MACAPATAN
ꦩꦕꦥꦠꦤ꧀
KINANTHI
Kawi kenaka ing laku
Gelang alit aywa lali
Iwak kawi ywa sembrana
Satindaknya tan nalingsir
Yen nalingsir dadi pocap
Isi sawo nora becik
Aywa ragu jroning laku
Lamun wus tumindak becik
Angaraha urip tata
Siyang pantaraning ratri
Urip aywa padha ngangsa
Mamrih tentrem jroning ati
Satitahira lumaku
Dikebak pangati-ati
Murih urip tan cilaka
Sapa nandur ngundhuh yekti
Aywa caket mring piyala
Digegentur tapaneki
Sapa weweh bakal wuwuh
Gelem suguh dadi sugih
Gagasan lan tetembungan
Tindak-tanduk wus nyawiji
Aywa gampang panasbaran
Sabar subur lair batin
Sing titi sabar ing laku
Amrih becik mupangati
Ywa tansah padha sembrana
Kudu tansah ngati-ati
Tembung satembung kang nyata
Karya padhang jroning galih
Sun kanthi kaki angidung
Angidung sekar kinanthi
Dimen jiwa trus sumunar
Gesang padhang anelahi
Pindha diyan tarawangan
Nyunari tyasing sasami
Pangesthine laku jujur
Datan selak jroning batin
Apa ingkang kinawruhan
Wasis milah sarta milih
Tan gela cuwa neng nala
Manjing karep ati siji
SEKAR GAMBUH
Rongkop rungkading laku
Lamun bener becik tan maelu
