RESIKE ATI MANGGIH BASUKI PALGUNADI PARANGGELUNG
Sumeh padhang pasemone Raden Palgunadi sawuse misungsung jempol tangane kanggo sang gurunadi, resik ati datan dakwa bilih sedaya amung kartisampeka Resi Druna, nggone ban cindhe ban oyot dhumateng Raden Arjuna, kang ginadhang dados satriya prigel olah warastra jagad datan timbang.
Sang Resi druna marentahaken dhateng Palgunadi kapurih ngupadi kidang wulung, sayah Raden Palgunadi anggenipun nelasak wanawasa, ngaso sangandhaping wit gendaya'an. Karawuhan Resi Druna, Raden Palgunadi ngaturaken sembah pangabekti.
Resi Druna :" Kulup Palgunadi sing setya bekti marang guru, kulup sejatine bapa durung aweh piwulang marang jeneng sira. Sira bisa pinter iku saka Guru Sejatimu dhewe. Sira temen2 anggonmu ngoyak kidang wulung sanadjan ora kecekel ananging bapa wus pitaya katemenanira. Mula kulup wektu iki luwih prayoga kanggo mulang kowe awit wektu tiba wulan purnama. Dene kang dak wulangke yaiku :
1. DAMMA Tegese piwulang kang sawiji lan bab kang bisa digunakake sajroning urip minangka sarana nyingkiraje lelara kalebu jempol tanganmu.
Mula kulup bebasan rodha mubeng, aku ora bisa ngupaya badan utawa raga, awit manungsa peperangan jagad cilik kang kadadeyan saka brahman lan atma. Nalika manusa ngalami jaman awidya tegese manusa durung ngerti(bodho)manawa iku kaperang jagad cilik.
2. SAMKARA tegese manungsa wus tuwuh pangerten saka lelakon2 sing dilakoni.
3. SAMYANA Tegese manungsa wus eling lan wus mangerti manawa manungsa uga peranganing jagad cilik.
4. NAMA RUPA tegese manungsa banjur anggunakake jeneng lan wujud minangka mbedakake siji lan sijine, menawa nyebut.
Sawuse iku tuwuh rasa arane tegese manusa wus bisa gegandhengan lawan manungsa liyane kang seje papan, supaya srawung. Sawise iku gandheng unaring ati tumuli ngancik jaman wedana.
5. WEDANA tegese manungsa wus darbe pepinginan barang2 kang dumadi .
6. UPADANA tegese tuwuh kanepson, sawuse tuwuh ngancik jaman sampurna .
7. BHAWA tegese manungsa wus bisa mbangun utawa mangun kang luwih pa tes, wekasan timbul yati yaitu nglahirake (panemu,wawasan,....).
Mula kulup supaya anggonmu ngudi kawruh iku ingkang tumemen awit jer temen2 anggonmu anggayuh mrih reh kautaman mesthi bakal tinemu. Cukup semene piwulanku, bapa amung bisa paring ali-ali ampal gadhing, darijimu bakal tukul maneh kapara luwih patitis lan luwih sakti mandraguna."
Raden Palgunadi ngaturake agunging panuwun marang Resi Druna, sabanjure pada bali marang negarane dhewe-dhewe.
Catetan :
Guguripun Palgunadi wonten lakon Karma Pala disababaken sulistyawarni Dewi Anggrahini (garwa Palgunadi) damel kegiwang atine Raden Arjuna.
Wasana menawi wonten ukara ingkang mboten mranani ing dhiri, kula nyuwun agunging pangaksami.
Salam budaya RAHAYU RAHAYU RAHAYU.
(Serat Wucalipun Resi Druna dening R.Hadi Sumarta)
