HANGUDI ANGGAYUH LELAKUNING BECIK
Bandha donya, pangkat drajat lan semat kuwi mung saderma nggaduh peparing saka ngarsane Gusti Hyang Tunggal Jati
Mung bae yen manungsa wis kerem ing gebyare kamukten banjur awel anggone nglepeh
Karepe pengen langgeng salawase anggone ngemut kamukten tanpa mikir sejatine urip kang sejati
Jumbuh karo perkara kasebut ana piwulang luhur, menawa yen wis tumekaning janji wong mati iku ora gawa bandha
Mula perkara gadhuhan iku kapan dikersaake amung Gusti kang pirsa yoiku :
PATI, JODHO, TIBANING WAHYU, DUNUNGE PEPESTHI lan GADHUHANING DONYA
Amung dadi purbawasesaning Gusti Kang Murbeng Dumadi
Perkara iki kudu bisa ngelangake marang kamukten kang dadi pangimpening manungsa
Mula elinga, bandha donya gampang lunga, pangkat drajat gampang oncat, bojo ayu bisa mlayu
Piwulang iki bisa dadi pepeling luhur kangge anggayuh sejatining urip
Mula sing sapa kadunungan pangkat lan drajat aja adigang adigung
Lan sing sapa kadunungan bandha donya aja adiguna
Kadunungan kamuktening donya kudu tansah eling marang sapadha
Aja nganti kamukten kuwi dadi tetesing waspa nanging dadiya sukaning wardaya, amemangun karyenak tyasing sasama bisa kanthi manising ati, luhuring wardaya, luhuring subasita sarta ilining bandha donya kanthi rila ing dana
Mula supaya bandha donya ora dadi memala kudu disranani kang bisa agawe pigunaning liyan
Kamukten saka bandha donya kang ala iku wekasane mung bakal ngangsa-ngangsa yen ora linambaran amemangun karyenak tiyasing sasama
Mula yen bakal lestari tumus marang anak putu kudu gegebengan marang perkoro siji iki :
NULUNG SAPEPADHANING SING NANDANG KASANGSARAN KUDU LINAMBARAN ATI KANG WENING
Ora kena kinantenan pamrih kang bakal gawe reregeting niyat
Yen sabarang tumindak becik nanging isih kinanthenan pamrih dadine bakal muspra
Dadiya pawongan kang tumindak nyebar kabecikan