Tibaning njata amung ngisin-isini
Angkara gung wus angurung
Pindha diyu pating clonong
Iki padha siningkur
Cecengilan tindak nora jujur
Tandang-tanduk solah-bawa datan kasil
Ucapnya datan ginugu
Amung lir miri kang kopong
Jinarak racakipun
Urip tumiba kalantur-lantur
Kurang eling lan waspada jroning batin
Lakune kajlungup- jlungup
Niba-nangi wus kapentog
SEKAR PANGKUR
Dipadha lulus raharja
Anggonira memayu urip suci
Lah iya dipadha rukun
Sarta ambudidaya
Mesu reh kautaman lan budi luhur
Genging lekas ameminta
Sihing Gusti Mahasuci
Nora wurung gawe wirang
Lamun urip nggugu karsaning dhiri
Samubarang datan ndunung
Lewane gawe cuwa
Sasolahe tatakrama datan tepung
Jroning patrap mung aleman
Dadi pocap siyang ratri
Singkirana kehing godha
Sanyatane karasa wus dumadi
Sirna sumelanging kalbu
Emut tan kasamaran
Jroning urip wruh sejatining urub
Wekasing wisik binuka
Telenging batos wus manjing
Kadya lintang panjerina
Sumorot abyor padhang anelahi
Byar trawangan jroning kalbu
Mangkono wong utama
Sabarang tindak-tanduke ngemu patut
Pantes kinarya tuladha
