꧈
꧋ꦩꦤ꧀ꦝꦥ꧀ꦱꦏꦶꦁꦥꦼꦂꦠꦥꦤ꧀ꦲꦤꦭꦱꦏ꧀ꦮꦤꦒꦿꦶꦒꦶꦠꦶꦁꦄꦚ꧀ꦕꦭꦠꦼꦥꦏꦶꦁꦮꦻꦴꦣꦝꦶ꧉
꧋ꦮꦤꦒꦸꦁꦏꦱꦿꦁꦠꦤ꧀ꦏꦺꦠꦁꦥꦿꦶꦁꦒꦧꦪꦤꦶꦁꦩꦂꦒ꧉
꧋ꦧꦼꦧꦱꦤ꧀ꦩꦸꦁꦒꦃꦒꦸꦤꦸꦁꦩꦸꦣꦸꦤ꧀ꦗꦸꦫꦁꦪꦪꦃꦄꦔꦪꦩ꧀ꦮꦤꦠꦶꦤ꧀ꦝꦏꦶꦁꦱꦁꦄꦥꦺꦏꦶꦏ꧀
ꦱꦶꦒꦿꦩꦚ꧀ꦗꦶꦁꦮꦤꦮꦶꦤꦁꦱꦿꦪ꧈
ꦱꦶꦤꦶꦒꦺꦒ꧀ꦄꦤꦆꦁꦠꦼꦔꦲꦶꦁꦭꦩ꧀ꦥꦃ꧉꧉꧈
“ꦏꦱꦱꦏ꧀ꦭꦩ꧀ꦥꦲꦶꦁꦣꦼꦤꦮꦮꦶꦁꦏꦶꦁꦱꦏꦶꦁꦤꦼꦒꦫꦶꦱ꧀ꦮꦭꦧꦸꦩꦶ”…!
ꦱꦸꦭꦸꦏ꧀꧇
ꦧꦸꦠꦥꦤ꧀ꦝꦮꦠꦠꦒꦠꦶꦮꦶꦱꦪ
ꦆꦤ꧀ꦝꦿꦶꦪꦏ꧀ꦱꦱꦫꦩꦫꦸꦠ
ꦥꦮꦤꦧꦤꦩꦂꦒꦤ
ꦱꦩꦶꦫꦤꦭꦤ꧀ꦮꦫꦪꦁ
ꦥꦚ꧀ꦕꦧꦪꦸꦮꦶꦱꦶꦏꦤ꧀ꦒꦸꦭꦶꦔꦤ꧀ꦭꦶꦩ꧈
ꦆꦁ꧉꧉
ꦕꦏꦶꦭ꧀꧇ ꦲꦺꦴꦈꦥ꧀!ꦭ꧀ꦲꦣꦭꦃ꧈
꧋ꦧꦺꦴꦗ꧀ꦭꦺꦁꦧꦺꦴꦗ꧀ꦭꦺꦁꦆꦧ꧀ꦭꦶꦱ꧀ꦭꦏ꧀ꦤꦠ꧀ꦥꦺꦴꦣꦺꦴꦗꦼꦒ꧀ꦗꦼꦒ꧀ꦏꦤ꧀ꦲꦺꦴꦁꦠꦶꦠꦶꦪ꧀ꦮꦁꦏꦭꦭꦸꦣꦿꦩꦤꦶꦏ꧀ꦫꦗꦣꦺꦮꦏꦸꦲꦚꦃ꧉꧉ꦲꦚꦃ꧉꧉
꧋ꦱꦠꦿꦶꦪꦺꦴꦧꦒꦸꦱ꧀!ꦩꦤ꧀ꦝꦼꦏ꧀ꦩꦤ꧀ꦝꦼꦏ꧀ꦩꦤ꧀ꦝꦼꦏ꧀ꦄꦏꦸꦧꦏꦭ꧀ꦠꦏꦺꦴꦤ꧀ꦩꦤ꧀ꦝꦼꦏ꧀ꦪꦒꦸꦱ꧀!
꧋ꦠꦏ꧀ꦠꦏꦺꦴꦤꦶꦕꦫꦧꦸꦠꦺꦴ꧈ꦔꦏꦸꦮꦺꦴꦪꦭꦶꦏ꧀ꦪꦤꦁꦪꦒꦸꦱ꧀!ꦄꦗꦩꦼꦱꦩ꧀ꦩꦺꦱꦼꦩ꧀ꦔꦏꦸꦮꦺꦴ꧉꧉ꦔꦏꦸꦮꦺꦴ꧉꧉
꧋ꦥꦼꦂꦩꦣꦶ꧇ ꦧꦸꦠꦺꦴꦧꦸꦠꦺꦴ꧉꧉꧈ꦆꦣꦸꦩꦸꦥꦠꦶꦁꦕꦭꦶꦥꦿꦠ꧀ꦥꦺꦴꦭꦃꦩꦸꦏꦪꦩꦤꦸꦏ꧀ꦧꦿꦚ꧀ꦗꦔꦤ꧀
꧋ꦩꦼꦤꦮꦠꦩ꧀ꦧꦸꦃꦩꦫꦁꦄꦏꦸ꧈ꦧꦭꦶꦏ꧀ꦔꦼꦤ꧀ꦝꦶꦣꦁꦏꦩꦸꦱꦥꦥꦿꦕꦺꦏꦩꦸ?
