JANTURAN LAMPAHAN WAHYU MAHKOTA RAMA
Lampahan Wahyu Mahkota Rama, meniko adegan ing Pertapa Candra Manik rikala prabu Bisa warna katundhung ingkang rama Begawan kunta wibisana, lajeng janturan meniko kasambung ginem Begawan Kunta Wibisana klawan nyitmanipun satrya panglebur gangsa Raden Kumba karna
Tan bangkit ngunandika hanenggih nata mudha singgela sang prabu bisawarna, rudaning ndriya binendung dening kasantosaning manah þarandhene maksih kawistara kababar ing pakarti, mawali wali sumungkem mring padane ingkang rama kaya kaya taksih eman lamun tinilara.
Dupi wus mengkeraken ingkang rama tumrocos luhira kadhos tirising jawah nelesi busanan nira, kumleyang lampahnya sekedhap mangu parandhene datan tumoleh ajrih kawanguran ingkang rama, kadya sinebit panggalihira begawan kunta wibisana mulat tingkahing ingkang putra nanging ing cipta datan mbadhal marang pirbaning kawasa.
Wauta tilasing narendra singgela sang begawan kunta wibisana kari hanggana raras, ing mangke sang tapa sigra patrap semadhi jroning penggalih pangesti ingkang cinipta muhung kadhangira werda satrya panglebur gangsa duk ing nguni, gedhene pangaribawa yekti kawasa hangirup sukmane raden harya kumba karna ingkang wus mapan aneng alam antara ya swarga pangrantunan
Mugi manggih karahayon ingkang sami pinanggih rahayu nir ing sambikala