BEGAWAN BAGASPATI LENA
(Ki Narto Sabdo)
Ageng agunge katresnaning Sang Begawan Bagaspati marang putrinira, Dewi Pujawati, ingkang gegarwanan kalihan Radèn Narasoma, winujudaké kanthi lilaning driya ngenthengake pati mamrih kabhagyaning anak lan mantune.
Raden Narasoma, kekasihe Prabu Salya natkala maksih mudha, rumangsa lingsêm andarbèni marasepuh apaes ditya, banjur ngaturaké pasêmon lumantar ingkang garwa dhateng marasepuh.
Begawan Bagaspati satunggiling pandhita linuwih kang putus ing kawruh, lebda ing Wedha, tanggap ing sasmita limpad pasang ing grahita, tumuli nimbali ingkang putra-mantu, nglilakaken pati uga masrahaké Aji Candrabirawa marang Raden Narasoma.
Pratingkahé Raden Narasoma kena kaupamakaké "purun wohe, lumuh wité", ewadene Sang Begawan ngawèkani lamun sekabehe prakara kang neka minangka pepesthening Gusti kang kedah tinarima kanthi sumarah. Ageng agunge katresnaning marang putri lan mantuné satuma nora suda satêngu nora susut.