Dadya pepadhanging jalmi
Wisnya rancak kang rinancang
Jroning laku wus maujud sayekti
Sayektine budi tulus
Tan wigih ringa-ringa
Jer niyating tyas tan minger satuhu
Lumampah nuting pepadhang
Mila lepat ing bilai
Dening: Ki Y.P.B.Wiratmoko
Imajiner Nuswantoro
Aksara Jawanipun :
ꦩꦕꦥꦠꦤ꧀
ꦏꦶꦤꦤ꧀ꦛꦶ
ꦏꦮꦶꦏꦼꦤꦏꦆꦁꦭꦏꦸ
ꦒꦺꦭꦁꦄꦭꦶꦠ꧀ꦄꦪ꧀ꦮꦭꦭꦶ
ꦆꦮꦏ꧀ꦏꦮꦶꦪ꧀ꦮꦱꦼꦩ꧀ꦧꦿꦤ
ꦱꦠꦶꦤ꧀ꦝꦏ꧀ꦚꦠꦤ꧀ꦤꦭꦶꦁꦱꦶꦂ
ꦪꦺꦤ꧀ꦤꦭꦶꦁꦱꦶꦂꦣꦝꦶꦥꦺꦴꦕꦥ꧀
ꦆꦱꦶꦱꦮꦺꦴꦤꦺꦴꦫꦧꦼꦕꦶꦏ꧀
ꦄꦪ꧀ꦮꦫꦒꦸꦗꦿꦺꦴꦤꦶꦁꦭꦏꦸ
ꦭꦩꦸꦤ꧀ꦮꦸꦱ꧀ꦠꦸꦩꦶꦤ꧀ꦝꦏ꧀ꦧꦼꦕꦶꦏ꧀
ꦄꦔꦫꦲꦈꦫꦶꦥ꧀ꦠꦠ
ꦱꦶꦪꦁꦥꦤ꧀ꦠꦫꦤꦶꦁꦫꦠꦿꦶ
ꦈꦫꦶꦥ꧀ꦄꦪ꧀ꦮꦥꦣꦔꦁꦱ
ꦩꦩꦿꦶꦃꦠꦼꦤ꧀ꦠꦿꦼꦩ꧀ꦗꦿꦺꦴꦤꦶꦁꦄꦠꦶ
ꦱꦠꦶꦠꦲꦶꦫꦭꦸꦩꦏꦸ
ꦣꦶꦏꦼꦧꦏ꧀ꦥꦔꦠꦶꦄꦠꦶ
ꦩꦸꦫꦶꦃꦈꦫꦶꦥ꧀ꦠꦤ꧀ꦕꦶꦭꦏ
ꦱꦥꦤꦤ꧀ꦝꦸꦂꦔꦸꦤ꧀ꦝꦸꦃꦪꦼꦏ꧀ꦠꦶ
ꦄꦪ꧀ꦮꦕꦏꦺꦠ꧀ꦩꦿꦶꦁꦥꦶꦪꦭ
ꦣꦶꦒꦺꦒꦺꦤ꧀ꦠꦸꦂꦠꦥꦤꦺꦏꦶ
ꦱꦥꦮꦼꦮꦼꦃꦧꦏꦭ꧀ꦮꦸꦮꦸꦃ
ꦒꦼꦊꦩ꧀ꦱꦸꦒꦸꦃꦣꦝꦶꦱꦸꦒꦶꦃ
ꦒꦒꦱꦤ꧀ꦭꦤ꧀ꦠꦼꦠꦼꦩ꧀ꦧꦸꦔꦤ꧀
ꦠꦶꦤ꧀ꦝꦏ꧀ꦠꦤ꧀ꦝꦸꦏ꧀ꦮꦸꦱ꧀ꦚꦮꦶꦗꦶ
ꦄꦪ꧀ꦮꦒꦩ꧀ꦥꦁꦥꦤꦱ꧀ꦧꦫꦤ꧀
ꦱꦧꦂꦱꦸꦧꦸꦂꦭꦻꦂꦧꦠꦶꦤ꧀
ꦱꦶꦁꦠꦶꦠꦶꦱꦧꦂꦆꦁꦭꦏꦸ
ꦄꦩꦿꦶꦃꦧꦼꦕꦶꦏ꧀ꦩꦸꦥꦔꦠꦶ
ꦪ꧀ꦮꦠꦤ꧀ꦱꦃꦥꦣꦱꦼꦩ꧀ꦧꦿꦤ
ꦏꦸꦣꦸꦠꦤ꧀ꦱꦃꦔꦠꦶꦄꦠꦶ
ꦠꦼꦩ꧀ꦧꦸꦁꦱꦠꦺꦩ꧀ꦧꦸꦁꦏꦁꦚꦠ
ꦏꦂꦪꦥꦣꦁꦗꦿꦺꦴꦤꦶꦁꦒꦭꦶꦃ
ꦱꦸꦤ꧀ꦏꦤ꧀ꦛꦶꦏꦏꦶꦄꦔꦶꦣꦸꦁ
ꦄꦔꦶꦣꦸꦁꦱꦼꦏꦂꦏꦶꦤꦤ꧀ꦛꦶ
ꦣꦶꦩꦺꦤ꧀ꦗꦶꦮꦠꦿꦸꦱ꧀ꦱꦸꦩꦸꦤꦂ
ꦒꦼꦱꦁꦥꦣꦁꦄꦤꦺꦭꦲꦶ
ꦥꦶꦤ꧀ꦝꦣꦶꦪꦤ꧀ꦠꦫꦮꦔꦤ꧀
ꦚꦸꦤꦫꦶꦠꦾꦱꦶꦁꦱꦱꦩꦶ
ꦥꦔꦺꦱ꧀ꦛꦶꦤꦺꦭꦏꦸꦗꦸꦗꦸꦂ
ꦣꦠꦤ꧀ꦱꦺꦭꦏ꧀ꦗꦿꦺꦴꦤꦶꦁꦧꦠꦶꦤ꧀
ꦄꦥꦆꦁꦏꦁꦏꦶꦤꦮꦿꦸꦲꦤ꧀
ꦮꦱꦶꦱ꧀ꦩꦶꦭꦃꦱꦂꦠꦩꦶꦭꦶꦃ
ꦠꦤ꧀ꦒꦼꦭꦕꦸꦮꦤꦺꦁꦤꦭ
ꦩꦚ꧀ꦗꦶꦁꦏꦫꦺꦥ꧀ꦄꦠꦶꦱꦶꦗꦶ
ꦱꦼꦏꦂꦒꦩ꧀ꦧꦸꦃ
