TANSAH ELING LAN WASPADA
Aja kagiwang marang kang kasawang.
Aja kapiluyu marang kang kaprungu.
Aja kaduwung marang kang wurung.
Aja gumendhung marang kang durung.
Aksara Jawanipun :
꧋ꦄꦗꦏꦒꦶꦮꦁꦩꦫꦁꦏꦁꦏꦱꦮꦁ꧉
꧋ꦄꦗꦏꦥꦶꦭꦸꦪꦸꦩꦫꦁꦏꦁꦏꦥꦿꦸꦔꦸ꧉
꧋ꦄꦗꦏꦢꦸꦮꦸꦁꦩꦫꦁꦏꦁꦮꦸꦫꦸꦁ꧉
꧋ꦄꦗꦒꦸꦩꦼꦤ꧀ꦝꦸꦁꦩꦫꦁꦏꦁꦢꦸꦫꦸꦁ꧉
Aja kagiwang marang kang kasawang.
Kang kasawang padatan luwih endah, luwih ngresepake ati, katimbang kang didarbeki, jer dadi pawatakané manungsa sarwa kêpingin uga remen dhemen karo sing luwih apik saturut takerane sewang-sewang, kadya unen-unen, "suket ing pekarangane tangga katon luwih ijo".
Ewasemana, kuwi dudu duweke, ora pinesthi andarbeni, lamun ta ambudidaya kasembadan nduwèni durung kantenan bisa ngrukti ngupakara tetep apik punapidéné dadi luwih endah.
Konjuk Sokur marang kang wis kaparingaké dèning Gusti, hamêmayu amrih rahayu kuwi luwih prayoga.
Aja kapiluyu marang kang kaprungu.
Wus kinodrat lamun menungsa warata luwih gampang nampa, gancang precaya, marang pawarta sing nyocogi ati dalah kaya kang kinêrsakaké.
Kamangka pawarta kang binandhung ing karna durung karuwan kanyatané. Ana unèn-unèn "undhaké pawarta, sudané arta", sing tegese, titipan arta bisa suda, pawarta tansåyå ungkårå. Sanadyan ing jaman samangké, pawarta bisa owah saturut gati karepe kang dadi talanging atur. Sêmono ugå ing ratmaya, kaowah-èwah dèning panyêrat amarga gatiné kapti.
Aja kaduwung marang kang wurung.
Ora kabèh kang rinancang ingupaya katindakaké bakal kalêksanan kaya kang kinêrså, lamun kalampahan tanpå sambékålå asilé nora kadya kang kapètang, palah tuna agawé cuwå.
Panglipuring manah kang limrah "Durung wanciné. Dudu bagèyané. Gusti durung maringaké. Lan sapanunggalané ...".
Ewadene bisa uga minangka sasmitå lamun luwih prayogå ngowahi pangarah, ngliru panuju, kanthi methik pangalaman saka kang wus kalampahan.
Aja gumendhung marang kang durung.
Kalebu awak kula priyangga, wanuh karuh marang ukara "aja rumangsa biså", nanging kanyatan namung kinaryå pêpacak lagak palah dadi sarånå gumêndhung kumålangkung amulang sapapådhå, tånpå kêrså "mulat salirå, hanliti dhiri".
Pêpuntoné kawastanan :
꧋ꦢꦸꦫꦸꦁꦥꦸꦚ꧀ꦗꦸꦭ꧀ꦏꦼꦱꦼꦭꦏ꧀ꦗꦸꦗꦸꦭ꧀꧉
꧋ꦢꦸꦫꦸꦁꦧꦼꦕꦸꦱ꧀ꦏꦼꦱꦼꦭꦏ꧀ꦧꦼꦱꦸꦱ꧀꧉
꧋ꦢꦸꦫꦸꦁꦥꦸꦠꦸꦱ꧀ꦏꦼꦱꦼꦭꦏ꧀ꦩꦸꦮꦸꦱ꧀꧉
Durung punjul kêsêlak jujul.
Durung bêcus kêsêlak bêsus.
Durung putus kêsêlak muwus.
Karasan Tembung :
▪︎ kagiwang : [1] kêpèncut, kanyut, kêgimir.
▪︎ kagiwang ~> giwang : obah, owah, gingsir, lingsir.
▪︎ kapiluyu : kasêngsêm, klayu (Kw), kêpencut, kumudu mèlu.
▪︎ kaduwung : kaduhung, gêtun.
▪︎ gumêndhung : umuk, gumêdhé, sumangkéyan.
▪︎ ungkara : [1] pêpuji, donga. [2] tambah, wimbuh, wuwuh.
Imajiner Nuswantoro
