SULUK SEKAR GADHUNG & SULUK PATHET JINGKING
Gandane kang sekar gadhung
Miwah Kembang-kembang menur
Kang esmu arum
Winor lan oyot-oyotan
Kadi kusuma mangambar-ambar
Kukusing lir bathara.
Aja turu sore kaki
Ana dewa ngangklang jagad
Nyangking bokor kencanane
Isine donga tetulak
Sandhang klawan pangan
Wong melek bageanipun
Wangine kembang gadhung, kembang menur lan oyot-oyotan kacampur wangine kukusing dupa kadya wangine kusuma trah luhur kang memba wangine bathara.
Aja turu sore kaki, aja pijer turu, nggedhekna rasa prihatin.
Ana dewa ngangklang jagad nyangking bokor kencanane, wayah sirepe wengi iku wayah tumurune wahyu saka Gusti.
Isine donga tolak, sandhang klawan pangan, wong melek bageanipun, maneka warna isine wahyu mula aja nganti ora keduman krana ora gelem prihatin, eman eman yen nganti kowe turu angler kamangka wayah kuwi Gusti lagi andum kabagyan keslametan lan kamulyan marang sapa wae kang gelem nyeyuwun.
Sejatine Gusti Maha Asih marang sapa wae, ananging Gusti luwih tresna marang wong kang dhemen prihatin.
Wasana cekap semanten, wilujeng sedaya nyuwun pangapunten menawi sowan kula kirang mranani, wilujeng ngayahi punapa kemawon, jaya jaya wijayanti, rahayuwa ingkang sami pinanggih, widada nir ing sambikala.
SULUK PATHET JINGKING
Tunjung mbang terate,
Irim-irim atap,
Taping kayu apu,
Asrining lelumut,
Kangkungira ijo,
Sri gading diwasa,
Retnaning rejasa,
Kembang karang sungsang,
Bogeme araras,
Raden,
Kembangira karang sungsang