꧋ꦕꦏꦶꦭ꧀꧇ ꦧꦧꦺꦴꦧꦧꦺꦴ!ꦣꦶꦠꦏꦺꦴꦤꦶꦣꦸꦫꦸꦁꦧ꧀ꦭꦏꦚꦤ꧀ꦝꦏ꧀ꦝꦁꦏꦏꦺꦥ~ꦫꦠ꧀!
ꦏꦺꦴꦮꦺꦠꦩ꧀ꦧꦸꦃꦩꦫꦁꦄꦏꦸ!
꧋ꦆꦏꦶꦩ꧀ꦧꦸꦫꦶꦱꦏꦏꦼꦫꦠꦺꦴꦤ꧀ꦱ꧀ꦮꦭꦧꦸꦩꦶꦏꦼꦱꦼꦣꦶꦁꦥꦿꦧꦸꦱꦼꦠꦶꦪꦱꦄꦫꦤ꧀ꦏꦸꦣꦶꦠꦾꦏꦭꦧꦚꦏ꧀ꦕꦭꦸꦫ!
ꦥꦼꦂꦩꦣꦶ꧇ ꦣꦶꦠꦾꦏꦭꦧꦚꦏ꧀ꦕꦭꦸꦫ?
꧋ꦕꦏꦶꦭ꧀꧇ ꦲꦶꦪꦺꦴꦒꦼꦤ꧀ꦝꦶꦂꦥꦺꦚ꧀ꦗꦭꦶꦤ꧀꧈꧉!
ꦥꦼꦂꦩꦣꦶ꧇ ꦒꦼꦤ꧀ꦝꦶꦂꦥꦼꦚ꧀ꦗꦭꦶꦤ꧀?
ꦕꦏꦶꦭ꧀꧇ ꦪꦏ꧀ꦭꦤ꧀ꦛꦁꦩꦶꦩꦶꦱ꧀꧈꧉!
ꦥꦼꦂꦩꦣꦶ꧇ ꦏ꧀ꦭꦤ꧀ꦛꦁꦩꦶꦩꦶꦱ꧀?
ꦕꦏꦶꦭ꧀꧇ ꦤꦣꦾꦤ꧀ꦏꦺꦴꦮꦺꦱꦺꦴꦥꦺꦴ?
꧋ꦥꦼꦂꦩꦣꦶ꧇ ꦥꦩꦣꦾꦤꦶꦁꦥꦤ꧀ꦝꦮꦱꦠꦿꦶꦪꦩꦣꦸꦏꦫꦫꦣꦺꦤ꧀ꦥꦼꦂꦩꦣꦶ
ꦕꦏꦶꦭ꧀꧇ ꦄꦥꦱꦼꦣꦾꦩꦸꦄꦤꦩꦣꦾꦤꦶꦁꦄꦭꦱ꧀!
꧋ꦥꦼꦂꦩꦣꦶ꧇ ꦄꦗꦠꦏꦺꦴꦤ꧀ꦩꦫꦁꦭꦏꦸꦏꦸꦩꦫꦄꦼꦁꦒꦭ꧀ꦱꦸꦩꦶꦁꦏꦶꦫꦧꦏꦭ꧀ꦠꦏ꧀ꦒꦮꦺꦭꦶꦮꦠ꧀
꧋ꦕꦏꦶꦭ꧀꧇ ꦎꦫꦏꦼꦤꦩ꧀ꦧꦕꦸꦠ꧀!ꦏꦸꦣꦸꦧꦭꦶ꧈ꦏꦸꦣꦸꦧꦭꦶ꧉꧉!
