Sekar Macapat Dhandhanggula
Katresnane ibu Marang Putra
Sumurupa angger duking nguni
Kalanira sira durung ana
Bapa biyungira kiye
Ingajab jroning kalbu
Bisanira kelakon mbinjing
Bebranahan sesuta
Estri lawan jalu
Siyang ratri hameminta
Sihing Gusti mugi pinaringan siwi
Kang bagus lan sulistya
Suwe suwe biyungira keksi
Lungkrah ngelu kecut senengannya
Amung kudu mutah wae
Katon cahyane alum
Iku tanda lamun nggarbini
Bungah kekalihira
Kabul ing panyuwun
Suka sukur marang Allah
Ingkang sampun paring putra wiji dadi
Nadyan sih jro wetengan
Siyang ratri kekalih memuji
Mbinjang lamun lahire si jabang
Tansah antuk sih marmane
Dadya janma pinunjul
Wignya marang sabarang kardi
Piguna mring bebrayan
Bekti mring Hyang Agung
Wusnya ngancik Sangang Candra
Dasa ari saking guwa garba mijil
Titahing hyang Sukmana
Bungah ing tyas tyang sepuh kekalih
Sutanira lahir kanthi gangsar
Lan ugi para pepunden
Sami amuji sukur
Wayahira manggya basuki
Muga pangajap nala
Tumus jroning kalbu
Pinaringan bagas waras
Ingayoman Gusti ingkang Maha Suci
Rahayu nir memala
Siyang ratri tansah dipun jagi
Nadyan sayah lungkrah tan rinasa
Ing tyas amung Rahayune
Keng putra sang abagus (sang ayu)
Den kekudang den liling liling
Sukeng tyas bapa biyang
Keng suta gumuyu
Yen nangis linela lela
Aja nangis ilang baguse yen nangis
Aluwung angguyua
Wonten sambetipun :
Sekar menika saget kangge jagong bayi utawi pitonan (tingkeban)
