KEKUDANGANE SUDARMA MARANG ANAK ANUNG ANENG GITA
Saksampunipun alukar busana cara kabrahmanan gantos kasatriyan, pepuntoning rembag Sri Bathara Kresna mutusaken byar gragat rahina Prabu Jara sandya kedah lumawan jurit nandhingi kridane Raden Werkudara.
Bledug mangampak ampak wonten tengahing alun2 Giribajra, boten wonten sanes dumadi saking angsahe Prabu Jarasandya lumawan Werkudara kados dene gajah mungsuh Sima.
Nampi sasmitane Sri Bathara Kresna sarana cutik binelah kabuwang kanan kering, boten saranta ing penggalih tumuli prabu Jarasandya binelah dados kalih jalari dumuhi ing kasedan jati. Makaten sumbare Werkudara:
Werkudara : " He....wong Giri braja, Yen ora lila patine Gusti ratumu majuwa takatutake dosaku."
Nata Dwarawati nguningani patrapipun Prabu Sahadewa punika dahat kelangkung kamiwelasen penggalih, wasana Prabu Sahadewa tinarik astanipun sarwi dipun pangandikani kalawan arum, dhawuhe Sri Kresna :
"Dhuh kulup pepundhene wong Giri Bajra, mara pamiyarsakna pangandhikaningsun. Samengka ramanta wus kondur marang kasidan jati, jer wus rampung pakaryaning arcapada.
Ya ingsun anekseni(tanpa Arjuna lan Bima), ing sadurunge ramanira surut ing kasidan wus masrahake keprabon marang jeneng sira. Mungguh kaparenge ramanta kang mangkana iku murih aja nganti walah tolehen anggone sumedya ninggal ngarcapada iki, apadene supaya jeneng sira bisa ngerti manawa kondure marang kasidan wus dikersaake.
Kulup elingen pitungkase ramamu, sejatine ing donya iku ora ana sing ngungkuli sihing bapa marang atmaja. Manawa wong tuwa bisa aweh dedalane kamulyan marang atmajane, iku kamulyan kanggone wong tuwa rasane wus ora ana kang nimbangi. Manawa nalendra bisa nglungsurake keprabon marang putrane iku sinebut kanugrahan kang linuwih. Awit saka iku ramanta banjur enggal2 maringake keprabon marang jeneng sira, supaya bisa nguningani kamulyaning putra ing nalika isih sugenge, netepi kekudangan tumraping urip. Nganti dleweran luhku, ramamu Prabu Jarasanda ngrangkul ingsun kanthi ngagungake rasa panuwun.
Jenengsira mesthi uga nyipati dhewe. Mungguh tindake ratu anelukake ratu liya yektine uga ora ana alane, uger tindake mau kanthi adhedhasar welas asih, lan negara telukan dalah para kawulane banjur pinrih rahayu. Nanging ora mangkana ramamu suwargi, ratu telukan dipatrapi pidana kang abot brojol saka utamane nalendra. Mungguh ancase ramamu arsa ngrawuhake Sang Bayu Mangkurat Perwita Sari ya Raden Brata Sena, kang bisa nyampurnaake jiwa ragane. Sarana nelukake nalendra ngajeni para brahmana bebasan becik tinutupan ala tan arsa kawistara niate kang mulya.
Pituturingsun, nalendra iku kang wigati kudu bisa nyingkirake gegunungane rasa, lire ora ambeg-ambegan siji lan sijine satemah bisa ngraketake para kadang wandana, para sentana, pribadi marang kautamane. Nalendra kudu rumeksa marang karaharjane kawula."
Sahadewa : " Adhuh pukulun, ananging kados pundhi dosanipun rama Jarasandya anggenipun badhe bekakak ratu satus Nagara."
Kresna : " ha...ha...., apa ana kang wus dibekakak?, upama ramanmu, ora duwe rasa kamanungsan pageneya tansah manut miturut sumungkem marang Brahmana?
Dedongengan rikala semana prabu Dharmagosa kagungan putra saka garwa kekalih mijil amung separo2 badan, nglelingsemi tumrape negara banjur dibuang ana alas tinemu raseksi Jara, bisa diusadi dewasane kasowanake ana kadhaton dening Jara.
Saka bungahe Sang prabu anake banjur dijumenengake Nalendra, ora susah nganggo nolah noleh.
Kanggo nebus kalupute anggone buang anak nalika semana , sang prabu mekas manawa tumeka ing janji walulange supaya dibeset kanggo Tambur(kendang, bisa minangka tengara ana mungsuh neneka. Iku cethane nadyan dikebonake isih Gedhe rasa asihe marang putra tansah jangkung murih Widada nadyan wus badan Sukma."
Sahadewa:" Punapa Kedah Raden Werkudara ingkang nguntapaken boten paduka wa prabu titise Bathara Wisnu kang andhum kabahagyan?"
Kresna : " Mangertiya kulup, Wakmu Werkudara iku Sang Bayu Mangkurat Perwitasari kang kesinungan Tirtapawitra mahening suci, ora bakal mindha gawe mesthi sampurna tekan swarga jati."
Sahadewa : "Byar padhang nerawangan ati kula dupi midanget dawuh paduka wa prabu Sri Bathara Kresna, Wiwit dinten Punika kula Sahadewa tansah setyatuhu dhateng Wa Prabu dalah Raden Werkudara."
Prabu Sahadewa ngestuaken dhawuh sarta ambapa marang Nata Dwarawati, tuwin prasetya ing bejange sewanci wanci dumadi perang Bharatayuda dados senopati pengapiting Pandawa.
Wasana menawi wonten ukara ingkang boten mranani dhiri, kula nyuwun agunging pangaksami.
(Serat Sekar Jinarwi dening Sri Harto jati)