ꦫꦺꦴꦁꦏꦺꦴꦥ꧀ꦫꦸꦁꦏꦣꦶꦁꦭꦏꦸ
ꦭꦩꦸꦤ꧀ꦧꦼꦤꦼꦂꦧꦼꦕꦶꦏ꧀ꦠꦤ꧀ꦩꦌꦭꦸ
ꦠꦶꦧꦤꦶꦁꦚ꧀ꦗꦠꦄꦩꦸꦁꦔꦶꦱꦶꦤ꧀ꦆꦱꦶꦤꦶ
ꦄꦁꦏꦫꦒꦸꦁꦮꦸꦱ꧀ꦄꦔꦸꦫꦸꦁ
ꦥꦶꦤ꧀ꦝꦣꦶꦪꦸꦥꦠꦶꦁꦕ꧀ꦭꦺꦴꦤꦺꦴꦁ
ꦆꦏꦶꦥꦣꦱꦶꦤꦶꦁꦏꦸꦂ
ꦕꦼꦕꦼꦔꦶꦭꦤ꧀ꦠꦶꦤ꧀ꦝꦏ꧀ꦤꦺꦴꦫꦗꦸꦗꦸꦂ
ꦠꦤ꧀ꦝꦁꦠꦤ꧀ꦝꦸꦏ꧀ꦱꦺꦴꦭꦃꦧꦮꦣꦠꦤ꧀ꦏꦱꦶꦭ꧀
ꦈꦕꦥ꧀ꦚꦣꦠꦤ꧀ꦒꦶꦤꦸꦒꦸ
ꦄꦩꦸꦁꦭꦶꦂꦩꦶꦫꦶꦏꦁꦏꦺꦴꦥꦺꦴꦁ
ꦗꦶꦤꦫꦏ꧀ꦫꦕꦏꦶꦥꦸꦤ꧀
ꦈꦫꦶꦥ꧀ꦠꦸꦩꦶꦧꦏꦭꦤ꧀ꦠꦸꦂꦭꦤ꧀ꦠꦸꦂ
ꦏꦸꦫꦁꦌꦭꦶꦁꦭꦤ꧀ꦮꦱ꧀ꦥꦣꦗꦿꦺꦴꦤꦶꦁꦧꦠꦶꦤ꧀
ꦭꦏꦸꦤꦺꦏꦗ꧀ꦭꦸꦔꦸꦥ꧀ꦗ꧀ꦭꦸꦔꦸꦥ꧀
ꦤꦶꦧꦤꦔꦶꦮꦸꦱ꧀ꦏꦥꦺꦤ꧀ꦠꦺꦴꦒ꧀
ꦱꦼꦏꦂꦥꦁꦏꦸꦂ
ꦣꦶꦥꦣꦭꦸꦭꦸꦱ꧀ꦫꦲꦂꦗ
ꦄꦁꦒꦺꦴꦤꦶꦫꦩꦼꦩꦪꦸꦈꦫꦶꦥ꧀ꦱꦸꦕꦶ
ꦭꦃꦆꦪꦣꦶꦥꦣꦫꦸꦏꦸꦤ꧀
ꦱꦂꦠꦄꦩ꧀ꦧꦸꦣꦶꦣꦪ
ꦩꦼꦱꦸꦉꦃꦏꦻꦴꦠꦩꦤ꧀ꦭꦤ꧀ꦧꦸꦣꦶꦭꦸꦲꦸꦂ
ꦒꦼꦔꦶꦁꦊꦏꦱ꧀ꦄꦩꦺꦩꦶꦤ꧀ꦠ
ꦱꦶꦲꦶꦁꦒꦸꦱ꧀ꦠꦶꦩꦲꦱꦸꦕꦶ
ꦤꦺꦴꦫꦮꦸꦫꦸꦁꦒꦮꦺꦮꦶꦫꦁ
ꦭꦩꦸꦤ꧀ꦈꦫꦶꦥ꧀ꦔ꧀ꦒꦸꦒꦸꦏꦂꦱꦤꦶꦁꦣꦶꦫꦶ
ꦱꦩꦸꦧꦫꦁꦣꦠꦤ꧀ꦤ꧀ꦝꦸꦤꦸꦁ
ꦊꦮꦤꦺꦒꦮꦺꦕꦸꦮ
ꦱꦱꦺꦴꦭꦲꦺꦠꦠꦏꦿꦩꦣꦠꦤ꧀ꦠꦼꦥꦸꦁ
ꦗꦿꦺꦴꦤꦶꦁꦥꦠꦿꦥ꧀ꦩꦸꦁꦄꦊꦩꦤ꧀
ꦣꦝꦶꦥꦺꦴꦕꦥ꧀ꦱꦶꦪꦁꦫꦠꦿꦶ
ꦱꦶꦁꦏꦶꦫꦤꦏꦼꦲꦶꦁꦒꦺꦴꦣ
ꦱꦚꦠꦤꦺꦏꦫꦱꦮꦸꦱ꧀ꦝꦸꦩꦣꦶ
ꦱꦶꦂꦤꦱꦸꦩꦺꦭꦔꦶꦁꦏꦭ꧀ꦧꦸ
ꦄꦼꦩꦸꦠ꧀ꦠꦤ꧀ꦏꦱꦩꦫꦤ꧀
ꦗꦿꦺꦴꦤꦶꦁꦈꦫꦶꦥ꧀ꦮꦿꦸꦃꦱꦼꦗꦠꦶꦤꦶꦁꦈꦫꦸꦧ꧀
ꦮꦼꦏꦱꦶꦁꦮꦶꦱꦶꦏ꧀ꦧꦶꦤꦸꦏ
ꦠꦼꦊꦔꦶꦁꦧꦠꦺꦴꦱ꧀ꦮꦸꦱ꧀ꦩꦚ꧀ꦗꦶꦁ
ꦏꦣꦾꦭꦶꦤ꧀ꦠꦁꦥꦚ꧀ꦗꦺꦫꦶꦤ
ꦱꦸꦩꦺꦴꦫꦺꦴꦠ꧀ꦄꦧꦾꦺꦴꦂꦥꦣꦁꦄꦤꦺꦭꦲꦶ
ꦧꦾꦂꦠꦿꦮꦔꦤ꧀ꦗꦿꦺꦴꦤꦶꦁꦏꦭ꧀ꦧꦸ
ꦩꦁꦏꦺꦴꦤꦺꦴꦮꦺꦴꦁꦈꦠꦩ
ꦱꦧꦫꦁꦠꦶꦤ꧀ꦝꦏ꧀ꦠꦤ꧀ꦝꦸꦏꦺꦔꦼꦩꦸꦥꦠꦸꦠ꧀
ꦥꦤ꧀ꦠꦺꦱ꧀ꦏꦶꦤꦂꦪꦠꦸꦭꦣ
ꦣꦝꦾꦥꦼꦥꦣꦔꦶꦁꦗꦭ꧀ꦩꦶ
ꦮꦶꦱ꧀ꦚꦫꦚ꧀ꦕꦏ꧀ꦏꦁꦫꦶꦤꦚ꧀ꦕꦁ
ꦗꦿꦺꦴꦤꦶꦁꦭꦏꦸꦮꦸꦱ꧀ꦩꦻꦴꦗꦸꦣ꧀ꦱꦪꦺꦏ꧀ꦠꦶ
ꦱꦪꦺꦏ꧀ꦠꦶꦤꦺꦧꦸꦣꦶꦠꦸꦭꦸꦱ꧀
ꦠꦤ꧀ꦮꦶꦒꦶꦃꦫꦶꦔꦫꦶꦔ
ꦗꦼꦂꦤꦶꦪꦠꦶꦁꦠꦾꦱ꧀ꦠꦤ꧀ꦩꦶꦔꦺꦂꦱꦠꦸꦲꦸ
ꦭꦸꦩꦩ꧀ꦥꦃꦤꦸꦠꦶꦁꦥꦼꦥꦣꦁ
ꦩꦶꦭꦊꦥꦠ꧀ꦆꦁꦧꦶꦭꦻ
ꦣꦼꦤꦶꦁ꧇ꦏꦶꦪ꧀꧈ꦥ꧀꧈ꦧ꧀꧈ꦮꦶꦫꦠ꧀ꦩꦺꦴꦏꦺꦴ
ꦆꦩꦗꦶꦤꦺꦂꦤꦸꦱ꧀ꦮꦤ꧀ꦠꦺꦴꦫꦺꦴ
