SUGENG WILUJENG WARSA ENGGAL 2024
GEMAH ARIPAH LOH JINAWI KARTA RAHARJA
TANSAH PINARINGAN AYEM MULYO BAGAS WARAS, BAGYO RAHARJO NIR ING SAMBIKOLO
GEMAH tegese kathah para nangkuda kang lumaku dedagangan anglur selur tan ana pedhote, labet datan ana sangsayane margi.
ARIPAH tegese kathah para janma manca negari ingkang samya katrem bebale wisma kadiyo salebeting kitha Nagari Hastina, jejel apipit, bebasan aben cukit tepung taritis papan wiyar katingal rupak.
LOH tegese subur kang sarwa tinandur,
JINAWI tegese murah kang sarwa tinuku.
KARTA tegese para kawula ing padhusunan nungkul pangolahing tetanen, ingon-ingon kebo, sapi, pitik, iwen tan ana cinancangan rahina aglar ing panggonan lamun bengi teka bali marang kandhange dhewe-dhewe.
RAHARJA tegese tebih parangmuka karana para mantri bupati bijaksana limpating kawruh tan kendhat denya ambudiaya kaluhuraning sri narapati. Marmaning Negara Ngastina jeneng anempuh bebasan gedhe obore padhang, jagade dhuwur kukuse, adoh kuncarane.
Ora ngemungake kanan kiring kewala, senadyan ing praja maha praja kathah ingkang samya tumungkul datan sarana linawan bandayuda, amung kayungyung poyane kautaman. Bebasan ingkang celak manglung ingkang tebih mentiyung, asok bulu bekti, glondhong pengareng-areng, peni-peni raja peni, guru bakal guru dadi.
TANSAH PINARINGAN AYEM MULYO BAGAS WARAS, BAGYO RAHARJO NIR ING SAMBIKOLO
Tambanono ngagem keyakinan ingkang dipun tuwuhaken soko telenging ati.
Ombenono nganggo toya sekti kang kaubengan doyonipun pengeran ingkang Moho Pancipto Kang Suci.
Seger kewarasan saking kersane Gusti Pengeran ingkang Moho Sekti.
Rahayu sagung dumadi kalis ing rubedo nir ing sambikolo
Mecaki dino mungkasi warso
Ora kroso umur mundhak tuwo
Ananging tuwo iku Kanugrahan
Paringe kang Moho Kuwoso
Mugo tansah diparingi rahayu widodo
Kalis saking sedoyo rubedo
Roso pangroso dipontho-pontho
Endi sing becik lan endi sing olo
Dadi panglimbanging roso
Sing apik diupokoro
Sing elek dibuwang supoyo ora dadi memolo
Panyuwun dadio tuwo tuwuh
Uripe tetep piguno
Tansah pinaringan ayem mulyo
Bagas-waras, bagyo raharjo
Nir ing sambikolo.
Wilujeng ngelampahi Warsoagung 2024 Masehi
Ngaturaken sedaya kalepatan ingkang sampun, nyuwun agunging pangaksomo
Mugi sedoyo tansah rahayu, wilujeng, bagas, saras, mirah rejeki, tinebihaken lir sabikolo, beboyo lan memolo
Tumuju nagari ingkang ngadil lan makmur sentosa, pejabatipun sedaya amanah nyengkuyung nagari Indonesia Nuswantoro, ulama dhalah tokoh agami sami rukun ingkang sampun kasebat Bhinneka Tunggal Ika, mboten wonten rerusuh amargi masyarakatipun tumus leres makmur lahir bathos sedaya, adedasar luhur Pancasila, UUD 45, NKRI, Toleransi mawa Bhinneka Tunggal Ika Tan Hanna Dharma Mangrwa.
Mugi-mugi kinabulan sedaya kajad lan kaijabah sedoyo panyuwunan dening Gusti Pengeran, Allah SWT.
Gusti Ingkang Murbeng dhumadi
Gusti Ingkang Akarya Jagad
Aamiin Ya Rabbal a'lamin
NYUWUN AGUNGING SAMUDRA PANGAKSAMI SEDOYO KALEPATAN KAWULO
Imajiner Nuswantoro