꧋ꦥꦼꦂꦩꦣꦶ꧇ ꦄꦮꦺꦃꦩ꧀ꦧꦕꦸꦠ꧀ꦎꦫꦄꦮꦺꦃꦔꦿꦸꦣꦥꦫꦶꦥꦏ꧀ꦱ꧈
ꦱꦸꦭꦸꦏ꧀꧇
ꦧꦸꦠꦥꦤ꧀ꦝꦮꦠꦠꦒꦠꦶꦮꦶꦱꦪ
ꦆꦤ꧀ꦝꦿꦶꦪꦏ꧀ꦱꦱꦫꦩꦫꦸꦠ
ꦥꦮꦤꦧꦤꦩꦂꦒꦤ
ꦱꦩꦶꦫꦤꦭꦤ꧀ꦮꦫꦪꦁ
ꦥꦚ꧀ꦕꦧꦪꦸꦮꦶꦱꦶꦏꦤ꧀ꦒꦸꦭꦶꦔꦤ꧀ꦭꦶꦩ꧈
ꦆꦁ꧉꧉
ꦕꦏꦶꦭ꧀꧇ ꦮꦤꦶꦠꦤ꧀ꦝꦶꦁꦏꦼꦭꦮꦤ꧀ꦄꦏꦸ꧉!
ꦥꦼꦂꦩꦣꦶ꧇ ꦄꦥꦏꦁꦠꦏ꧀ꦮꦼꦣꦼꦤꦶ
ꦕꦏꦶꦭ꧀꧇ ꦏꦕꦶꦣꦸꦮꦸꦂ!
꧋ꦥꦼꦂꦩꦣꦶ꧇ ꦤꦼꦩ꧀ꦥꦶꦭꦶꦁꦤ꧀ꦝꦱꦶꦁꦪꦏ꧀ꦱꦎꦫꦤ꧀ꦝꦣꦏ꧀ꦔꦁꦒꦺꦴꦄꦚ꧀ꦕꦶꦏ꧀ꦄꦚ꧀ꦕꦶꦏ꧀
ꦕꦏꦶꦭ꧀꧇ ꦏꦕꦶꦱꦸꦒꦶꦃꦗꦥꦩꦤ꧀ꦠꦿ꧉!
꧋ꦥꦼꦂꦩꦣꦶ꧇ ꦎꦫꦤꦤꦗꦩꦏꦶꦁꦱꦠꦿꦶꦪꦩꦒꦸꦫꦸꦩꦫꦁꦧꦛꦔꦶꦁꦪꦏ꧀ꦱ꧉
ꦕꦏꦶꦭ꧀꧇ ꦏꦕꦶꦒꦺꦣꦺ꧉!
꧋ꦥꦼꦂꦩꦣꦶ꧇ ꦏꦸꦫꦁꦒꦼꦣꦼꦔꦿꦁꦏꦸꦭꦒꦸꦤꦸꦁꦊꦒꦤꦶꦁꦄꦠꦶꦏꦸ꧈
ꦕꦏꦶꦭ꧀꧇ ꦲꦂꦣꦮꦭꦺꦥ꧉!
ꦥꦼꦂꦩꦣꦶ꧇ ꦣꦱꦂꦪꦏ꧀ꦱꦏꦥꦫꦱꦁꦏ
꧋ꦕꦏꦶꦭ꧀꧇ ꦏꦸꦫꦁꦥꦿꦪꦶꦠ꧀ꦤꦏꦼꦭꦏꦺꦴꦤ꧀“ꦠꦺꦧꦏ꧀ꦏꦼꦩꦸꦣꦄꦩ꧀ꦧꦿꦺꦴꦭ꧀ꦝꦣꦩꦸꦱꦠꦿꦶꦪꦧꦒꦸꦱ꧀”꧉꧉!
ꦕꦏꦶꦭ꧀꧇ ꦮ꧀ꦲꦣꦸꦃ꧉꧉
꧋ꦭꦶꦂꦱꦶꦏꦠꦤ꧀ꦚꦩ꧀ꦧꦺꦂꦮꦭꦁꦱꦠꦿꦶꦪꦺꦴꦧꦒꦸꦱ꧀ꦏꦺꦥ~ꦫꦠ꧀꧈꧉!
꧋ꦥꦼꦂꦩꦣꦶ꧇ ꦩꦫꦩꦗꦸꦮꦎꦫꦧꦏꦭ꧀ꦤ꧀ꦝꦏ꧀ꦠꦶꦁꦒꦭ꧀ꦎꦚ꧀ꦕꦠ꧀ꦧꦸꦠꦺꦴ꧉꧉
꧋ꦕꦏꦶꦭ꧀꧇ ꦪꦺꦴꦃ!ꦄꦗꦏꦺꦴꦮꦺꦱꦸꦩ꧀ꦧꦂ꧈ꦭꦺꦤꦥꦔꦺꦤ꧀ꦝꦩꦸꦭꦁꦒꦕꦸꦫꦶꦒꦩ꧀ꦧꦿꦺꦴꦣꦺꦴꦭ꧀ꦈꦱꦸꦱ꧀ꦩꦸꦒꦸꦱ꧀꧈꧉!
ꦕꦏꦶꦭ꧀꧇
ꦲꦣꦸꦃꦲ꧀꧈꧉!
ꦮꦣꦸꦃ꧉꧉!
ꦄꦣꦸꦃꦪꦸꦁ꧉꧉!
ꦮ꧀ꦲꦸꦮꦃ꧉꧉ꦮ꧀ꦲꦸꦮꦃ…!
꧋ꦱꦧꦸꦏ꧀ꦒꦸꦤꦸꦁ꧇ ꦄꦼꦄꦼꦌ꧉꧉!ꦲꦃꦲꦼꦃꦲꦃ꧈꧈ꦲꦼꦃꦲꦃꦲꦺꦃ꧉꧉꧈ꦮꦼꦄꦼꦃꦲ꧀…
꧉꧉“ꦮ꧀ꦲꦣꦸꦃꦏꦚ꧀ꦕꦏꦸꦩꦠꦶ”꧉꧉!
ꦱꦸꦭꦸꦏ꧀꧇
ꦪꦏ꧀ꦱꦏꦿꦸꦫꦏꦒꦶꦫꦶꦒꦶꦫꦶ
ꦒꦼꦁꦚꦭꦶꦂꦥꦿꦧꦠ꧈
ꦄꦧꦁꦏꦮ꧀ꦭꦒꦂ
ꦩꦔꦸꦮꦸꦃꦆꦁꦩꦸꦁꦱꦸꦃ
ꦲꦩꦶꦤ꧀ꦠꦭꦮꦤ꧀
ꦄꦁꦒꦿꦺꦴꦱꦿꦸꦱꦶꦔꦤꦧ꧀ꦝ
ꦄꦂꦱꦏꦣꦶꦲꦤꦸꦧꦿꦸꦏ꧀ꦤꦸꦧꦿꦸꦏ…
ꦱꦧꦸꦏ꧀ꦒꦸꦤꦸꦁ꧇ ꦫꦗꦱꦠꦿꦶꦪꦲꦺꦃ꧉꧉!
ꦥꦼꦂꦩꦣꦶ꧇ ꦄꦤꦥꦫꦤ꧀?
꧋ꦱꦧꦸꦏ꧀ꦒꦸꦤꦸꦁ꧇ ꦩ꧀ꦧꦼꦭꦏ꧀ꦤꦺꦴꦥꦠꦶꦤꦺꦏꦚ꧀ꦕꦏꦸ꧉꧉!
ꦥꦼꦂꦩꦣꦶ꧇ ꦗꦭꦸꦏ꧀ꦩꦠꦶꦩꦫꦩꦗꦸꦮ꧈
꧋ꦱꦧꦸꦏ꧀ꦒꦸꦤꦸꦁ꧇ ꦎꦫꦔꦼꦂꦠꦶꦏꦿꦶꦣꦤꦶꦁꦧꦸꦠꦺꦴ꧈ꦄꦣꦺꦴꦃꦧꦭꦁꦧꦼꦣꦩꦕꦼꦫꦏ꧀ꦱꦻꦴꦠ꧀ꦱꦩ꧀ꦥꦶꦂꦏꦺꦔ꧀ꦒꦶꦛꦺꦴꦏ꧀ꦔ꧀ꦒꦺꦴꦔꦿꦼꦪꦺꦴꦒ꧀“ꦩ꧀ꦧ꧀ꦭꦼꦣꦸꦒ꧀ꦏ꧀ꦮꦤ꧀ꦝꦩꦸ”ꦲꦺꦃ꧉꧉!!
ꦱꦸꦭꦸꦏ꧀꧇
ꦠꦸꦚ꧀ꦗꦸꦁꦩ꧀ꦧꦁꦠꦼꦫꦠꦺ
ꦆꦫꦶꦩ꧀ꦆꦫꦶꦩ꧀ꦄꦠꦥ꧀
ꦠꦥꦶꦁꦏꦪꦸꦄꦥꦸ
ꦄꦱꦿꦶꦤꦶꦁꦊꦭꦸꦩꦸꦠ꧀
ꦏꦁꦏꦸꦔꦶꦫꦆꦗꦺꦴ
ꦱꦿꦶꦒꦣꦶꦁꦣꦶꦮꦱ
ꦉꦠ꧀ꦤꦤꦶꦁꦉꦗꦱ
ꦏꦼꦩ꧀ꦧꦁꦏꦫꦁꦱꦸꦁꦱꦁ
ꦧꦺꦴꦒ꧀ꦩꦺꦄꦫꦫꦱ꧀ꦫꦣꦺꦤ꧀
ꦏꦼꦩ꧀ꦧꦔꦶꦫꦏꦫꦁꦱꦸꦁꦱꦁꦏꦼꦩ꧀ꦧꦔꦶꦫꦏꦫꦁꦱꦸꦁꦱꦁ
ꦆꦩꦗꦶꦤꦺꦂꦤꦸꦱ꧀ꦮꦤ꧀ꦠꦺꦴꦫꦺꦴ
